Fota: DELFI / Domantas Pipas.
Kiraŭnica litoŭskaha ŭrada — adzin z tych jeŭrapiejskich palitykaŭ, chto aktyŭna tłumačyć nieabchodnaść baraćby za demakratyju i raspaviadaje pra mietady aŭtakratyj. Pohlady Šymanicie pryviali jaje krainu na miažu ideałahičnaj vajny nie tolki z Rasijaj, ale i z Kitajem, piša Guardian.
Šymanicie kaža, što ciapier my staim pierad vyklikam, anałahičnym tamu, što mieŭ miesca ŭ 1938 hodzie. I palityk tłumačyć, jak treba stavicca da takoha vykliku:
«Niejtralnaść dapamahaje pryhniatalniku i nikoli [nie dapamahaje] achviary».
Litoŭski palityk ličyć, što dla Zachada ciapier vielmi važna nie ŭpadać u samakrytyku, unutranyja razłady i samazadavolenaść.
Jak kaža Šymanicie, pieršy patrebny adkaz — nie bajacca i adkryta vykazvacca, bo
«my nikoli nie bačym na vulicach natoŭpy ludziej, jakija b patrabavali bolš aŭtakratyi».
Kiraŭnica litoŭskaha ŭrada tłumačyć raźmiaščeńnie rasijskich vojskaŭ u Biełarusi palityčnaj słabaściu Alaksandra Łukašenki:
«Paśla vybaraŭ i demanstracyj u žniŭni 2020 hoda Łukašenka nie maje vybaru ŭ svaich dziejańniach. Raniej jon padładžvaŭsia da ES i vypuskaŭ niekatorych viaźniaŭ za hrošy. Jon vykarystoŭvaŭ hetuju dvajnuju stratehiju, ale ž jon nie moža heta bolš rabić. Nichto nie razhladaje jaho, jak lehitymnaha ŭ Biełarusi. Jamu patrebnyja hrošy i dapamoha Rasii, kab vyžyć. Jon ad ich zaležyć».
Na dumku Šymanicie, kali rasijskaja armija i zbroja zastanucca na biełaruskaj ziamli, heta vykliča naroščvańnie prysutnaści NATA ŭ rehijonie i źmienić raskład sił u bałtyjskich krainach i Uschodniaj Jeŭropie. Takija dziejańni aljansa buduć nie pravakacyjaj, a reakcyjaj na padziei na ŭłasnaj miažy.