Uładzimir Zialenski. Kałaž: Liga.net

Rehularnaść

Patreba ŭ infarmacyi padčas bajavych dziejańniaŭ nie mienšaja, čym u praduktach charčavańnia albo zbroi. Ludzi prahnuć viedać, jak źmianiajecca stan rečaŭ na froncie, jak pavodzić siabie ŭ nadzvyčajnych situacyjach dyj prosta jak aceńvać palityku kiraŭnikoŭ, što vyrašajuć los krainy. Razumieńnie hetaha pryviało Zialenskaha da farmavańnia infarmacyjnaha kanviejera: ledźvie nie kožnyja dźvie hadziny ŭkraincy atrymlivajuć apdejty ad klučavych fihur urada. Sam prezident dvojčy na dzień źviartajecca da nasielnictva z bolš emacyjnym zvarotam, u astatni ž čas jaho namieśniki raspaviadajuć pra humanitarnyja kalidory, pośpiechi ZSU na froncie, ekanamična-sacyjalnyja manieŭry dy vyniki mižnarodnych pieramoŭ.

Dastupnaść

U časy Druhoj Suśvietnaj vajny saviecki narod čakaŭ paviedamleńniaŭ ad Infarmbiuro i zatojvaŭ dychańnie, ledźvie čuŭ hołas Levitana. Ciapier ukraincam navat iści da televizara nie treba: apieratary mabilnych sietak abjadnalisia, kab zabiaśpiečvać nacyjanalny roŭminh. I tamu ŭładalniki navat samych słabieńkich smartfonaŭ lohka daznajucca hałoŭnyja naviny ź pieršych vusnaŭ.

Usie klučavyja pradstaŭniki štaba Zialenskaha praz aficyjnyja staronki ŭ sacsietkach pastajanna vychodziać na suviaź z hramadstvam. Chtości, jak prezident ci jaho bližejšyja daradcy, zapisvajuć videa — i tym samym jašče i abviarhajuć fejki pra toje, byccam jany ŭciakli z krainy albo nie pracazdolnyja. Inšyja pakidajuć padrabiaznyja spravazdačy pra svaje dasiahnieńni ŭ Fejsbuku. A tyja, kamu praściej kamunikavać praz Telehram, navat u abłozie tranślujuć karotkija vizualnyja paviedamleńni, harantujučy pramuju suviaź z aŭdytoryjaj.

Važna adznačyć: vyklučna Ukrainaj kamanda Zialenskaha nie abmiažoŭvajecca. Daradcy prezidenta, ministry, mery haradoŭ pahadžajucca tłumačyć situacyju ŭ krainie ŭsiamu śvietu. Tamu dajuć intervju jak bujnym zamiežnym telekampanijam, tak i rehijanalnym miedyja. Heta nie tolki dazvalaje pašyryć achop aŭdytoryi, ale i vyklučaje mahčymaść luboha skažeńnia infarmacyi.

Hłabalnaść

Ukraina trymaje nieparušny infarmacyjny front, chacia pry vielizarnaj kolkaści miedyja i kankurencyi ŭnutry śfiery heta padavałasia niemahčymym jašče kolki tydniaŭ tamu.

Tym nie mienš štab Zialenskaha apieratyŭna abjadnaŭ klučavych hulcoŭ, što adkryła jamu kanał kamunikacyi ź ludźmi, jakija aryjentujucca vyklučna na telebačańnie.

Kansalidacyi dapamahli nie tolki ščylnyja stasunki samoha prezidenta z toj ža płatformaj «1+1» (jana raspaŭsiudžvała pradukcyju «Kvartała» achvotniej za inšych), ale i prapanavanaja kancepcyja. Piać najbujniejšych viaščalnikaŭ raspačali bieśpierapynny 24-hadzinny infarmacyjny marafon, dzie słova pieradajecca sa studyi ŭ studyju.

Dziakujučy hetamu klučavyja miedyjabrendy i ich tvary atrymlivajuć roŭnyja efirnyja doli, zastajucca paznavalnymi i zavajoŭvajuć maksimalnuju łajalnaść. To-bok pracujuć na pieramohu praz zachavańnie rejtynhu. Heta zadavalniaje ŭsich — i natchniaje na jakasnuju pracu.

Adaptyŭnaść

Navat niaprofilnyja infarmacyjnyja aktyvy Ukraina siońnia vykarystoŭvaje ź vielizarnym plonam. Skažam, spartyŭny partał OTT-płatformy «Miehoho» chaj i zachavaŭ bazavy kantent, ale nadaje jamu patryjatyčnuju afarboŭku. Da taho ž padčas efiraŭ jon ažyćciaŭlaje zbor srodkaŭ na patreby ZSU. Hieroi zabaŭlalnych šoŭ kštałtu Mašy Jefrasininaj sfakusavalisia na prakole rasijskaj infarmacyjnaj burbałki i daniasieńni da kaleh pa cechu dy prostych ludziej infarmacyi pra sapraŭdnyja maštaby trahiedyi. Viadomyja muzyki — naprykład, TNMK — stvarajuć adukacyjny kantent pra toje, kab jak maha praściej davieści nasielnictvu samu sutnaść histaryčnaj hodnaści dziaržavy.

