Polskija ŭłady adchilili miery, prapanavanyja Jeŭrapiejskaj kamisijaj (JEK) dla ŭrehulavańnia situacyi ź mihrantami na miažy ź Biełaruśsiu. Padaŭžeńnie terminaŭ rehistracyi i razhladu chadajnictvaŭ ab prytułku źjaŭlajecca kontrpraduktyŭnym, zajaviŭ pasoł Polščy pry Jeŭrapiejskim Sajuzie Andžej Sadaś. Na jaho dumku, praces pradastaŭleńnia prytułku mihrantam pavinien być całkam prypynieny.
U suviazi z napłyvam mihrantaŭ, pierš za ŭsio z krain Blizkaha Uschodu, la źniešnich miežaŭ ES ź Biełaruśsiu Jeŭrakamisija prapanavała Polščy, Litvie i Łatvii ŭvieści časovyja - na bližejšyja paŭhoda — miery dla palahčeńnia pracedury pradastaŭleńnia prytułku.
Jak paviedamlajecca ŭ pres-relizie JEK, apublikavanym 1 śniežnia, kali prapanova Brusela budzie pryniataja, u dziaržaŭ Jeŭrasajuza źjavicca mahčymaść pavialičyć termin rehistracyi prašeńniaŭ ab prytułak da čatyroch tydniaŭ zamiest ciapierašniaha, jaki składaje ad 3 da 10 dzion, pryčym na stroha vyznačanych pamiežnych kantrolna-prapusknych punktach. Heta dazvolić praviarać chadajnictvy niepasredna na miažy, pryčym praciahłaść usioj pracedury moža skłaści da 16 tydniaŭ.
Andžej Sadaś ličyć, što hetyja miery pryviaduć tolki da «praźmiernaj nahruzki» na Polšču, Łatviju i Litvu pry razhladzie chadajnictvaŭ ab prytułku.
«Jeŭrakamisija pryniała rašeńnie, całkam supraćlehłaje tamu, što my prapanavali, — skazaŭ jon. — My prapanavali, kab adkazam na hibrydnuju ataku była mahčymaść prypynieńnia pracedur pradastaŭleńnia prytułku, a nie padaŭžeńnia ich terminaŭ»..
