19-hadovaja hamialčanka zaraz dvojčy padumaje, pierš čym napisać štości ahidnaje pra svaich supiernic.
Dziaŭčyna pryznanaja vinavataj u paklopie na byłych adnakłaśnic. Ale da kryminalnaja adkaznaści jaje nie pryciahnuli z‑za skančeńnia termina daŭnaści.
Hod tamu ŭ Hienprakuraturu RB pastupiła zajava žycharki h. Homiela, u jakoj jana ŭkazała, što ŭ 2006 hodzie jaje byłaja adnakłaśnica
na staroncy homielskaha sajta gomelchat.com stvaryła ankietu pad imionami «Šluški_Homiela» i «šluchiispodvorotni», raźmiaściŭšy na joj fatazdymki traich adnakłaśnic, ich imiony i numary mabilnych telefonaŭ.Jana ŭkazała ŭ hetaj ankiecie źviestki pra mahčymaść akazańnia imi pasłuh seksualnaha charaktaru. U dalejšym jana nieadnarazova pierapisvałasia z usimi, chto adhukaŭsia. Dziaŭčatam pačali pastupać zvanki. Tady ich baćki źviarnulisia ŭ milicyju, jakaja znajšła stvaralnicu ankiet.
U dačynieńni da abvinavačanaj była zaviedzienaja kryminalnaja sprava pavodle artykuła 188 «Paklop». Jana pryznała fakt stvareńnia ankiety, ale vinavataj siabie nie pryznała: maŭlaŭ, prosta pažartavała.
U zajavie taksama było ŭkazana, što sud Čyhunačnaha rajona h. Homiela vynies apraŭdalny prysud ŭ adnosinach da stvaralnicy ankiety, a kasacyjnaja kalehija pa kryminalnych spravach Homielskaha abłasnoha suda pakinuła prysud bieź źmienaŭ.
Asnoŭnym arhumientam suda było toje, što internet na momant razhladu spravy ŭ sudzie nie źjaŭlaŭsia srodkam masavaj infarmacyi.
Paśla ŭvažlivaha razhladu materyjałaŭ spravy i detalovaha analizu nacyjanalnaha i zamiežnaha zakanadaŭstva Hienprakuraturaj RB byŭ vyniesieny pratest ŭ paradku nahladu, u jakim pryviedzienaja arhumientacyja niepravamiernaści sudovych pastanoŭ.
Viarchoŭny Sud RB pryznaŭ racyju Hienprakuratury i zadavoliŭ pratest, admianiŭšy prysudy suda Čyhunačnaha rajona h. Homiela i Homielskaha abłasnoha suda. Sprava była pieradadzienaja na novy razhlad.
U vyniku rašeńniem suda Čyhunačnaha rajona h. Homiela 19‑hadovaja hamialčanka pryznana vinavataj ŭ raspaŭsiudzie ŭ siecivie Internet paklopnickaj infarmacyi.Adnak ad kryminalnaj adkaznaści jana była vyzvalenaja ŭ suviazi sa skančeńniem terminu daŭnaści spravy.
Artykuł 188 Kryminalnaha kodeksu RB «Paklop» praduhledžvaje pakarańnie da 3 hadoŭ pazbaŭleńnia svabody.
