Śviet pieramoža kavid
Raźvityja krainy dasiahnuli vialikich pośpiechaŭ u raspracoŭcy i vytvorčaści efiektyŭnych vakcyn, jakija dazvalajuć istotna skaracić śmiarotnaść ad karanavirusnaj infiekcyi. Bolš za toje, raspracoŭvajucca novyja i novyja mietady lačeńnia kavidu i navat tabletki.
Usio idzie da taho, što navat kali kavid i zastaniecca ŭ niejkim vyhladzie, to jon užo nie budzie takim niebiaśpiečnym, jak raniej. Prynamsi, u raźvitych krainach.
CNBC prahnazuje, što virus z časam stanie siezonnym, «endemičnym», nie takim surjoznym i budzie pieranosicca bolš lohka, zhadki pra jaho źniknuć na fonie štodzionnaha žyćcia. Tak užo było i z pandemijaj ispanskaha hrypu ŭ 1918 hodzie, i pandemijaj śvinoha hrypu ŭ 2009 hodzie.
Mahčyma, vakcynacyja ad kavidu stanie rehularnaj, kožny raz suprać novaha štamu, jak heta byvaje ź siezonnaj vakcynacyjaj suprać hrypu.
Bił Hiejts choča spadziavacca, što krytyčnaja faza pandemii zavieršycca ŭ 2022 hodzie i adbudziecca heta dziakujučy vakcynam.
«Ja spadziajusia, što praz paru hadoŭ vy budziecie dumać pra virus tolki ŭvosień, kali budziecie rabić ahulnuju vakcynu ad COVID i hrypu», — piša stvaralnik Microsoft.
Navat kali čałaviectva i pieramoža kavid, tak, jak było «da COVID-19», užo nie budzie. Hłabalny kryzis nazaŭždy źmianiŭ jak navuku, palityku i biznes, tak i štodzionnaje žyćcio.
Baraćba demakratyi i aŭtarytaryzmu
Adna z haračych tem — baraćba aŭtarytarnaha Kitaja i demakratyčnaha Zachadu za toje, čyja palityčnaja, ekanamičnaja i sacyjalnaja sistema najlepšaja.
Z adnaho boku, kitajskaja madel dla mnohich źjaŭlajecca alternatyvaj zachodniaj libieralnaj demakratyi. Kitaj praciahvaje demanstravać pośpiechi ŭ mnohich ekanamičnych aśpiektach, a taksama adnosna efiektyŭna zmahajecca z kavidam.
Z druhoha, u Kitai pad kiraŭnictvam Si Czińpina ŭzmacniajucca aŭtarytarnyja tendencyi, ekanomika prachodzić praz enierhietyčny kryzis, kitajskija hihanty nieruchomaści pieražyvajuć defołt.
Kitaj usio čaściej ustupaje ŭ kanfrantacyju sa źniešnim śvietam, kitajska-amierykanskija adnosiny nastolki napružanyja, što za handlovaj vajnoj niekatoryja ekśpierty čakajuć i haračuju. Toje, jak buduć raźvivacca adnosiny dźviuch krain u 2022 hodzie, i budzie vyznačać asnoŭnyja trendy ŭ mižnarodnaj palitycy.
Bolšaść ekśpiertaŭ prahnazuje, što adnosiny pamiž krainami palapšacca nie buduć.
«Ja liču, što hetaja napružanaść pamiž Kitajem i ZŠA zachavajecca ŭ 2022 hodzie, u tym liku ŭ halinie pravoŭ čałavieka, hieapalityki i biaśpieki», — skazaŭ Vu Cian, palityčny ahladalnik ź Piekina.
U Złučanych Štatach mocna raźjadnanyja demakraty i respublikancy. Ale adzinaje pytańnie, u jakim jany całkam salidarnyja — žorstkaja pazicyja adnosna Kitaja.
U Piekinie Si Czińpin rychtujecca da dalejšaha ŭmacavańnia svajoj ułady padčas partyjnaha źjezdu ŭ kastryčniku. Tamu Kitaj taksama nie budzie hatovy iści na kampramisy.