Tady jak kinastudyi zamiest sieryjałaŭ dajuć u pradakšn roliki dla dziaciej, dzie maksimalna prostaj movaj tłumačacca padziei ŭ krainie, kab padtrymać u małych farmavańnie nacyjanalnaj identyčnaści. Pa sutnaści, ciapier zabaŭlalnaja industryja pieratvaryłasia ŭ niaspynny kanviejer, što dazvalaje ludziam pieraklučycca ź ciažaru vajennych navin na niešta bolš pazityŭnaje. Adnak pry hetym paradak dnia «nakryvaje» ŭsie płasty hramadstva i pa ŭzroście, i pa sacyjalnych katehoryjach.

Uciahnutaść

Zrabić ułasny ŭniosak u pieramohu siońnia moža kožny ŭkrainiec — pra heta ŭvieś čas nahadvajuć tamtejšyja miedyja. I havorka nie tolki ab pracy ŭ tyle ci dałučeńnie da ZSU na pieradavoj. Zaŭvažyć pierasoŭvańni akupantaŭ, praduchilić maradziorstva praz paviedamleńni palicyi, raspavieści pra patreby bajcoŭ terytaryjalnaj abarony albo ludziej u bambaschoviščach — nievialički pieralik spraŭ, što pa siłach zrabić navat piensijanieru.

I tamu da hłabalnaha infarmavańnia dałučajecca luby ŭładalnik telefona albo płanšeta. Dalej źviestki raspaŭsiudžvajuć telehram-kanały, što pieratvarylisia ŭ samastojnyja ŚMI.

Jak vynik, luby zakid rasijskaj prapahandy maksimalna chutka abviarhajecca prufami samich udzielnikaŭ padziej. Bolš za toje, ahulnaja sprava i razumieńnie jaje važnaści jadnaje žycharoŭ Ukrainy ŭ zmahańni. A kali-nikali navat daje mahčymaść z humaram raspaviadać pra vajennyja budni.

Dla paraŭnańnia pryhadajem, što zrabiła Rasija za minułyja try tydni ŭ śfiery kamunikacyi.

Vystupy prezidenta Pucina — adzinočnyja i zapisanyja papiarednie — zapomnilisia badaj što absurdnym žanhliravańniem histaryčnymi faktami dy kaspłejem Nea z «Matrycy» pry karystańni mikrafonam. Ad situacyjnych pramoŭ ministra zamiežnych spraŭ Łaŭrova ciahnuła naftalinam z-za rytoryki savieckich časoŭ dy štampaŭ, jakimi poŭnilisia što vystupy na mižnarodnaj arenie, što zvaroty da ŭłasnaha naroda. «Na inšyja krainy my napad nie płanujem. My i na Ukrainu nie napadali», — adna tolki vytrymka sa śpičaŭ palityka, jakaja kaža sama za siabie.

I tolki aficyjny pradstaŭnik ministerstva abarony Rasii Ihar Kanašankaŭ imknuŭsia imitavać burlivuju dziejnaść na rehularnaj asnovie. Ale amal kožnaja ź jaho zajaŭ ci to nie prachodziła fakt-čekinh, ci to zusim nie patrabavała pravierki z-za absurdnaści pasyłaŭ. Zhadać chacia b abvinavačvańni ZŠA ŭ finansavańni vajenna-bijałahičnaj prahramy na terytoryi Ukrainy albo zajavy pra nievykarystańnie sałdat terminovaj słužby ŭ śpiecapieracyjach.

Zrazumieła, što pakinuć za saboj miedyja-front — nie značyć pieramahčy ŭ vajnie. Adnak toje, jakim čynam ukrainskija ŭłady arhanizavali pracu na hetym napramku, dajuć peŭny aptymizm adnosna dasiahnieńniaŭ i ŭ sumiežnych halinach. 

Ad šoumena da lidara nacyi. Jaki šlach prajšoŭ Uładzimir Zialenski

Łukašenka pra Ukrainu: Vałodzia Zialenski vypadkovy čałaviek, ukrainskija vajskoŭcy sami paprasili Rasiju vyratavać Krym, va ŭkrainskaj armii fašyzm

Клас
0
Панылы сорам
0
Ха-ха
0
Ого
0
Сумна
0
Абуральна
0