Siarod raskručanych kartačnych błohieraŭ — kanał «Ramir Taro». Viadzie jaho chłopiec z Kijeva. Ramir zachapiŭsia taro jašče ŭ škole. Svoj jutub pačynaŭ z ahulnych prahnozaŭ dla ludziej pa znaku zadyjaka. A hod tamu pieraklučyŭsia na palityčnuju varažbu — zrazumieŭ, što heta źbiraje kudy bolš prahladaŭ. 

Z dapamohaj kart mužčyna šukaje adkazy pa situacyi ŭ Rasii, Ukrainie, ale čaściej pa Biełarusi. Naprykład, ci budzie intehracyja. Karty kažuć, što nie: abjadnańnie zastaniecca na ŭzroŭni razmoŭ, bo ŭ kahości z padpisantaŭ darožnych prahram (chutčej, u Pucina) zdaracca rezkija pieramieny.

Siarod apošnich papularnych videa — pra refierendum. Ramir navaražyŭ, što jon adbudziecca ŭ pačatku nastupnaha hoda i bolšaść ludziej nie pojdzie hałasavać. Choć karty rajać dziejničać.

«Na čale budzie stajać žančyna, jakaja ŭžo bačyć vynik. Karaleva kubkaŭ», — tłumačyć jon. Vidać, Jarmošyna adkładzie vychad na piensiju.

Pa prahnozie tarołaha, psavańnie biuleteniaŭ na vyniki nie paŭpłyvaje.

«Budzie razzłavanaść, pačućcio padmanutaści. Ale vynik budzie ŭ žorstkaj reakcyi z-za miažy», — zapeŭnivaje chłopiec.

Rabiŭ jon raskład i na sychod Łukašenki. Kaža, papiaredničać hetamu budzie maštabny zakonaprajekt, pra jaki ŭ chutkim časie abjaviać. Ale jon syhraje zły žart z Łukašenkam.

Epocha Łukašenki skončycca tym, što jon budzie ŭciakać, kali situacyja stanie krytyčnaj (pra toje, što čas nastaŭ, jamu paviedamiać špijony). Tak bačać karty. 

Jašče adna pradkazalnica z Ukrainy — ekstrasens Hanna Jafremava. «Dziasiatki maich praroctvaŭ, jakija tyčacca roznych krain śvietu, spraŭdzilisia na vašych vačach!» — zapeŭnivaje žančyna padpisčykaŭ. Jana kaliści ŭdzielničała ŭ bitvie ekstrasensaŭ na telekanale STB.

Varažyć Hanna na roznyja temy — kali źniknie karanavirus, ci budzie vajna pamiž Rasijaj i Ukrainaj. Nu i pra pryčyny razvodu sielebryci.

Ale ŭ topie vypuski pra palityku. Hod tamu ekstrasens pradkazvała, što źmianić uładu ŭ Biełarusi možna tolki siłaj. A na 2021 hod jaje karty pakazali, što Łukašenka budzie ŭtrymlivać svoj post lubymi mietadami.

«Jon vas nie addaść», — interpretavała ekstrasens.

Tarołah Junona svoj kanał zapuściła vyklučna dla palityčnych raskładaŭ 10 miesiacaŭ tamu. Sama jana ź Biełarusi. Aproč prahnozaŭ situacyi, žančyna hladzić los palitykaŭ.

Ci stanie Babaryka nastupnym prezidentam? Karty pakazali, što Babaryka abiare viarnucca da siamji, adkupicca, kab vyjści z turmy i bolš nie ŭdzielničać u vybarčaj honcy, bo čas upuščany.

U adnym z vypuskaŭ žančyna prahnazavała los Biełarusi na nastupnyja dva hady. Navaražyła, što chutka źniešnija siły daduć krainie šaniec. I narod dabjecca spraviadlivaści i znojdzie vyjście.

«Pucin — heta mah, jaki dapamahaje ŭtrymlivać uładu», — sčytvaje karty Junona. Ale, kaža, ničoha ŭ jaho nie atrymajecca. 

Jaje raskłady havorać, što restaratar Vadzim Prakopjeŭ u najbližejšyja piać hadoŭ moža stać meram Minska, a na refierendumie budzie toj vynik, jakoha choča Łukašenka.

Junona pytaje ŭ kart taksama pra staŭku refinansavańnia, abstaviny pierastrełki ŭ kvatery Zielcera i budučyniu asobnych palitviaźniaŭ.

Na temie Biełarusi chajpujuć i inšyja jutub-pradkazalniki. Čamu hetyja prahnozy tak papularnyja?

«Nie chaču abrazić tych, chto vieryć u mahičnyja rečy. Heta bazavaja źjava. Mahičny śvietapohlad dapamahaje nam u ciažkija chviliny.

Kali ty adčuvaješ adsutnaść siły, nie viedaješ, jak štości zrabić, kali ad ciabie ničoha nie zaležyć, to zastajecca tolki viera. Šmat čyńnikaŭ u žyćci, jakija my nie možam uličyć ci pra jakija nie viedajem. Voś ludzi i spadziajucca na Boha, los», — kaža psichołah Natalla Skibskaja. 

U tym, što ludzi padsieli na tarołahaŭ, jana nie bačyć ničoha strašnaha.

«Ciapier składana adčuvać nadzieju. Ale kab ruchacca, jana patrebnaja. Tamu možna abapiracca na niešta vonkavaje — niachaj heta buduć karty taro. Chaj ludzi hladziać, kali heta ich padmacoŭvaje.

Kaniečnie, šmat prahnozaŭ nie spraŭdžvajecca, ale ludzi šukajuć hlebu dla svajoj nadziei. Ludzi ž i ŭ carkvu dla hetaha chodziać, kab praciahvać vieryć i spadziavacca», — ličyć psichołah.

Клас
0
Панылы сорам
0
Ха-ха
1
Ого
0
Сумна
0
Абуральна
2