Fota ilustracyjnaje

Fota ilustracyjnaje

Kolki školnikaŭ chvareje na karanavirus ciapier u Biełarusi, aficyjnych źviestak niama. Ale piedahohi i baćki z roznych rehijonaŭ Biełarusi raskazvajuć «Našaj Nivie» pra vypadki zachvorvańnia na karanavirus u škołach. Pry čym chvarejuć jak dzieci, tak i nastaŭniki.

«Viedaju asabista dvuch nastaŭnikaŭ i dvuch dziaciej z paćvierdžanym kavidam», — raskazvaje piedahoh z Maładziečna.

«Ja z Kobryna. 20 čałaviek z nastaŭnikaŭ užo pierachvareli na kavid, ciapier chvarejuć inšyja, vučni taksama. Byvaje, na zaniatkach niama pałovy kłasa», — dadaje jašče adna naša surazmoŭca.

«20-ja himnazija Minska. Jość infarmacyja pra dziaciej z paćvierdžanym kavidam. Dakładna ŭ 8 kłasie», — raskazvaje jašče adna nastaŭnica.

«Pracuju ŭ škole №1 u vioscy Kopišča (Novaja Baravaja). Chvareje vielmi šmat nastaŭnikaŭ, — havoryć piedahoh. — Historyki zamianiajuć moŭnikaŭ, fiłołahi viaduć fiziku i matematyku. Šmat kamu z nastaŭnikaŭ nie adkryvajuć balničnyja, pakul nie pryjdzie vynik PŁR-testa, i jany ŭ hety čas chodziać na pracu.

Masačny režym nibyta jość, ale vieści ŭroki ŭ ich nie vielmi zručna, tamu ŭ maskach chodzim na narady albo ŭ nastaŭnickaj. Bolš za ŭsio dzivić toje, što ŭrad admianiŭ masačny režym u krainie. Ale ŭ našu škołu jedzie kamisija, jakaja budzie praviarać mienavita toje, jak my kantralujem situacyju z kavidam.

U kožnym kłasie rezka pavinny źjavicca termomietry, kab vymiarać tempieraturu dzieciam, dezsrodki i inšaje. Samaje cikavaje, što zakuplenych termomietraŭ chapiła nie ŭsim, mnohija nastaŭniki vymušanyja kuplać ich sami. Jak možna admianiać masačny režym, a potym pryjazdžać z pravierkaj pa kantralavańni mieraŭ epidemijałahičnaja biaśpieki?»

Fota ilustracyjnaje

Fota ilustracyjnaje

«Rekamiendacyi Ministerstva achovy zdaroŭja ŭvieś čas razychodziacca z mahčymaściami Ministerstva adukacyi»

Kali vypadki zachvorvańnia fiksujucca ŭ škołach, to čamu da hetaha času niama nivodnaj, jakaja b pierajšła na addalenaje navučańnie? Tym bolš, što jość «Časovyja rekamiendacyi pa arhanizacyi adukacyjnaha pracesu va ŭmovach raspaŭsiudžvańnia COVID-19». Ich Ministerstva achovy zdaroŭja vypuściła jašče da pačatku navučalnaha hoda 2021-2022.

U piatym artykule rekamiendacyj padrabiazna apisanyja dziejańni kiraŭnikoŭ ustanoŭ adukacyi na vypadak rehistracyi navat adnaho vypadku zachvorvańnia na kavid. U takim razie «arhanizujecca adukacyjny praces navučencaŭ z vykarystańniem infarmacyjna-kamunikatyŭnych technałohij poŭnaściu abo častkova na 14 dzion z daty rehistracyi apošniaha vypadku».

Fota ilustracyjnaje

Fota ilustracyjnaje

«Tak, my čuli pra hety dakumient, — raskazała «Našaj Nivie» nastaŭnica ź Minska. — Ale adrazu było zrazumieła, što ničoha ahulnaha z realnaściu jon nie maje. Rekamiendacyi Ministerstva achovy zdaroŭja ŭvieś čas razychodziacca z mahčymaściami Ministerstva adukacyi.

Ščyra kažučy, kali pračytali ich, navat śmiajalisia, bo ni pra jakuju dystancyjnuju adukacyjnuju płatformu, jakuju nam abiacajuć užo niekalki hadoŭ, siońnia navat havorka nie idzie. Jak u takim razie škoła moža arhanizavać dystancyjnaje navučańnie? Pra jakija infarmacyjna-kamunikatyŭnyja technałohii idzie havorka?

Na piedsaviecie ŭ pačatku hoda nam tak i abviaścili: «Mahčymaściaŭ pieravieści achvotnych na dystancyjnaje navučańnie ŭ škole niama — ni fizičnych, ni kadravych».

