Taksama Łukašenka skazaŭ, što ŭ jaho jość damoŭlenaść z Pucinym ab vizicie ŭ Krym, jaki jon chacieŭ by pačać ź Sievastopala.
Nahadajem, ukrainski paŭvostraŭ Krym razam z horadam Sievastopal byŭ niezakonna akupavany Rasijaj ŭ 2014-m. Mižnarodnaja supolnaść nie pryznała zakonnaść hetaj anieksii.
Na praciahu siami hadoŭ z momantu akupacyi Alaksandr Łukašenka nieadnarazova nazyvaŭ paŭvostraŭ «de-fakta rasijskaj ziamloj». Takoj była jaho zajava ŭ krasaviku 2014 hoda.
«Hałoŭnaje ŭ tym: de-fakta — heta siońnia rasijskaja terytoryja, heta siońnia častka Rasii. Mnie heta nie padabajecca. Ale chto daŭ padstavu rasijanam dziejničać takim čynam? I apošni arhumient — ja im (ukraincam, — Red.) skazaŭ pa-mužčynsku: kali b vy ličyli, što heta vaša terytoryja, vy b za jaje zmahalisia. Vy hetuju ziamlu nie abaranili», — skazaŭ tady Łukašenka.
U tym ža 2014 hodzie Łukašenka pryjechaŭ u Kijeŭ na inaŭhuracyju prezidenta Ukrainy Piatra Parašenki. Ukrainskija žurnalisty spytali jaho, čyj Krym.
«Spytajcie va ukraincaŭ, čyja heta terytoryja siońnia. Ja ŭžo nie adnojčy kazaŭ: nie čas i nie miesca siońnia hetyja prablemy abmiarkoŭvać. Ukraina pavinna być adzinaj, cełasnaj dziaržavaj i budzie takoj», — adkazaŭ jon.
Łukašenka tady taksama rekamiendavaŭ žurnalistam «pajechać u Krym i tam damaŭlacca ab tym, kab jon byŭ ukrainskim».
Ab hetym epizodzie Łukašenka zhadaŭ u 2019 hodzie na sustrečy z pradstaŭnikami ŭkrainskich ŚMI.
U žniŭni 2021 hoda Łukašenka rezka vykazaŭsia pra pierśpiektyvy pryznańnia rasijskaj anieksii Kryma, pa sutnaści, namiaknuŭšy, što i ŭ samoj Rasii daloka nie dla ŭsich vidavočny status paŭvostrava.
«Kali apošni aliharch u Rasii pryznaje Krym i pačnie pastaŭlać tudy pradukcyju, za mnoj sprava nie zaržavieje. Choć mianie i mnohaje źviazvaje: Budapiešckaja dekłaracyja, moj podpis tam staić, ale ja i praz heta pierastuplu», — zajaviŭ jon.
Ale ŭžo ŭ listapadzie Łukašenka vykazaŭ škadavańnie ab tym, što prezident Rasii Uładzimir Pucin nie zaprasiŭ jaho ŭ Krym na pasiadžeńnie Vyšejšaj dziaržaŭnaj rady Sajuznaj dziaržavy.
