Pakul DAI raźbirałasia z kiroŭcam, pjany ŭłaśnik BMW sieŭ za rul — zahinuŭ pasažyr taksi
Sakavik 2011 hoda. Nočču ŭ centry Minska sutyknulisia BMW i Volkswagen. Apošni aŭtamabil vykarystoŭvaŭsia jak taksi. U momant zdareńnia tam znachodziŭsia 19-hadovy pasažyr, jaki nie byŭ pryšpileny ramianiom biaśpieki. Ad udaru junak vylacieŭ z sałona i zahinuŭ.
Jak paviedamlała DAI, kiroŭca BMW prajechaŭ na čyrvonaje śviatło. U momant zdareńnia jon byŭ pjany — u mužčyny vyjavili kala dvuch pramile ałkaholu.
Padałosia, paśla DTZ vinoŭnik navat nie razumieŭ, što adbyłosia. Jaho adkazy na pytańni, zafiksavanyja na videa, vyhladali nieadekvatnymi situacyi. U pryvatnaści, jon śćviardžaŭ, što nie bačyŭ, na jakoje śviatło prajechaŭ.
Samaje dziŭnaje, što za niekalki chvilin hety BMW spynili na płoščy Pieramohi (u kvartale ad miesca zdareńnia). Za rulom znachodziłasia žančyna. Pry sabie ŭ jaje nie było paśviedčańnia kiroŭcy, i supracoŭniki DAI prapanavali prajści ŭ słužbovy aŭtamabil.
U hety čas ułaśnik mašyny znachodziŭsia ŭ sałonie BMW. Kažuć, što padychodziŭ da inśpiektaraŭ, niešta pytaŭsia, a potym sieŭ za rul i daŭ pa hazach. Za im adrazu ž pajechaŭ aŭtamabil DAI, ale siedan spynić nie paśpieli.
Hety vypadak zdaryŭsia nie ŭ vyniku pieraśledu, ale maje pramoje dačynieńnie da dziejańniaŭ milicyi. Voś łahičnyja pytańni, jakija paŭstajuć: čamu vidavočna pjany čałaviek zastaŭsia ŭ aŭtamabili biez kantrolu? Jak zdaryłasia, što jon mieŭ dostup da kluča zapalvańnia?
Kiroŭca BMW byŭ asudžany amal na piać hod źniavoleńnia. Jaho taksama pazbavili na taki ž termin paśviedčańnia kiroŭcy.
Imknuŭsia źjechać ad patrula i ŭrezaŭsia ŭ słup
Amal usie pahoni pačynajucca z typovaj situacyi: kiroŭca ihnaruje sihnały DAI i imkniecca źjechać. U dadzienym vypadku navat jość videazapis padziejaŭ z samaha pačatku.
Sprava adbyvałasia ŭ Minsku ŭ 2018-m. Bačna, jak kiroŭca Opel spačatku sprabuje padmanuć, nakiroŭvajučysia ŭ skrazny dvor, a paśla nabiraje chutkaść, časam praskokvajučy na čyrvonaje śviatło i vyjazdžajučy na «sustrečku».
Na vulicy Daŭhabrodskaja jon zrabiŭ pamyłku, dapuściŭščy zanos — aŭtamabil urezaŭsia ŭ słup. Kiroŭca zahinuŭ na miescy zdareńnia (paźniej u jaho znajšli ałkahol).
U sałonie znachodziłasia kampanija junakoŭ, jakija atrymali traŭmy i byli dastaŭlenyja ŭ balnicu. Jany śćviardžali, što paznajomilisia z ułaśnikam aŭtamabila za niekalki hadzin da DTZ.
Zdavałasia b, sprava nie patrabuje abmierkavańnia, adnak u vyniku ŭłasnaj pamyłki zahinuŭ małady čałaviek. Siamja, siabry stracili blizkaha, jaki moh by prynosić karyść hramadstvu.
Z adnaho boku, pakidać biez uvahi ihnaravańnie sihnałaŭ DAI niapravilna. Z druhaha — ci varta milicejskaja pryncypovaść takoha vyniku? A što, kali b kiroŭca prosta źjechaŭ? Što daje presinh čałavieka, jaki hatovy hruba parušać praviły darožnaha ruchu? U čym metazhodnaść?
Na hetyja pytańni ciažka znajści adnaznačnyja adkazy. Ale niekatoryja śpiecyjalisty ŭ halinie biaśpieki darožnaha ruchu ličać: časam lepš kiroŭcu adpuścić, čym pravakavać ciažkija nastupstvy. Adnak u toj ža čas vypracavać miechanizm pryciahvańnia da adkaznaści, kali jaho možna vyklikać na razmovu ŭ spakojnych abstavinach.
