Usio pa akreścinskaj «kłasicy»: bieź pieradač, son na padłozie, načnyja pabudki
Anton (imia źmienienaje ŭ metach biaśpieki surazmoŭcy) raskazvaje, što ŭ kamiery, raźličanaj na čatyry čałavieki, ich było minimum 15 čałaviek. U pikavyja momanty kolkaść aryštantaŭ dasiahała 19-ci.
Chłopcy, zatrymanyja pa «palityčnych» artykułach KaAP, nie atrymlivali pieradač, ich nie vadzili ŭ duš i na špacyry. Spać prychodziłasia na hołych škonkach biez matracaŭ ci na padłozie. Budzili na pieraklički pa dva razy štonoč: a druhoj i čaćviortaj hadzinie.
«Mikałaja Bredzieleva i jaho siabra-advakata Alaksieja, jak ja viedaju, zatrymlivali razam i vielmi žorstka. Ich źbili, u kvatery truščyli techniku. Advakat byŭ siniušny: nohi ŭ siniakach, pajaśnica, siniak pad vokam».
Z Paŭłam Biełavusam i Andrejem Kuźniečykam Anton pabyŭ litaralna dzień. Pavieł, pa jaho słovach, trymaŭsia badziora, a Andrej pieršy čas znachodziŭsia ŭ napružanym stanie: jamu pahražali tym, što buduć čapać siamju, i jon za heta vielmi pieražyvaŭ.
Ilustracyjnaje fota
«U Kuźniečyka vybivali niejkija dostupy da administravańnia, jak ja zrazumieŭ. Akramia taho, sa mnoj apynuŭsia dyrektar IT-kampanii Aivitam Dźmitryj Dosaŭ, zatrymany nibyta za repost z «ekstremisckaha» telehram-kanała. Jaho, jak ja zrazumieŭ, fizična nie presavali. Uvohule ŭsie trymalisia dobra: my hulali ŭ «Mafiju», «Krakadziła». Usie imknulisia padtrymlivać adzin adnaho, nichto nie chnykaŭ», — havoryć Anton.
Kamiery pačali poŭnicca eks-naziralnikami z vybaraŭ
Surazmoŭca taksama adznačyŭ, što kali ŭ pačatku jaho terminu bolšaja častka sukamiernikaŭ była asudžanaja za raspaŭsiud ekstremisckich materyjałaŭ (19.11 KaAP RB), to paśla ŭ «chacie» pačało źjaŭlacca ŭsio bolš eks-naziralnikaŭ, jakija pracavali na apošnich vybarach.
«Pierad maim vypuskam takich było ŭ kamiery adrazu troje. Ich asudzili za niepadparadkavańnie supracoŭnikam milicyi (artykuł 24.3 KaAP), ale ničoha takoha, samo saboj, nie było», — raskazvaje Anton.
Čytajcie taksama:
Paŭłu Biełavusu prysudzili jašče siem sutak
Maci zatrymanaha pres-sakratara A1 Mikałaja Bredzieleva: «Mnie pišuć šmat słovaŭ padtrymki»
Žurnalista Andreja Kuźniečyka dahetul nie vyzvalili. Rodnyja i advakat nie viedajuć, dzie jon
