U Leninskim RUUSie na muža i žonku bieśpierapynna praciahvajuć składać pratakoły za pierasył adno adnamu navinaŭ z telehram-kanałaŭ, jakija ŭłady pryznali ekstremisckimi.
21 kastryčnika spravy Siarhieja i Anastasii razhladzieła sudździa Taćciana Šocik. Na hety raz pratakoł na Anastasiju skłali za pierasył mužu 21 červienia paviedamleńnia z «ekstremisckaha» kanała. Svaju vinu dziaŭčyna pryznała całkam. Jana rastłumačyła, što na toj momant jana nie viedała, što kanał uniesieny ŭ śpis «ekstremisckich». Advakatka źviarnuła ŭvahu sudździ na šmatlikija pamyłki ŭ materyjałach spravy, ale sudździa na heta nie adreahavała. Spravu Anastasii sudździa Šocik razhledzieła za 12 chvilin.
Na Siarhieja pratakoł skłali za toje, što 16 červienia jon pierasłaŭ žoncy navinu ź inšaha kanała. Siarhiej adznačyŭ, što sudziać jaho za paviedamleńni, jakija znajšli ŭ telefonie Anastasii. U materyjałach spravy Krupieniča była kopija pastanovy suda Partyzanskaha rajona ad 23 sakavika, zhodna ź jakoj kanał pryznany «ekstremisckim». Ale advakatka paprasiła sudździu całkam pračytać hetuju pastanovu:
«Na momant vyrabu fotakopii rašeńnie suda Partyzanskaha rajona Minska ad 23 sakavika 2021 hoda nie ŭstupiła ŭ zakonnuju siłu».
Advakatka dadała, što kali Siarhieja sudziać za raspaŭsiud infarmacyjnaj pradukcyi, jakaja ŭklučana ŭ respublikanski śpis ekstremisckich materyjałaŭ, to čamu tady ŭ materyjałach spravy naohuł adsutničaje infarmacyja mienavita ź Mininforma, jaki viadzie hety śpis. Advakatka taksama nie razumieje, čamu i jak hetaje fota pastanovy suda trapiła ŭ materyjały spravy. U vyniku sudździa Šocik zrabiła pierapynak u spravie, kab zaprasić u Partyzanskim sudzie kopiju pastanovy ab pryznańni kanała ekstremisckim. Paśla pierapynku da materyjałaŭ spravy ŭžo dałučyli kopiju pastanovy. Ale, akramia hetaha, u spravie źjaviłasia i vypiska z Respublikanskaha śpisa ekstremisckich materyjałaŭ. Dla hetaha sudździa pavinna była adpravić spravu na dapracoŭku, kab mienavita supracoŭniki RUUSa dadavali vypisku da materyjałaŭ spravy, a nie prymać niepasredny ŭdzieł u pošukach dokazaŭ viny Siarhieja.
«Što tyčycca vytrymak z Respublikanskaha śpisa ekstremisckich materyjałaŭ, jaki Vysoki sud pa ŭłasnaj inicyjatyvie zapatrabavaŭ i dałučyŭ da materyjałaŭ spravy, to hetyja abstaviny taksama nielha prymać da ŭvahi, tamu što ŭ adpaviednaści z prezumpcyjaj nievinavataści abaviazak dokazu viny asoby, u dačynieńni da jakoj viadziecca administracyjny praces, uskładajecca na słužbovuju asobu orhana, jaki viadzie administracyjny praces, to-bok na pradstaŭnikoŭ RUUS Leninskaha rajona, a nie na sud», — prakamientavała na sudzie advakatka Siarhieja.
U vyniku sudździa Taćciana Šocik znoŭ aryštavała Siarhieja i Anastasiju na 13 sutak kožnaha. Muž i žonka ahułam praviaduć na Akreścina 112 i 111 sutak adpaviedna. Niahledziačy na toje, što jany amal čatyry miesiac buduć za kratami ŭ niečałaviečych umovach, im pryjdziecca apłacić vielizarnyja hrošy za charčavańnie ŭ CIP. Kali adzin dzień na Akreścina kaštuje 14 rubloŭ i 50 kapiejek, to kožny ź ich musić vypłacić bolš za 1600 rubloŭ.
