Getty Images
Alpinist, jaho imia nie nazyvajecca, znajšoŭ mietaličnuju skrynku na ledniku na hary Manbłan u 2013 hodzie. Na pakiecikach z kaštoŭnaściami možna było pračytać nadpis «Zroblena ŭ Indyi», tamu francuzskija ŭłady mierkavali, što jany naležali kamuści z pasažyraŭ indyjskaha łajniera, jaki raźbiŭsia na Manbłanie bolš čym paŭstahodździa tamu.
Alpinist sumlenna, jak naležyć pa francuzskich zakonach, adnios znachodku ŭ palicyju i da hetaha času čakaŭ, ci znojducca svajaki ŭładalnika kaštoŭnaściaŭ.
Ale jany nie znajšlisia, i ciapier, pa prašeści vaśmi hadoŭ, ułady kamuny Šamani, dzie znachodzicca Manbłan, zhodna z zakonam, padzialili z alpinistam kaštoŭnaści napałovu. Kožnaja pałova kaštuje prykładna 150 tysiač jeŭra. Mer Šamani Eryk Furńje, raspavioŭšy pra heta ahienctvu Frans-Pres, jašče raz pachvaliŭ alpinista za zakonapasłuchmianaść.
Na Manbłanie ŭ minułym stahodździ raźbilisia dva indyjskija łajniery. U krušeńni ŭ 1950 hodzie zahinuli 48 čałaviek, u krušeńni 1966 hoda — 117 čałaviek.
Francuzskija ŭłady miarkujuć, što kaštoŭnaści vioz z saboj pasažyr druhoha łajniera, jaki lacieŭ z Bambieja (ciapier Mumbai) u Ńju-Jork.
Paśla tych dvuch krušeńniaŭ alpinisty mnohija hady čas ad času znachodzili na Manbłanie reštki bahažu i čałaviečyja pareštki.
U 2012 hodzie na schiłach hary byŭ znojdzieny miašok z dypłamatyčnaj poštaj ź Indyi. U im byli haziety 1966 hoda, kalendary i pryvatny list.
U avijakatastrofie 1966 hoda zahinuŭ siarod inšych baćka indyjskaj jadziernaj prahramy Chami Džechanhir Baba.
