Kiraŭniki Jeŭrakamisii i Jeŭrapiejskaj rady nazvali toje, što adbyłosia 21 lutaha ŭ Maskvie, parušeńniem mižnarodnaha prava i terytaryjalnaj cełasnaści Ukrainy, a taksama pryhrazili novymi sankcyjami.
Hienieralny sakratar NATA Jens Stołtenbierh napisaŭ u Twitter: «Ja asudžaju pryznańnie Rasijaj «DNR» i «ŁNR» va Ukrainie. Heta razburaje namahańni pa vyrašeńni kanfliktu i parušaje Minskija pahadnieńni. NATA padtrymlivaje suvierenitet i terytaryjalnuju cełasnaść Ukrainy. My zaklikajem Maskvu spynić raspalvańnie kanfliktu i vybrać dypłamatyju».
Premjer-ministr Vialikabrytanii Borys Džonsan skazaŭ, što pryznańnie samaabvieščanych respublik z boku Rasii — parušeńnie mižnarodnaha prava, parušeńnie suvierenitetu i terytaryjalnaj cełasnaści Ukrainy, admova ad minskaha pracesu i minskich pahadnieńniaŭ.
Ułady roznych krain Jeŭrasajuza adreahavali na rašeńnie Maskvy vyrazna niehatyŭna. Pavodle MZS Danii, heta vidavočna varožaje rašeńnie.
Rašuča nastrojenyja krainy Bałtyi i Polšča, jakija i raniej aktyŭna padtrymlivali Ukrainu. Łatvija zaklikała nieadkładna ŭvieści sankcyi suprać Rasii. Staršynia Siejma Litvy Viktoryja Čmilicie-Nilsen zajaviła, što inicyjuje rezalucyju ab tym, kab źmiena statusa Danbasa nie budzie nikoli pryznanaja. Premjer Polščy Matevuš Maraviecki zaklikaŭ terminova sklikać pasiadžeńnie Jeŭrapiejskaj rady i nakłaści na Rasiju sankcyi za pryznańnie «ŁNR» i «DNR».
Turcyja nie pryznaje «ŁNR» i «DNR» i ličyć dziejańni Rasii parušeńniem terytaryjalnaj cełasnaści Ukrainy. Adpaviednaje paviedamleńnie źjaviłasia na sajcie MZS Turcyi.
Urad Japonii sumiesna z ZŠA płanuje ŭvieści finansavyja sankcyi ŭ dačynieńni da RF i spynić u Rasiju ekspart paŭpravadnikoŭ u Rasiju. Taksama Japonija płanuje prypynić ekspart vysokatechnałahičnaj pradukcyi z vykarystańniem štučnaha intelektu.
«Rašeńnie Pucina pa Danbasie całkam mianiaje suśvietny paradak», — zajaviŭ prezident Sierbii Alaksandr Vučyč. I dadaŭ, što ŭ Sierbiii «jość 85% hramadzian, jakija, što b ni zdaryłasia, jak by ni buduć na baku Rasii. I heta fakty, ź jakimi ja jak prezident Respubliki sutykajusia». Sierbskamu kiraŭnictvu daviadziecca jašče rabić vybar, i jon jaŭna niaprosty.
Jość i takija krainy, kiraŭnictva jakich prymaje bok Maskvy biez vahańniaŭ i ahavorak. Nadzvyčaj zaležny ad padtrymki Rasii lidar Siryi Bašar Asad adrazu paviedamiŭ, što Damask budzie hatovy pryznać «ŁNR» i «DNR». Naturalna, nie mahli pryniać inšaha rašeńnia i hetakim ža čynam pryznanyja Rasijaj Paŭdniovaja Asiecija i Abchazija.
Taksama zajavili pra namier pryznać «DNR» i ŁNR» łacinaamierykanskija sajuźniki Maskvy — Vieniesueła, Nikarahua i Kuba. Jość u jaje i bolš ekzatyčnyja klijenty — prychilniki ruchu chusitaŭ u Jemienie, za jakimi staić Iran.
Alaksandr Łukašenka pakul što nijakich aficyjnych zajaŭ pa Danbasie nie rabiŭ, ale jamu, uličvajučy tatalnuju ciapierašniuju zaležnaść ad Maskvy i najaŭnaść na terytoryi Biełarusi rasijskich vojskaŭ, adkrucicca budzie ciažka.
