Fota sa staronki ŭ Fejsbuku Uładzimira Hramy
Da apošniaha času Uładzimir Hrama vystupaŭ u restaranie ŭ rodnym Homieli, pasłuchać jaho prychodzili miascovyja prychilniki. Kažuć, kłasna vykonvaŭ Razenbaŭma. Tonka adčuvaŭ džaz, dobra śpiavaŭ Łui Armstranha, byŭ amataram habrejskaha falkłoru, piša kp.ru.
U prajekcie Siarohi
Uładzimir Hrama byŭ u zornym składzie hurta repiera Siarohi časoŭ «Čornaha bumiera». Užo tady Vałodzia važyŭ kala 200 kiłahramaŭ i svaim vyhladam adrazu pryciahvaŭ uvahu. Pry hetym jon byŭ vielmi talenavity, vydatna hraŭ na bajanie, kłavišnych, hitary, pierkusii.
Mnohija viadomyja kalektyvy klikali Hramu ŭ svoj skład. Ale siabry kažuć, što pry ŭsich talentach Uładzimira, u jaho zusim adsutničała hanarystaść. Jon moh by stvaryć svoj prajekt, pajści ŭ «Hołas» i začaravać tam usich nastaŭnikaŭ, ale kožny raz, kali jamu heta prapanoŭvali, jon kazaŭ: «A navošta?». Navat u nacyjanalnym adbory na «Jeŭrabačańnie» jon pahadziŭsia ŭdzielničać u składzie trya Sweater Boys nie tamu, što chacieŭ pajechać na konkurs, a za kampaniju.
Z Dženifier Łopes. Fota z sacsietak Uładzimira Hramy
Z hetaj hrupaj źviazanaja historyja, jakuju ŭspaminajuć dahetul mnohija. Padčas pryjezdu ŭ Minsk Dženifier Łopes biełaruskija chłopcy vyrašyli zrabić siurpryz zorcy suśvietnaj vieličyni i sustreli jaje pierad uvachodam u haścinicu — Uładzimir Hrama byŭ z bajanam, vykonvali jaje śviežy na toj čas sinhł Goin in. Džej Ło była nastolki začaravanaja, što pačała padtancoŭvać.
Taksama śpiavaŭ Hrama z «Buranaŭskimi babulami» dla filma «Biełyja Rosy. Viartańnie». U filmie lidar-vakałam hučyć jaho hołas.
Hrama siabravaŭ z mnohimi biełaruskimi muzykami. Jaho bajan možna pačuć u pieśni «Dzieści» J:Mors. Va Uładzimira Puhača, lidara J:Mors, była ideja zrabić sumiesny etna-prajekt, ale, na žal, jon nie ažyćciaviŭsia ŭ siłu roznych abstavinaŭ.
Mnohija muzyki ŭ sacsietkach uspaminajuć Uładzimira ciopłym słovam:
«Nie stała blizkaha mnie čałavieka… Vova Hrama byŭ fantastyčna talenavity. I kali jon dasiahnuŭ zavobłačnych karjernych viaršyniaŭ, to vyklučna tamu, što byŭ kazačna dobrym čałaviekam. Śpi, rodny čałaviek», — napisaŭ pra jaho Uładzimir Puhač.
«Nie stała majho siabra Vałodzi Hramy. Pryhožaha, dobraha čałavieka i unikalnaha muzyki. Vielmi ciažka ŭ heta pavieryć. Hramik, BIG-G, Voŭčyk. Ty zaŭsiody budzieš z nami. Tvoj hołas i tvaja muzyka. Ty toj, chto zaŭsiody prychodziŭ na dapamohu. Ty i jość adno vialikaje ciopłaje serca. Škada, što jano bolš nie bjecca….R.I.P.», — napisaŭ Maksim Sapaćkoŭ, jaki taksama vystupaŭ u hurcie Siarohi.
