Deputat niamieckaha Bundestaha, śpikier pa źniešniepalityčnych pytańniach frakcyi Sacyjał-demakratyčnaj partyi (SDPH) Nils Šmid (Nils Schmid) prapanuje pryciahnuć Ukrainu da vyrašeńnia prablemy biežancaŭ na miažy Polščy i Biełarusi.

Jak skazaŭ palityk u intervju niamieckaj miedyjakampanii Deutschlandfunk u sieradu, 10 listapada, z Ukrainaj možna było b damovicca ab pryjomie biežancaŭ na toj čas, pakul doŭžycca razhlad ich zajaŭki ab pradastaŭleńni prytułku ŭ ES. «Tak my možam dać vyrazna zrazumieć, što nie kožny biežaniec aŭtamatyčna patrapić u Jeŭrasajuz», — skazaŭ Šmid.

U toj ža čas palityk, čyja frakcyja źjaŭlajecca najbujniejšaj u Bundestahu, raskrytykavaŭ abychodžańnie Polščy ź mihrantami, jakija sprabujuć nielehalna trapić u krainu z terytoryi Biełarusi. Šmid źviarnuŭ uvahu na paviedamleńni pra niezakonnyja «pušbeki» — vyciaśnieńnie biežancaŭ z krainy nazad u Biełaruś biez mahčymaści padać zajaŭku na prytułak u ES. Pa słovach niamieckaha palityka, Polšča pavinna vykonvać mižnarodnyja normy, u pryvatnaści, pradastaŭlać bazavuju humanitarnuju abaronu i prava na razhlad zajaŭki na prytułak ludziam, jakija žyvuć u niastačy. 

U Radzie biaśpieki i abarony (RNBA) Ukrainy adkazali na prapanovu niamieckaha parłamientaryja. Sakratar RNBA Alaksiej Daniłaŭ prapanavaŭ niamieckamu boku zabrać uciekačoŭ sabie.

«My na RNBA razhladali hetuju zajavu spadara Šmita. U nas jość prapanova da sacyjał-demakrataŭ Niamieččyny ŭziać sabie dadomu pa dva, pa try, pa piać (mihrantaŭ — red.), kali mała miesca ŭ ich u Bundestahu, to chaj biaruć sabie dadomu», — skazaŭ sakratar RNBA.

Pavodle jaho słoŭ, «ź jakoha pierapudu» Ukraina pavinna brać da siabie mihrantaŭ, kali imi pavinien zajmacca niamiecki bok.

«Vielmi dziŭna, kali niemcy nam raskazvajuć, što nam z hetaj nahody rabić», — dadaŭ Daniłaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?