«Padziei ŭ krainie pakinuli ŭva mnie śled na ŭsio žyćcio. Čamu b nie pakinuć śled i na ciele?»
Palinie 20 hadoŭ. Jana pracuje mieniedžaram u śfiery prodažaŭ i vučycca na apošnim kursie ŭ BDU. Zrabić tatuiroŭku dziaŭčyna vyrašyła paśla taho, jak ubačyła eskiz aŭtazaka ŭ tatu-majstra.
Fota: ułasny archiŭ.
«Tam byli arnamienty, nadpisy, kvietki. Pieršapačatkova chacieła nabić aŭtazak, ale potym vyrašyła niešta bolš pazityŭnaje. Padziei ŭ krainie pakinuli ŭva mnie śled na ŭsio žyćcio. Čamu b nie pakinuć śled i na ciele? — razvažaje jana. — Tamu zrabiła bieł-čyrvona-biełyja sardečki. Letam pracavała ŭ łahiery i dzieci źviartali ŭvahu na maju tatuiroŭku. Mnie zdavałasia, što jany buduć dumać, što heta prosta sercajki. A jany ŭsio razumiejuć. Hladzieli i kazali: «Oho, u vas be-če-be!»
Taho,što mohuć zabrać na sutki za tatuiroŭku, nie bajałasia. Voś kali b aŭtazak zrabiła, to tady b mahli za heta bić».
«Vyrašyła, što chaču nabić bieł-čyrvona-bieły ściah na azbucy Morze»
27-hadovaja Vieranika pracavała piedahoham i paralelna vučyłasia ŭ BDU. Ale jaje zatrymali ŭ 2020-m i dali 20 sutak. Paśla hetaha dziaŭčynie daviałosia źjechać u Kijeŭ. Niezvyčajnuju tatuiroŭku Vieranika paśpieła zrabić jašče ŭ śniežni 2020 hoda ŭ Minsku niezadoŭha da zatrymańnia.
Fota: ułasny archiŭ
«Zrabiła tatuiroŭku na azbucy Morze. Jana aznačaje bieł-čyrvona-bieły ściah. U mianie było ŭstojlivaje adčuvańnie, što mianie potym zabiaruć. Tak i atrymałasia, — havoryć jana. — Ja viedała, što ŭsiu simvoliku ŭ ludziej adbirajuć. Vyrašyła, što chaču nabić bieł-čyrvona-bieły ściah na azbucy Morze. Ja fanat minimalizmu. Padumała, što za tatuiroŭku «Pahoni» ci prosta bieł-čyrvona-biełaha ściaha ŭžo sto adsotkaŭ prylacić, a voś azbuku Morze nie viedajuć, nie zdahadajucca. Tolki ja budu viedać, što heta dla mianie značyć. Kali ja siadzieła, mianie heta vielmi padtrymlivała. Ja jak varjatka ŭśmichałasia ŭ RUUS, pahładžvajučy tatuiroŭku. U kamiery taksama ŭsim dziaŭčatam pakazvała i raskazvała, jak jaje rabiła. Kali było sumna, hladzieła na jaje i niejak ciopła na dušy rabiłasia. Nie zabrali jany ŭ mianie ŭsio. Majo zastałosia sa mnoj».
«Abraŭ arnamient, što aznačaje «siamja»
Dźmitryju 20 i jon vučycca ŭ BDU na apošnim kursie. Pra tatuiroŭku, źviazanuju ź Biełaruśsiu, chłopiec zadumaŭsia jašče ŭvosień minułaha hoda, ale zrabiŭ jaje ŭ sakaviku biahučaha.
Fota: ułasny archiŭ.