Zrazumieła, što havorka idzie pra libieralizacyju, jakuju zaraz ujavić amal niemahčyma. Ale ž pryjdzie čas…
Pa słovach śviedkaŭ, chłopiec na Mitsubishi rezka pačaŭ ruch, a paśla trapiŭ u DTZ
Jašče adna padobnaja situacyja. Vosieńniu 2017-ha hoda Mitsubishi ŭrezaŭsia ŭ słup na praśpiekcie Dziaržynskaha ŭ Minsku. Udar byŭ taki mocny, što aśviatlalnaja mačta ŭpała, a aŭtamabil zahareŭsia. Małady kiroŭca zahinuŭ na miescy zdareńnia.
Pa słovach śviedkaŭ, da hetaha aŭtamabil spynili supracoŭniki milicyi, ale kiroŭca admoviŭsia vychodzić z sałona i rezka pačaŭ ruch.
U DAI ž paćvierdzili, što Mitsubishi prajechaŭ na zabaronieny sihnał śvietłafora, na što źviarnuli ŭvahu dziažurnyja PPS.
Zaraz užo ciažka skazać, što mienavita spravakavała chłopca na niebiaśpiečnyja dziejańni. Adnak heta zdareńnie znoŭ uźniało ŭ hramadstvie pytańnie ab ałharytmie dziejańniaŭ pry spynieńni aŭtamabila z patencyjnym parušalnikam PDR.
U mnohich krainach Zachadu kiroŭca paśla spynieńnia palicyjaj pavinien zahłušyć ruchavik i pakłaści ruki na rul. Miechanizm dziejańniaŭ u takich vypadkach u Biełarusi dahetul detalova nie apisany.
Kiroŭca, jakoha pieraśledavali, zahinuŭ, jašče dva čałavieki paciarpieli
Bolšaść pieraśledaŭ z trahičnymi vynikami adbyvajecca ŭ bujnych haradach. Dakładniej, pra ich čaściej stanovicca viadoma. Bo jość padazreńni, što infarmacyja ab niekatorych vypadkach nie traplaje ŭ publičnuju prastoru. A voś zdareńnie, pra jakoje pojdzie havorka nižej, było zafiksavana ŭ Vaŭkavysku ŭ 2015-m hodzie i atrymała vialiki rezanans.
Dniom ekipaž DAI atrymaŭ paviedamleńnie, nibyta kiroŭca Kia moža znachodzicca ŭ ałkaholnym stanie. Sproby spynić aŭtamabil ni da čaho nie pryviali: mužčyna, jaki znachodziŭsia za rulom krasoviera, ihnaravaŭ zakliki praz hučnahavaryciel i inšyja sihnały.
Na adnym ź pierakryžavańniaŭ Kia sutyknuŭsia z BMW. Siedan adkinuła ŭ bok i jon urezaŭsia ŭ pryvatny dom, prałamaŭšy płot. Kiroŭca krasoviera zahinuŭ. A dva čałavieki z BMW paciarpieli i byli dastaŭlenyja ŭ balnicu.
Słušnaja zaŭvaha nakont taho, što pjany kiroŭca — heta apryjory niebiaśpieka. Tak, ale ž pieraśled u horadzie naŭrad ci minimizuje ryzyku. Naadvarot! Padčas pahoni abodva baki znachodziacca ŭ niaprostym emacyjnym stanie. Vierahodnaść pamyłki pavialičvajecca ŭ niekalki razoŭ. A dla kiroŭcy, jakoha pieraśledujuć, padčas pahoni jak by zdymajucca ŭsie ŭmoŭnaści ŭ vyhladzie PDR, kali jon užo vyrašyŭ nie spyniacca.
Achviaraj staŭ supracoŭnik DAI
Časam zdarajecca tak, što achviarami aŭtaavaryjaŭ, jakija zdarajucca padčas pahoni, stanoviacca sami supracoŭniki DAI. Taki vypadak byŭ zafiksavany ŭ 2018-m hodzie ŭ Homieli.
Dvoje inśpiektaraŭ DPS patrulavali na słužbovych matacykłach. Jany zaŭvažyli bajk marki Honda biez rehistracyjnaha numaru i pačali pieraśled. Kiroŭca nie spyniŭsia, a tolki paskoryŭsia.
Padčas pahoni adzin z supracoŭnikaŭ DAI sutyknuŭsia z Nissan. Aŭtamabil ruchaŭsia ŭ tym ža napramku i vykonvaŭ razvarot. Paśla ŭdaru słužbovy matacykł zahareŭsia. Inśpiektara špitalizavali, ale jon pamior u reanimacyi.
Matacyklista na Honda u chutkim časie znajšli. Pa fakcie zdareńnia była raspačata kryminalnaja sprava.
Zrazumieła, što heta prafiesijnaja ryzyka dla supracoŭnika DAI, ale pytańnie toje ž: ci varta było spyniać parušalnika PDR takoj canoj?
Dziaržaŭnaja hazieta raźmieściła tendar na kuplu aŭto. Vyhladaje tak, što zajaŭka napisana pad kankretny krasovier
Minčuk pakataŭ siabra na samakacie, toj upaŭ i pamior. Ciapier samakatčyku pahražaje da troch hod kałonii
U brusielskim mietro mužčyna śviadoma šturchnuŭ žančynu pad koły ciahnika. Vyratavała reakcyja mašynista
