Ab hetym paviedamiŭ žurnalistam kiraŭnik Administracyi prezidenta Ihar Sierhiejenka paśla sustrečy Łukašenki z rabočaj hrupaj pa dapracoŭcy prajekta Kanstytucyi, piša BiełTA.
Rabočaja hrupa siońnia faktyčna zaviaršyła padrychtoŭku papravak u Asnoŭny zakon, adbyłosia litaralna jaho paartykulnaje abmierkavańnie. Dalej prajekt budzie pradstaŭleny na razhlad Kanstytucyjnaj kamisii.
«Pakul tyja prapanovy, jakija byli sfarmulavany rabočaj hrupaj, u cełym padtrymany. U dalejšym čakajecca jašče abmierkavańnie z Kanstytucyjnaj kamisijaj (da hetaha jany aznajomiacca z tekstam, jaki my im nakirujem litaralna na hetym tydni). Dumaju, što da kanca listapada — pačatku śniežnia my vyjdziem na ŭsienarodnaje abmierkavańnie prajekta Kanstytucyi», — skazaŭ Ihar Sierhiejenka.
Asobna žurnalisty pacikavilisia zamacavańniem u Kanstytucyi statusu i paŭnamoctvaŭ Usiebiełaruskaha narodnaha schodu. «Prapanoŭvacca budzie Usiebiełaruski narodny schod jak vyšejšy pradstaŭničy orhan, — skazaŭ jon. — Adpaviedna vyznačany paŭnamoctvy hetaha orhana — šerah paŭnamoctvaŭ, jakija byli prapisany i prapanavany Kanstytucyjnaj kamisijaj, i rabočaja hrupa dadała ŭ tym liku i pa vybrańni kiraŭnikoŭ sa składu Kanstytucyjnaha, Viarchoŭnaha sudoŭ, CVK, zaćviardžeńnie prahram sacyjalna-ekanamičnaha raźvićcia na piacihodździe i šerah inšych pytańniaŭ». Padahulniajučy tekst papravak u Kanstytucyju pavinien być apublikavany dla ŭsieahulnaha aznajamleńnia za miesiac da refierendumu.