Ich lohka paznać u nievialičkaj zali dla vyletaŭ aeraportu ŭ Biejrucie — maładyja ludzi, jakija jeduć u Biełaruś, nie abciažaranyja valizami i nie padobnyja da zvyčajnych turystaŭ. Jany zahadzia pryjšli ŭ zalu rehistracyi, čakajučy pasadki na pramy rejs u Minsk, jaki ažyćciaŭlaje Biełavija.
U aŭtorak 9 listapada, paśla taho, jak uvieś śviet ablacieli naviny pra šturm polskaj miažy mihrantami,
hetyja ludzi ŭsio jašče trymajucca lehiendy, što jany jeduć pahladzieć Minsk ź cikaŭnaści.
«Voś u mianie jość zvarotny kvitok», ‒ pakazvaje małady siryjec razdrukavany arkuš i nastojvaje na tym, što ŭsio zakonna. Turapieratar papiaredziŭ žurnalista: usie, chto jedzie ŭ Biełaruś, buduć maŭčać pra svoj sapraŭdny płan.
Ale ŭžo paśla niekalkich pytańniaŭ siryjec pryznajecca, što jedzie sprabavać svajo ščaście prarvacca ŭ Jeŭropu. Vizu jon adkryvaŭ u Biejrucie, u hanarovaha konsuła Biełarusi ŭ Livanie, u jakoha svajo pryvatnaje turahienctva.
Chłopiec razumieje, što napieradzie jaho čakaje miaža. Viedaje pra tych, chto zahinuŭ na miažy Biełarusi i Polščy.
«Ale što ja mušu rabić? Tut zastavacca? I jakaja ŭ mianie budučynia?» — pytaje jon i viartajecca da svaich siabroŭ i svajakoŭ. Jany trochu niervova śmiajucca, robiać sełfi i jon raźvitvajecca z tymi, chto zastajecca ŭ Livanie, dy idzie na samalot.
U inšaha mužčyny, taksama siryjca, ź jakim zahavorvaje žurnalist, u Livanie zastajecca žonka i dzieci. Jon vyrašyŭ ryzyknuć i prarvacca ŭ Jeŭropu pieršym, kab prakłaści šlach svaim.
Da kryzisu ŭ jaho ŭsio było dobra, kaža mužčyna. Ale ciapier Livan zachłynuli ekanamičnyja prablemy.
Jon hatovy da ciažkaściaŭ — užo ŭ aeraporcie na im puchavik i hornyja boty, chacia ŭ Biejrucie śpiakotna. Na farmalnaści jon pazyčyŭ 6 tysiač dalaraŭ, usie dakumienty afarmlaŭ u Siryi, dzie Biełaruś maje pasolstva.
Z pačatku listapada ź Biejruta da Minska lotaje dva rejsy na tydzień (raniej byŭ tolki adzin), a heta patencyjna kala 400 pasažyraŭ u tydzień.
Kali ź livanskaha Biejruta ciapier lotaje pa dva rejsy na tydzień, ź siryjskaha Damaska — pa šeść.
«Bracie moj, klanusia Boham, jość navina, što … adkryjuć adzin bok». Što raspaviadajuć pra šlach na Zachad mihranty, jakija iduć tudy i jakija dajšli
Livanu ŭžo aficyjna zabaroniena pieravozić irakcaŭ u Minsk, tamu jany rekłamujuć svaje pasłuhi najpierš siarod siryjcaŭ. Kali hety kanał pierakryjecca, havoryć žurnalistu supracoŭnik aeraportu ŭ Biejrucie, ludzi buduć lacieć praz Turcyju ci Abjadnanyja Arabskija Emiraty. Jeŭropa moža akazać cisk na Livan, ale chto zabaronić inšym krainam rabić rejsy, kudy im zachočacca? Chto začynić dźviery Siryi?
