Pa infarmacyi MUS, navahodnija jołki naviedała kala sta tysiač čałaviek. Ad nieaściarožnaha abychodžańnia ź piratechnikaj u navahodniuju noč paciarpieła dzieviać čałaviek. Usio heta adbyłosia ŭ dvarach: pry hetym troje z paciarpiełych — niepaŭnaletnija, jašče troje byli ŭ stanie ałkaholnaha apjanieńnia. Usie traŭmy akazalisia lohkimi, i paśla atrymańnia miedycynskaj dapamohi ludzi viarnulisia dadomu.
U miescach masavaha śviatkavańnia Novaha hoda pažaraŭ nie zdaryłasia, ale ŭ damach, pačynajučy z novaha hoda, užo było zafiksavana 240 uzharańniaŭ. 38 biełarusaŭ pry hetym zahinuła. Siarod asnoŭnych pryčyn MNS nazyvaje paleńnie ŭ łožku i nieaściarožnaje abychodžańnie z ahniom u niećviarozym stanie.
Niespakojnaj praz hałalod była situacyja na darohach: za pieršyja dva dni Novaha hoda na trasach pamierli troje čałaviek, 32 atrymali ranieńni. Pry hetym supracoŭnikami DAI byli vyjaŭlenyja 162 niećviarozyja kiroŭcy.
Mašyny chutkaj dapamohi ŭ śviaty taksama pracavali ŭ režymie ŭzmocnienaj hatoŭnaści: tolki ŭ Minsku byli zadziejničanyja 11 asnoŭnych bryhad i 4 reziervovyja. Asnoŭnaja praca miedykaŭ tyčyłasia hałalodnych i choładavych traŭm — tolki za minułyja sutki ich naličyli 335. Bolš za ŭsio — u Viciebsku i vobłaści (119).
«Ahułam heta pakul «norma» — kala 300 hałalodnych i choładavych traŭm za sutki pa respublicy», — adznačyŭ načalnik adździeła arhanizacyi miedycynskaj abarony pry nadzvyčajnych situacyjach Minzdaroŭja Alaksandr Panciuchoŭ.
«Naša Niva» asobna dasłała na poštu Pres-centra pytańnie nakont abnoŭlenych źviestak pa fakcie śmierci žychara Rečycy Źmiciera Uschopava. Ale pradstaŭnik MUS Alaksandr Kupčenia amal paŭtaryŭ aficyjnuju zajavu Śledčaha kamiteta:
«Padzieja ŭ Rečycy, źviazanaja z zatrymańniem i dastaŭleńniem hramadzianina, jaki znachodziŭsia ŭ mocnaj stupieni apjanieńnia, sapraŭdy mieła miesca. Hramadzianin akazaŭ niepadparadkavańnie supracoŭnikam orhanaŭ unutranych spraŭ. Supracoŭniki dziejničali ŭ adpaviednaści ź dziejsnym zakanadaŭstvam.
Ciapier pa fakcie śmierci hramadzianina SK pravodzić pravierku, pryznačanyja patrebnyja ekśpiertyzy».