«U mianie byŭ siabar, jaki chacieŭ nabić sabie biełaruski arnamient. Paśla hetaha ja taksama zadumaŭsia, vyrašyŭ, što chaču zrabić, — adznačaje małady čałaviek. — Na dzień naradžeńnia mnie siabry padaryli siertyfikat ŭ sałon. Abraŭ mienavita hety arnamient, jon aznačaje «siamja». Dumaju, što simvalična atrymałasia. U školnyja hady nie cikaviŭsia biełaruskaj kulturaj, a kali pastupiŭ va ŭniviersitet, majo asiarodździe pamianiałasia. Ubačyŭ ludziej, jakija hetym cikaviacca. I prasiaknuŭsia sam. Zbolšaha ŭ suviazi z padziejami minułaha hoda, a taksama z-za majoj lubovi da radzimy, ja zrabiŭ hetuju tatuiroŭku».
«Nam kazali, što my potym sto razoŭ paškadujem i budziem ruki sabie adsiakać»
Aryna skončyła fakultet fiłasofii i sacyjalnych navuk BDU. Ciapier joj 21 hod. Letaś Aryna ŭdzielničała va ŭsich mahčymych pratesnych akcyjach. Tady jana i vyrašyła razam ź siastroj zrabić adpaviednuju tatuiroŭku.
Fota: ułasny archiŭ
«U adzin ź dzion, kali ŭžo źjaviŭsia internet, my ź siabrami abmiarkoŭvali ŭsio, što adbyłosia doma. I pryjšła ideja, što chočam niejak zafiksavać naš vopyt na sabie, — uspaminaje Aryna. —My ŭ adzin hołas zajavili, što treba rabić tatuiroŭku, Da hetaha ŭ sacyjalnych sietkach była papularnaja fraza: «Dobraj ranicy ŭsim, aproč psoŭ režymu».
I my ź siastroj vyrašyli nabić hetuju frazu, Rašeńnie było spantannaje i chutkaje. Spačatku hetaja fraza zdavałasia žartoŭnaj. Ale my pryvykli refleksavać praź śmiech. Takim čynam bol cišeje. Nam kazali, što my potym sto razoŭ paškadujem i budziem ruki sabie adsiakać.
U tym sensie, što z-za tatuiroŭki siłaviki mohuć prajavić da nas žorstkaść. Ludzi ciapier bajacca lubych publičnych prajavaŭ svajoj hramadzianskaj pazicyi, asabliva kali heta tatuiroŭka. Ale my ŭsio roŭna zrabili».
«U červieni 2021 zachavała na sabie miežy našaj niezaležnaj dziaržavy»
Chimiku-łabarantu Kaciarynie 23 hady. Svaju pieršuju pratestnuju tatuiroŭku Kaciaryna zrabiła biełym koleram, kab jana była tolki dla jaje. Nieŭzabavie dziaŭčyna vyrašyłasia i na druhuju.
Fota: ułasny archiŭ
«Pra tatuiroŭku ja dumała daŭno, ale pieršuju chacieła zrabić takuju, kab jana była napoŭnienaja sensam, — raskazvaje dziaŭčyna. — U siaredzinie žniŭnia 2020 hoda dla mianie stała vidavočnym, što mnie treba! Pieršyja maje tatuiroŭki heta biełyja podpisy na nazie: «ŽYVIE BELARUS i ŽYVIE VIECZ». I miesca, i koler nadpisaŭ mienavita takija, kab heta było tolki dla mianie.
Dla mianie heta bolš, čym słovy, heta simvał dabra, sumlennaści i svabody. I ŭ ciažkija momanty žyćcia ja ŭspaminaju pra hetyja nadpisy na svaim ciele, pra pieryjad kali ich zrabiła, źbirajusia ź siłami i ruchajusia napierad.
U červieni 2021 zachavała na sabie miežy našaj niezaležnaj dziaržavy. Čyrvony kontur Biełarusi i dźvie ruki, jakija trymajucca adna za adnu. Ja postfaktum prydumała ŭvohule šmat utojenych sensaŭ: kontur ruk padobny na frahmient «Stvareńnie Adama» Mikiełandžeła, ale tam ruki nie datykajucca, jak nie pierasiakajecca ziamnoje i boskaje. Biełarusy takija kociki, što ŭ mianie sutyknulisia, ale heta humar».