U stalicy Siryi, Damasku, sotni ludziej źbirajucca ŭnačy, niekalki razoŭ na tydzień, pierad uvachodam u aeraport, čakajučy pasadki na ranišni rejs naŭprost u Minsk.
Rejs 6Q431 vykonvaje avijakampanija Cham Wings Airlines, što naležyć kanhłamieratu, źviazanamu sa stryječnym bratam Bašara Asada. Da niadaŭniaha času jany zajmali inšuju kamiercyjnuju nišu: pieravozili rasijskich bajevikoŭ z Rastova-na-Donie ŭ Siryju i nazad, a taksama adpraŭlali siryjskich bajevikoŭ u Bienhazi. Sajt flyradar24 śviedčyć, što za apošni miesiac jany ažyćciavili bolš za dvaccać pieralotaŭ u Biełaruś i nazad. Učora ŭsie miescy na dva nastupnyja rejsy byli ŭžo raskuplenyja.
Na marach ludziej z Uschodu prabicca ŭ Jeŭropu sprabujuć abahacicca mnohija — turahiencyi, avijakampanii, pasiaredniki. Tak adna ijardanskaja čartarnaja kampanija źviarnułasia da Biejruta z prośbaj adkryć rejsy ŭ Biełaruś praź ijardanski Aman. Ale Biejrut nie padtrymaŭ hety prajekt.
Irakski nacyjanalny pieravozčyk Iraqi Airways, pad ciskam Jeŭropy, prypyniŭ paloty z 7 žniŭnia (da hetaha jany pieravozili pa 500 pasažyraŭ za rejs pa maršrucie Bahdad-Minsk). I ŭsio ž prynamsi adna pryvatnaja kampanija ź Iraku Fly Baghdad praciahvaje pieravozić pasažyraŭ, chaj sabie i bolš aściarožna.
Irakcy taksama laciać u Minsk praz Dubaj, Turcyju i navat Maskvu.
Na videa, jakija ablacieli ŭvieś śviet, bačnyja sotni namiotaŭ i łahier kala miažy z Polščaj. Jak śviedčyć pres-sakratar ministra-kaardynatara śpiecsłužb Polščy Stanisłaŭ Žaryna, hetyja hrupy mihrantaŭ rychtujucca da doŭhatryvałaj prysutnaści, ale samaje tryvožnaje —
u Minsku ŭžo padrychtavanyja inšyja, značna bolšyja hrupy dla pierapraŭki da miažy, i imi kirujuć biełaruskija śpiecsłužby. Polšča rychtujecca da taho, što kryzis zaciahniecca na niekalki miesiacaŭ.
U minskim ža aeraporcie zimovy raskład uklučaje štotydzień piaćdziasiat siem rejsaŭ ź Blizkaha i Siaredniaha Ŭschodu, siarod jakich jość rejsy, naprykład, u horad Erbil na poŭnačy Iraku i Ras-el-Chajma, što ŭ Abjadnanych Arabskich Emiratach. Z Damaskam płanujecca štodzionny rejs. Nie kažučy ŭžo pra rejsy ŭ Biejrut, Dubaj, Stambuł dy Maskvu.
Kačanava śćviardžaje, što mihranty trapili ŭ Biełaruś pa biaźvizie. Ale pa zakonie heta niemahčyma
Polskija dypłamaty sprabujuć pierakryć jak maha bolš avijazłučeńniaŭ, jakimi karystajucca mihranty, ale heta składana, pakolki časta heta śpiecyjalna stvoranyja pryvatnyja kampanii, kaža Žaryna. Jon spadziajecca, što Jeŭrapiejski Sajuz pakaraje ŭsich udzielnikaŭ hetaha pracesu.
Pieršym pośpiecham u hetym kirunku, piša Le Monde, možna ličyć zakryćcio Irakam biełaruskaha hanarovaha kansulatu.
Vajskovy ahladalnik Jahor Lebiadok pra kryzis na miažy: U sieradu-piatnicu možna čakać niejki pik dziejańniaŭ
