Rasterminoŭka pa 500

U rasterminoŭku možna znajści kvateru ŭ jašče nie zdadzienaj novabudoŭli. Šukajem tannyja varyjanty. Takija ciapier prapanuje, naprykład, «Minsk Śviet». U ich jość prahrama rasterminoŭki da piaci hadoŭ. Minimalny pieršapačatkovy ŭznos — 30%, astatniuju sumu raskidajuć paroŭnu na ŭvieś čas. 

Ale jość niuans: cana kvadratnaha mietra pry rasterminoŭcy vyšejšaja, čym pra pakupcy adrazu. Naprykład, adnuška ŭ domie, jaki sioleta zdajecca, płoščaj 31,4 «kvadrata» kaštuje 37,7 tysiačy dalaraŭ. A pry pakupcy ŭ rasterminoŭku — 46 tysiač. Adrazu treba vykłaści 13,8 tysiačy dalaraŭ, a paśla kožny miesiac addavać pa 537 dalaraŭ. 

Pierapłata — 8,3 tysiačy, ci 22% ad zvyčajnaha koštu.

Kredyt i šalonyja pierapłaty

U asnoŭnym kredyty na žyllo vydajuć ciapier pad 20-21%. Voźmiem dla padliku «Biełarusbank» (tam staŭka 21%). Ujavim, što nam treba ŭziać u kredyt 20 tysiač dalaraŭ. Aformim ich na 10 hod. Pry takim varyjancie ŭ miesiac daviadziecca płacić ad 520 da 170 dalaraŭ. U vyniku vy pierapłacicie 105% — heta bolš za 21 tysiaču dalaraŭ. 

Kali ŭ doŭh atrymajecca ŭziać 30 tysiač dalaraŭ, to pa pracentach za ich daviadziecca viarnuć amal 32 tysiačy (heta akramia asnoŭnaj sumy).

Kali ŭ zabudoŭščyka jość banki-partniory, to jany mohuć dać kredyt na bolš vyhadnych umovach. Naprykład, u «Bielinviestbanku» heta 18,23% (a padčas ilhotnaha pieryjadu, zvyčajna heta hod, staŭka — ad 12,87%).

U kredyt možna aformić da 90% koštu žylla. Pahasić doŭh možna daterminova, štrafaŭ za heta nie budzie.

Aformim kredyt u 20 tysiač dalaraŭ na 10 hod i atrymajem takuju karcinu. Pieršy hod płacim u siarednim pa 370$ na miesiac, druhi — pa 430$ (i dalej z kožnym hodam mienš). Pierapłata za ŭvieś čas składzie 17,3 tysiačy dalaraŭ, heta amal 87%.

Z sumaj u 30 tysiač dalaraŭ pierapłata budzie 26 tysiač.

U zhadanych kredytach niefiksavany pracent — adzin pryviazany da staŭki refinansavańnia, druhi — da staŭki aviernajt. Kali jany vyrastuć, pavialičycca i suma vypłat.

Paraŭnoŭvajem z arendaj

U siarednim arenda adnuški ŭ stalicy kaštuje 220 dalaraŭ (pa źviestkach ahienctva «Tvaja stalica»). Heta značna mienš, čym pieršapačatkovyja vypłaty pa kredycie. Ale praz vosiem hod sumy zraŭniajucca, i arenda budzie daražejšaj, čym viartańnie doŭhu banku. Tak atrymlivajecca, kali brać kredyt na 20 tysiač dalaraŭ.

Kali suma pazyki ŭ 30 tysiač, miesiačnyja vypłaty banku ŭvieś čas buduć bolšyja za canu arendy. Ahułam za 10 hod arendy vy addaścio 26,4 tysiačy dalaraŭ. 

Heta, kaniečnie, teoryja. Jana nie ŭličvaje rost cen na arendu kvater, indyvidualnyja lhoty na žyllo, daterminovaje pahašeńnie krydytaŭ, źmieny pracentnych stavak.

«Bankam nie cikava adbirać kvatery, jany lepš daduć rasterminoŭku»

«Tańniej ciapier zdymać, heta dakładna, — kaža ekśpiert pa rynku nieruchomaści Natalla Litoŭskaja. — Ale lepš kuplać, bo apłačvaješ svajo. I potym sa svajho nie vyhaniać.

Navat kali na niejki čas budzie pravał u finansach, bank daść rasterminoŭku płaciažu. Bankam nie cikava adbirać kvatery (mnohija kredyty patrabujuć majomaści ŭ zakład. — «NN»). Heta nie ich profil — pierapradavać žyllo».

Jość adzin łajfchak pa kredytach. Mnohija ź ich možna hasić daterminova. Tamu, kali vy ŭziali kredyt, dzie pieršy hod pracenty mienšyja, čym paśla, lepš u hety pieryjad pastaracca viarnuć banku jak maha bolš rubloŭ. Bo pracenty naličvajuć na tuju sumu doŭhu, jakaja zastajecca.

«Štomiesiačny płaciož pa kredycie nie pavinien pieravyšać 40% dachodaŭ siamji. Kali dachod maleńki, składana raźličvać na narmalnuju sumu ŭ doŭh. Ciapier kredyty biaruć na 5-20 tysiač dalaraŭ u ekvivalencie», — dzielicca nazirańniami ekśpiert.

Na sajcie adnaho z bankaŭ možna raźličyć maksimalnuju sumu, jakuju daduć u kredyt. Tak, kali siamiejnaja para na dvaich zarablaje 2000 rubloŭ na miesiac, to im u kredyt na 20 hod mohuć prapanavać da 25 tysiač dalaraŭ. 

Partniorskija kredyty z bankami vyhadnyja i samim zabudoŭščykam.

«Łohika takaja: kali čałaviek moža dakredytavacca na dvušku na 10 tysiač dalaraŭ, zabudoŭščyk budzie trymać canu na 10 tysiač vyšejšaj. Źniknie mahčymaść dakredytoŭvacca — daviadziecca źnižać canu, padładžvacca pad płaciežazdolnaść.

Mnohija ŭvodziać rasterminoŭki, pryviazanyja da valuty. U rasterminoŭku ŭklučanaje padaražeńnie mietra. Heta jak kredyt ad zabudoŭščyka ŭ valucie, ale pad 2-4% hadavych.

Nie paŭsiul budzie vialikaja pierapłata. U adnym z prajektaŭ rasterminoŭka pavialičvaje canu mietra na 30 dalaraŭ. Heta padarunak. I harantyja dla zabudoŭščyka, što jon svajo ŭ valutnym ekvivalencie atrymaje, niachaj i praz čatyry hady», — zaŭvažaje Natalla Litoŭskaja.

Čytajcie taksama:

U Biełarusi i Minsku kvatery pradajuć i kuplajuć jak nikoli raniej za 10 hadoŭ

Ad 42 tysiač dalaraŭ za adnapakajoŭku. Na aŭkcyjon vystavili hatovyja kvatery ŭ roznych rajonach Minska

Jak adjezd tysiačaŭ biełarusaŭ adbiŭsia na rynku žylla?

Клас
0
Панылы сорам
0
Ха-ха
0
Ого
0
Сумна
0
Абуральна
0