U hetym ža dakumiencie jość jašče niekalki cikavych akaličnaściej. Da prykładu, prymać rašeńnie ab pieravodzie na dystancyjnaje navučańnie dyrektar pavinien z ulikam niekatorych niemałavažnych umoŭ: z ulikam «minimizacyi kantaktaŭ i zachavańnia sacyjalnaj dystancyi, mahčymaściaŭ ukaranieńnia infarmacyjna-kamunikatyŭnych technałohij padčas realizacyi adukacyjnych prahram, najaŭnaści kadravaha reziervu pry nieabchodnaści apieratyŭnaj zamieny supracoŭnikaŭ ustanovy».

Fota ilustracyjnaje

Fota ilustracyjnaje

Taksama ŭ rekamiendacyjach napisana, što «rašeńnie ab pierachodzie na navučańnie z prymianieńniem infamacyjna-kamunikatyŭnych technałohij pa 1-4 kłasach prymajecca pa ŭzhadnieńni z baćkami».

«Z ulikam hetych rekamiendacyj, kiraŭnictva škoły nam abviaściła: infarmacyjna-kamunikatyŭnych technałohij i mahčymaściaŭ u nas niama, a ŭsio astatniaje vykonvajem. To-bok masačny režym i supraćepidemijałahičnyja miery — naša ŭsio. Na tym i staim.

Darečy, źviarnicie ŭvahu: dziejańni hetaha dakumienta raspaŭsiudžvajucca tolki na vierasień-kastryčnik 2021 hoda.

Napeŭna, dla druhoj čverci buduć novyja rekamiendacyi. Ale, miarkuju, jany taksama zastanucca farmalnymi. Dakumient, jakim kirujucca adukacyjnyja ŭstanovy — Kodeks ab adukacyi. A zhodna ź im, dystancyjnaje navučańnie ŭ biełaruskich škołach nie praduhledžana», — razvažaje piedahoh.

Juryst: «Rekamiendacyi nie nosiać abaviazkovy charaktar»

A jak historyju pra mahčymaść pierachodu na dystancyjnaje navučańnie pavodle dakumienta Ministerstva achovy zdaroŭja kamientujuć jurysty?

«Rekamiendacyi nie nosiać abaviazkovy charaktar. Prostymi słovami, surjoznaj jurydyčnaj siły jany nie majuć, — havoryć jurystka Alena Sałaŭjova. — Jurydyčnuju siłu maje Kodeks ab adukacyi Respubliki Biełaruś — heta hałoŭny adukacyjny dakumient krainy, ale, jak užo hučała vyšej, dystancyjnaje navučańnie Kodeksam ab adukacyi Biełarusi nie praduhledžana.

Zatoje jość Kodeks RB ab šlubie i siamji. Pa im siamja i zakonnyja pradstaŭniki dziaciej — u pryjarytecie. Jany majuć prava vybirać mietady, formy zachavańnia i adukacyi svajho dziciaci. Karanavirus aficyjna ŭniesieny Ministerstvam achovy zdaroŭja ŭ śpis niebiaśpiečnych dla žyćcia zachvorvańniaŭ.

Pra nastupny varyjant ja ŭžo raskazvała raniej, ale ahuču jaho i zaraz, bo ničoha novaha biełaruskaje zakanadaŭstva nam prapanavać pakul nie moža. Na imia dyrektara škoły baćki mohuć napisać zajavu ci apaviaščeńnie, zarehistravaŭšy jaho ŭ kancylaryi.

Tekst moža być nastupny: «My, baćki takoha-ta vučnia takoha-ta kłasa, paviedamlajem, što, zhodna z Kodeksam Respubliki Biełaruś ab šlubie i siamji, majem prava na pryjarytetnyja rašeńni ŭ dačynieńni da našych dziaciej. Niesučy adkaznaść za ich žyćcio i zdaroŭje, pakidajem ich doma z takoj-ta pa takuju-ta datu na karancin, bo ličym, što epidemijałahičnaja abstanoŭka ŭ Biełarusi vielmi ciažkaja. Navučalnuju prahramu abiacajemsia zasvoić samastojna. Data i podpis».

Daviedka «NN»

U krasaviku minułaha hoda kala 1,5 tysiačy biełarusaŭ padpisali pietycyju za ŭviadzieńnie karancinu ŭ škołach da kanca navučalnaha hoda. Minadukacyi ŭ adkaz zajaviła, što dystancyjnaja adukacyja nie praduhledžana pravavymi aktami i rekamiendavała adukacyjnym ustanovam «pravieści dadatkovyja supraćepidemijałahičnyja mierapryjemstvy».

U mai minułaha hoda krychu bolš za 5 tysiač čałaviek pakinuli svaje podpisy pad pietycyjaj za adstaŭku Ministra adukacyi Ihara Karpienki z farmuloŭkaj «Nie spraviŭsia z prablemami, jakija ŭźnikli ŭ vyniku pandemii karanavirusa i nie zmoh ukaranić dystancyjnaje navučańnie».

Клас
0
Панылы сорам
0
Ха-ха
0
Ого
0
Сумна
0
Абуральна
0