«Mahčyma, užo ŭ 2022 hodzie kiraŭnik Kitaja Si Czińpin paličyć palityčna metazhodnym pasprabavać zachapić Tajvań: moža być, usiaho niekalki jaho nievialikich vyspaŭ, a moža być, i hałoŭny vostraŭ», — ličyć ekśpiert amierykanska-kitajskich adnosin Ajzek Stoŭn Fiš.
Suśvietny rost cen praciahniecca
Tatalny rost cen budzie adnym z hałoŭnych vyprabavańniaŭ 2022 hoda. Užo ŭ 2021 hodzie suśvietnyja ceny na pradukty dasiahnuli histaryčnych maksimumaŭ.
Kałasalna vyraśli ceny na pryrodny haz u Jeŭropie, što paciahnie za saboj rost cen i ŭ inšych halinach vytvorčaści, dzie vykarystoŭvajucca enierharesursy.
Prablema z deficytam kampjutarnych čypaŭ i ich vysokaha koštu taksama naŭrad ci budzie vyrašanaja ŭ 2022 hodzie.
Adnoj z hałoŭnych pryčyn vysokaj inflacyi ŭ śviecie staŭ kryzis hłabalnaha łancužka pastavak. Heta kryzis, padčas jakoha praz pandemiju COVID-19 zamarudzilisia hłabalnyja łancužki pastavak i pieravozki, što vyklikała rost cen i deficyt roznych tavaraŭ pa ŭsim śviecie, a taksama paŭpłyvała na strukturu suśvietnaha spažyvańnia.
«My pradbačym, što kavid i jaho novyja varyjanty buduć praciahvać parušać pracu partoŭ i abmiažoŭvać pradukcyjnaść pracy ŭ 2022 hodzie», — kaža vykanaŭčy dyrektar kampanii Container xChange Kryścijan Rułafs.
Zboi ŭ hłabalnych łancužkach pastavak mohuć praciahvacca da druhoj pałovy 2022 hoda, havorycca ŭ spravazdačy strachavoj kampanii Euler Hermes.
Euler Hermes spasłałasia na novyja ŭspyški virusa, palityku Kitaja pa baraćbie z kavidam i pieraboi ŭ handli padčas kitajskaha Novaha hoda.
Miery pa strymlivańni kavidu mohuć paŭpłyvać na vytvorčyja i transpartnyja apieracyi, paharšajučy kryzis u łancužku pastavak. Analityki raniej papiaredžvali, što novy varyjant, amikron, moža nanieści jašče adzin udar pa łancužkach pastavak. Ale hety chaos u łancužku pastavak, chutčej za ŭsio, asłabnie ŭ druhoj pałovie 2022 hoda.
Dystancyjnaja praca stanie novaj realnaściu
Z pačatkam pandemii mnohija rabotniki pierajšli na dystancyjnuju pracu. Heta stała mahčymym dziakujučy raźvićciu takich internet-siervisaŭ, jak Zoom i Google Meet.
Z adnaho boku, karancinnyja abmiežavańni i praca z domu dazvolili strymać kavid, zrabić pracu ludziej bolš hnutkaj i niezaležnaj ad miesca. Ź inšaha boku, dystancyjnaja praca maje kałasalnyja niedachopy: ludzi, što pracujuć z doma, pačali pierapracoŭvać, im stała ciažka raźmiežavać pryvatnaje i pracoŭnaje žyćcio, jany pačali stračvać sacyjalnyja navyki i mienš ruchacca.
Mnohija bujnyja pracadaŭcy chacieli b, kab ichnija rabotniki viarnulisia na pracu. Mahčyma, 2022 hod projdzie pad markaj viartańnia ŭ ofisy prahramistaŭ, markietołahaŭ, buchhałtaraŭ i inšych. Prynamsi, častkovaha viartańnia, u hibrydnym režymie, kali častku pracy rabotniki buduć rabić z domu, častku — u ofisie.
Ź inšaha boku, uźnikaje šmat pytańniaŭ: jakim budzie hety hibrydny režym, jakuju častku rabotniki buduć pravodzić u ofisie, a jakuju — doma, jak ludziej zaachvocić źjaŭlacca ŭ ofisie, što rabić z novymi ŭspyškami kavidu i hetak dalej.
Voś što płanujuć rabić u 2022 hodzie najbujniejšyja kampanii.
Amazon abviaściła, što pakidaje za asobnymi mieniedžarami prava vyrašać, ci buduć jaje karparatyŭnyja supracoŭniki viartacca ŭ ofis i ź jakoj pieryjadyčnaściu.
