Sierdar Bierdymuchamiedaŭ ciapier zajmaje pasadu vice-premjera va ŭradzie krainy. Faktyčna heta pasada kiraŭnika ŭrada, bo premjera jak takoha ŭ Turkmienistanie niama, prezident kiruje tam usim, u tym liku i ŭradam. 

Darečy, sam Hurbanhuły Bierdymuchamiedaŭ pierad tym, jak u kancy 2006 hohda ŭznačaliŭ Turkmienistan paśla niečakanaj śmierci papiarednika Saparmurata Nijazava (Baćki Turkmienaŭ — Turkmienbašy), taksama byŭ vice-premjeram.

Kali hety tranzit ułady ŭ Turkmienistanie ŭdasca pravieści bieź nijakich prablem — a pakul što ništo nie pakazvaje na toje, što hetyja prablemy mohuć uźniknuć, — to heta stanie

druhim vypadkam na postsavieckaj prastory, kali viarchoŭnaja ŭłada pieradajecca dyktataram u spadčynu nie prosta pierajemniku, a rodnamu synu. I pieršym — kali takoje robicca samim jašče prynamsi vonkava dziejazdolnym kiraŭnikom.

Pieršy vypadak byŭ daŭno, amal 20 hadoŭ tamu. Tady, u 2003 hodzie, ułada pierajšła ŭ spadčynu ad baćki da syna ŭ Azierbajdžanie. 80-hadovy Hiejdar Alijeŭ pieradaŭ jaje ŭ ruki svajmu tady 41-hadovamu synu Ilchamu, jaki zastajecca la styrna krainy i dahetul. Ale tam heta rabiłasia vymušana i śpiecham, bo Alijeŭ-starejšy ciažka zachvareŭ i byŭ faktyčna niazdolny vykonvać svaje abaviazki. Kazali navat, i kažuć dahetul, što jon moh i pamierci jašče da taho, jak tranzit adbyŭsia, tolki pra śmierć da pary nie paviedamlali. Prynamsi, apošnija miesiacy žyćcia žyvoha Hiejdara Alijeva hramadstvu nie pakazvali.

Patencyjna mahčymy varyjant pieradačy ŭłady ad baćki da syna byŭ by ŭ Uźbiekistanie i Kazachstanie. Miascovyja aŭtarytarnyja pravadyry Isłam Karymaŭ i Nursułtan Nazarbajeŭ stvaryli takija sistemy, pry jakich heta było b całkam łahična. Ale ni adnamu, ni druhomu nie pašancavała z naščadkami mužčynskaha połu: i Karymaŭ, i Nazarbajeŭ mieli tolki dačok. I choć tyja dočki taksama adyhryvali značnuju rolu ŭ hramadska-palityčnym žyćci svaich krain, na pierajemnic, vidać, nie nadavalisia. Usio ž taki ŭ musulmanskich i dastatkova tradycyjanalisckich krainach hiendarny faktar dahetul vielmi važny.

Nieŭzabavie možna čakać, što zachoča pieradać uładu synu i ŭžo taksama niemałady, 69-hadovy prezident Tadžykistana Emamali Rachmon, jaki kiruje hetaj krainaj z 1992 hoda. Va ŭsialakim razie, jahony starejšy syn Rustam Emamali ciapier aktyŭna prasoŭvajecca na vysokija dziaržaŭnyja pasady, z 2020 hoda jon staršynia vierchniaj pałaty miascovaha parłamienta. Vybary tam, praŭda, pa kalendary jašče nie chutka, tolki ŭ 2027 hodzie. Ale i ŭ Turkmienistanie niekaha «vybirać» nibyta pavinny byli tolki ŭ 2024-m. 

Užo robić kroki, kab pasada kiraŭnika krainy zastałasia ŭ rukach jahonaj siamji, i 60-hadovy Ilcham Alijeŭ. Z 2017 hoda pasada 1-ha vice-prezidenta — u jahonaj žonki Miechryban. Ale heta, vidać, na ŭsialaki vypadak, bo jość u Alijeva i syn, jakoha pa dziedu nazvali Hiejdaram. Adnak jon jašče małady, jamu tolki 25 hadoŭ. I baćka jašče budzie imknucca kiravać, pakul jon ubiarecca ŭ siłu. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?