Były śpikier vierchniaj pałaty parłamienta i staršynia kalehii Jeŭrazijskaj ekanamičnaj kamisii Michaił Miaśnikovič ličyć, što sancyi stvarajuć umovy dla padjoma nacyjanalnaj ekanomiki.
Michaił Miaśnikovič
«U niejkaj stupieni sankcyi stvarajuć umovy dla ŭzdymu nacyjanalnych ekanomik. My pracujem u miežach sajuza i kanstatujem, što ŭzrastajuć abjomy ŭzajemnaha handlu, źjaŭlajecca ŭsio bolš sumiesnych kampanij.
Ciapier u miežach Jeŭrazijskaha ekanamičnaha sajuza dziejničaje 21 tysiača sumiesnych pradpryjemstvaŭ (pa stanie na červień 2021 hoda, — zaŭv. NN)— biełaruska-rasijskich, kazachstanska-biełaruskich, kazachstanska-rasijskich i inšych.
Heta vialikaja siła, vialikaja ŭdzielnaja vaha. My pahladzieli, što, u pryncypie, vałavy ŭnutrany pradukt kožnaj krainy ŭ dastatkova adčuvalnych praporcyjach farmirujecca za košt intehracyjnaha ŭkładu».
Namieśnik kiraŭnika administracyi prezidenta Dźmitryj Krutoj zajaviŭ, što raźvićcio ekanomiki Biełarusi navat va ŭmovach pandemii i sankcyj pakazvaje najlepšyja vyniki za apošnija 12 hadoŭ.
Dźmitryj Krutoj
«VUP vyras, pa biahučych danych, na 2,4%. Naturalna, asnoŭnym drajvieram, jak i na praciahu ŭsiaho hoda, zastavałasia pramysłovaść. Prykładna 70% hetaha pryrostu zabiaśpiečvaŭ mienavita pramysłovy kompleks. Na druhim miescy pa ŭkładzie IT-siektar. Astatnija haliny raźmierkavalisia bolš raŭnamierna».
Zusim inšaja rytoryka ŭ biełaruskich deputataŭ. Voś što zajaŭlaŭ Aleh Hajdukievič letam, kali ES pryniaŭ siektaralnyja sankcyi paśla pasadki samalota Rynair u Minsku.
«Sučasny śviet — heta hibrydnyja vojny. Adzin z elemientaŭ hibrydnaj vajny — heta sankcyi. U dačynieńni da našaj krainy jany ŭviedzienyja niezakonna, nasupierak lubym mižnarodnym normam».
Aleh Hajdukievič
Pryniali piaty pakiet sankcyj — i Hajdukievič užo bačyć plusy:
«Biełaruś bolš nikoli nie budzie abmiarkoŭvać unutrypalityčnuju paviestku ŭ krainie z kimści, i heta dobra. My narešcie prybrali z krainy NKA i arhanizacyi, jakija finansavalisia z-za miažy i pracavali na inšyja krainy, a nie na našu. My ŭzmacnili intehracyju z Rasijaj va ŭsich śfierach, heta ŭzmocnić našu dziaržaŭnaść. My stali vielmi aktyŭna abaraniać našy kaštoŭnaści i historyju».
Pry hetym Aleh Hajdukievič hučniej za ŭsich kryčyć u parłamiencie i na dziaržTB pra toje, što za zakliki da sankcyj treba pryciahvać da adkaznaści. Padtrymlivaje jaho były vajskovy funkcynier, deputat Aleh Biełakonieŭ, jaki taksama ličyć sankcyi elemientam hibrydnaj vajny:
Aleh Biełakonieŭ. Fota belvpo.com
«Siońnia suprać Biełarusi raźviazanaja šyrokamaštabnaja hibrydnaja vajna pa ŭsich napramkach. My pavinny być hatovyja da taho, što sproby destabilizacyi situacyi, prymianieńnie ŭsiaho arsienała hibrydnych vojn u krainie buduć praciahvacca. Pakolki takija dziejańni nakiravanyja na padryŭ palityčnaj stabilnaści, pieraškadžajuć ekanamičnamu raźvićciu našaj krainy, prajektam zakona miarkujecca ŭzmacnić kryminalnuju adkaznaść za dziejańni, nakiravanyja na pryčynieńnie škody nacyjanalnaj biaśpiecy krainy».
Siarhiej Siviec. Skrynšot ź videa ctv.by
«Heta nie novy artykuł Kryminalnaha kodeksa, jon dziejničaŭ i da hetaha, — udakładniaje deputat vierchniaj pałaty parłamienta Siarhiej Siviec. — Adnak sankcyjnyja miery, pryniatyja ŭ dačynieńni da našaj dziaržavy, vyklikali nieabchodnaść pierahladu jaho častak, kab sfakusavać uvahu na supraćpraŭnaści dziejańniaŭ u dačynieńni da našaj dziaržavy asobnych jurydyčnych i fizičnych asob, źviazanych mienavita z publičnymi zaklikami da prymianieńnia sankcyjnaj palityki. U pieršuju čarhu havorka idzie ab ekanamičnych sankcyjach, jakija pavinny paralizavać dziejańnie našaj ekanomiki, pastavić u žorstkija ŭmovy funkcyjanavańnie ajčynnych subjektaŭ haspadarki. My vydatna razumiejem nastupstvy padobnych dziejańniaŭ. Pa vialikim rachunku,
heta paralizacyja raboty viadučych subjektaŭ našaj krainy i, adpaviedna, niemahčymaść dziaržavy vykonvać svaje sacyjalnyja abaviazalnictvy pierad našymi hramadzianami: pracoŭnyja miescy, zarabotnaja płata, dapamoha, lhoty
— usio toje, što zamacavana ŭ Asnoŭnym zakonie».
Tym časam słovy Łukašenki piarečać zakłapočanaści deputataŭ Hajdukieviča, Siŭca i Biełakonieva. Jon zajaviŭ, što ŭron ad sankcyj dla ekanomiki Biełarusi — mizerny. Bolš za toje, pa jaho słovach, hety ŭron navat nichto nie padličvaŭ.
«Ja nie mahu skazać niejkija ličby hetaj škody, — adznačyŭ jon u razmovie z rasijskaj prapahandaj. — My sprabujem minimizavać (upłyŭ sankcyj, — zaŭv. NN). Naturalna, my niešta hublajem. Ale ŭ paraŭnańni z tym, jak my adpracavali hety hod, heta mizer.
Heta mizer, ja i nie daručaju ličyć, tamu što daražej budzie paličyć».
Mizer, jaki nichto nie choča padličvać. I ŭzmacnieńnie kryminalnaj adkaznaści za zakliki da sankcyj. A jašče prajekt biudžetu na 2022 hod farmujecca deficytnym.
Vyhladaje, što va ŭładzie levaja ruka nie viedaje, što robić pravaja. Ale pa tonie praŭładnych telehram-kanałaŭ składvajecca ŭražańnie, što novy pakiet sankcyj prychilniki Łukašenki buduć sustrakać novym łozunham: «A nam usio adno».