Apple u siaredzinie śniežnia pieraniesła viartańnie rabotnikaŭ u ofis na niavyznačanuju datu. Technałahičny hihant raniej płanavaŭ zrabić heta 1 lutaha. Apple zaachvočvaje supracoŭnikaŭ prachodzić vakcynacyju, a taksama adkryvaje ofisy dla tych, chto stamiŭsia pracavać z domu.
Facebook dazvalaje tym, chto moža vykonvać svaju pracu dystancyjna, rabić heta ŭvieś čas, i nie płanuje abaviazvać prychodzić u ofis. Kampanija patrabuje ad svaich supracoŭnikaŭ vakcynavacca.
Google spačatku płanavała, što ludzi viernucca ŭ ofis da 10 studzienia, ale potym adkłała hetaje rašeńnie. Zaraz tam pracujuć pa hibrydnaj madeli (častkova doma, častkova ŭ ofisie).
Twitter dazvalaje supracoŭnikam, jakija mohuć vykonvać svaju pracu dystancyjna, praciahvać pracavać ź luboha miesca. Kali rabotnik choča pracavać z ofisa — vakcynacyja abaviazkovaja.
Baraćba z technałahičnymi hihantami
Usio idzie da ŭzmacnieńnia cisku na technałahičnyja hihanty z boku dziaržaŭnych rehulataraŭ. Technałahičnyja karparacyi pačali zajmać niepraparcyjna vysokuju dolu ŭ suśvietnaj ekanomicy, źbirać i nazapašvać big data (vialikija danyja) u kamiercyjnych i palityčnych metach, što moža ŭ pierśpiektyvie pryvieści da źniščeńnia dobrasumlennaj kankurencyi i manapalizacyi ŭsioj ekanomiki niekalkimi hihantami.
Tamu vialikija hulcy (ZŠA, ES, Kitaj, Indyja, Rasija i inšyja) buduć staracca jašče bolš zarehulavać dziejnaść technałahičnych hihantaŭ, bo jany pahražajuć nie tolki ekanamičnaj stabilnaści, ale i demakratyi.
Pieršyja kroki ŭ hetym kirunku ŭžo zrabiŭ Kitaj, čakajecca, što i zachodnija krainy pasprabujuć ucichamiryć technałahičnyja kampanii.
Rob Rajch, prafiesar palitałohii Stenfardskaha ŭniviersiteta miarkuje, što ŭ 2022 hodzie ŭ ZŠA voźmucca za rehulacyju technahihantaŭ. Prafiesar čakaje, što prymuć novyja zakony, jakija abaviažuć bujnyja kampanii być bolš prazrystymi dla niezaležnych daśledčykaŭ i hramadskaści ŭ pytańni raboty ałharytmaŭ sacsietak.
Taksama prafiesar pradkazvaje, što dziaržava zojmiecca achovaj pryvatnych danych na zakanadaŭčym uzroŭni, a demakratyčnyja krainy naładziać bolš ciesnuju kaardynacyju ŭ halinie techničnaha rehulavańnia.
Nas čakaje novaja kaśmičnaja honka
Technałahičny partał Cnet miarkuje, što ŭ 2022 hodzie nas čakaje novaja kaśmičnaja honka.
Kitaj i Rasija supracoŭničajuć u stvareńni bazy na Miesiacy da 2030 hoda, a taksama ŭ vysadcy robata na asteroid (u 2024 hodzie).
NASA znoŭ vykazałasia pra svaje ambicyi adnavić paloty čałavieka na Miesiac.
Buduć praciahvać raźvivacca pryvatnyja kaśmičnyja kampanii i kaśmičny turyzm. SpaceX, Blue Origin i Virgin Galactic adpravili turystaŭ u kosmas u 2021 hodzie, i hety trend budzie tolki narastać u 2022 hodzie.
U 2022 hodzie SpaceX płanuje zapuścić svaju šmatrazovuju rakietu i kaśmičny aparat Starship ŭ palot.
Iłan Mask skazaŭ: «Heta vialikaja revalucyja. Nikoli raniej nie isnavała całkam šmatrazovaj arbitalnaj rakiety-nośbita. Heta fundamientalny praryŭ, nieabchodny čałaviectvu dla taho, kab stać kaśmičnaj cyvilizacyjaj».
Tym časam kampanii SpaceX StarLink i Blue Origin, a taksama prajekt Amazon Kuiper zapuściać tysiačy nizkaarbitalnych spadarožnikaŭ u atmaśfieru ŭ 2022 hodzie. Jany zabiaśpiečać płanietu chutkim i tannym internetam, chacia i stvorać novyja prablemy — z kaśmičnym śmiećciem. Mikraspadarožniki buduć pieraškadžać prafiesijnym astranomam i amataram hladzieć na zornaje nieba, a kaśmičnaje śmiećcie moža stać novym jabłykam razładu ŭ adnosinach dziaržaŭ.
Viartańnie spartyŭnych spabornictvaŭ
Sioleta adbuducca dźvie znakavyja spartyŭnyja padziei: zimovaja Alimpijada ŭ Piekinie i Čempijanat śvietu pa futbole ŭ Katary. Jany pakažuć, ci ačuchaŭsia prafiesijny sport ad udaraŭ pandemii, jakaja ŭ 2020 hodzie sapsavała arhanizataram, spartsmienam i hledačam usie płany.
Nahadajem, praz pandemiju była pieraniesienaja takijskaja alimpijada i futbolny Čempijanat Jeŭropy. Navat tyja turniry, jakija praciahvali prachodzić, časta byli biez adnaho z hałoŭnych atrybutaŭ sportu — hledačoŭ i zaŭziataraŭ. U 2022 hodzie vialiki sport pasprabuje viarnuć uvahu publiki.
Pikantnaści dadaje toje, što daŭno palityčnyja spabornictvy nie byli nastolki palityzavanymi, jakimi jany buduć u 2022 hodzie.
Zimovaja alimpijada budzie prachodzić u aŭtarytarnym Kitai, jaki zaraz znachodzicca ŭ žorstkim klinčy z zachodnim śvietam, i kraina budzie maksimalna imknucca vykarystać Alimpijadu ŭ metach prapahandy, kab pakazać ułasnuju pieravahu nad Zachadam.
Čempijanat śvietu pa futbole — 2022 taksama budzie adnym z samych skandalnych, na fonie karupcyjnaha skandału ź pieradačaj Kataru pravoŭ na praviadzieńnie hetaha spartyŭnaha spabornictva. Heta budzie samy darahi čempijanat śvietu, jaki kaštavaŭ krainie kala 200 miljardaŭ dalaraŭ, a taksama, pavodle haziety The Guardian, zabraŭ žyćci tysiač ludziej na budoŭlach.
Hazieta źviartaje ŭvahu, što Kitaj i Katar buduć vykarystoŭvać prestyžnyja spartyŭnyja spabornictvy dla adbielvańnia i lehitymizacyi svaich aŭtarytarnych režymaŭ i adciahvańnia ŭvahi ad parušeńnia pravoŭ čałavieka. Jak heta rabiŭ Hitler padčas bierlinskaj Alimpijady — 1936.
Nahadajem, Kitaj rehularna krytykujuć za niehumannaje internavańnie musulman-ujhuraŭ u kancentracyjnyja łahiery, pahrozy Tajvaniu i sproby ŭstanavić tatalny palityčny i hramadski kantrol nad Hankonham. Niekatoryja zachodnija krainy admovilisia adpraŭlać na piekinskuju alimpijadu svaich aficyjnych pradstaŭnikoŭ — čynoŭnikaŭ, chacia spartsmieny na Alimpijadu pajeduć.
Prablemy z pravami čałavieka ŭźnikajuć i ŭ Katary. Heta i abmiežavańnie svabody vykazvańnia mierkavańniaŭ, i prymusovaja praca, i kryminalizacyja adnapołych adnosin, i adsutnaść adkaznaści za hvałt u adnosinach da žančyn i mienšaściaŭ.
2022 hod daść adkaz na pytańnie, ci zmoža vialiki sport viarnuć uvahu publiki ŭ pastkavidnyja časy, a taksama ci zmoža jon ačyścicca ad karupcyjnych składalnikaŭ.
Mižnarodnaja fiederacyja łyžnaha sportu pačała pravierku, čamu biełaruskich łyžnic adchilili ad spabornictvaŭ
