Ukrainski abaronca Maryupala. Fota: Mścisłaŭ Čarnoŭ, AP.
Vajna pačynałasia z bravurnych zajavaŭ ab «demilitaryzacyi i denacyfikacyi Ukrainy». Za hetymi pryhožymi słovami chavaŭsia namier zachapić niezaležnuju dziaržavu razam sa stalicaj i rasčlanić na niekalki maryjanietkavych utvareńniaŭ typu «DNR» i «ŁNR». Rasijskaja prapahanda trubiła ab chutkim padzieńni Kijeva, a prezident Pucin asabista zaklikaŭ ukrainskuju armiju da źviaržeńnia zakonnych uładaŭ krainy, jakija pa jaho słovach, składajucca z «narkamanaŭ i nieanacystaŭ».
Minuŭ amal miesiac ad pačatku «śpiecapieracyi», a rasijskija vajskoŭcy ŭsio jašče nie majuć nijakich dasiahnieńniaŭ, jakija b usprymalisia ichnym hramadstvam jak pieramoha. Rasijskija vojski zdoleli zaniać tolki adzin abłasny centr Ukrainy — ahrarny Chierson. Prasoŭvańnie rasijskich vojskaŭ spyniłasia amal na ŭsich kirunkach, a varvarskija abstreły haradoŭ nie stolki zastrašyli ŭkrainskaje hramadstva, kolki mabilizavali suśvietnuju hramadskuju dumku. U hetych umovach źmianiłasia i rytoryka aficyjnych ŚMI ŭ RF. U fokusie ŭvahi zastaŭsia Maryupal — vialiki pramysłovy horad na poŭdni Danieckaj vobłaści,
U siońniašnim artykule, apublikavanym rasijskim dziaržaŭnym ahienctvam RIA «Naviny» hety horad nazyvajecca «klučom da pieramohi», a padziei vakoł jaho charaktaryzujucca jak pierałomny momant «rasijskaj śpiecapieracyi».
Paviedamlajecca, što rasijskija vojski razam z «siłami DNR» kvartał za kvartałam biaruć horad pad kantrol.
Asada Maryupala praciahvajecca 23 dni, i anałahičnyja śćvierdžańni možna pračytać u luby z hetych dzion. Niezvyčajna vialikaja kolkaść kvartałaŭ jak dla horada z nasielnictvam u 460 tysiač. Navat niezrazumieła, dzie chavajucca abaroncy, kolkaść jakich aŭtar aceńvaje ŭ «10 tysiač dobra ŭzbrojenych tankami i artyleryjaj čałaviek».
«Praciahvajecca evakuacyja nasielnictva ŭ vyzvalenych rajonach Maryupala. Vajskoŭcy, vałanciory vyvodziać cyvilnych asobaŭ, heta padzielena na niekalki etapaŭ» — cytujucca ŭ artykule słovy «kiraŭnika DNR». U artykule adznačajecca, što «nacyjanalisty pieraškadžajuć evakuacyi» i na siońniašni momant tolki 10% žycharoŭ horada pakinuła zonu bajavych dziejańniaŭ. Ci aznačaje heta, što rasijskija vojski kantralujuć akurat 10% Maryupala?
Bambiožka radzilni i teatra nazyvajucca fejkami «cierpiačaha vajennuju parazu kijeŭskaha režymu».
«Vyzvaleńnie Maryupala adkryje pramuju suchaputnuju darohu ŭ Krym, pierarezanuju ŭ 2014-m. Heta značna spraścić transpartavańnie cyvilnych i vajskovych hruzaŭ. U pierśpiektyvie naładzicca i pasažyrskaje spałučeńnie. I pieraškodzić hetamu ŭ Kijevie ŭžo nie zdolejuć. Pa ziamli ŭkrainskim vojskam siudy bolš nie dabracca. Jak i pa vadzie, bo Azoŭskaje mora faktyčna stanie ŭnutranym vadajomam Rasii», — piša aŭtar artykuła.
Padobna, što zaciaty adpor ukraincaŭ vymusiŭ Kreml pierahledzieć płany, i ciapier jany sapraŭdy razhladajuć zachop Maryupala jak toj punkt, paśla jakoha možna budzie zajavić hramadstvu, što «mety vajny dasiahnutyja».
U mirny čas Maryupal — bujny pramysłovy horad, vyhodna raźmieščany na ŭźbiarežžy Azoŭskaha mora, klučavy centr ekspartu ŭkrainskaj stali, vuhalu i kukuruzy, jakija iduć pakupnikam na Blizkim Uschodzie i za jaho miežami. Strata Maryupalu moža stać surjoznym udaram pa ŭkrainskaj ekanomicy.
Čamu nie adbyŭsia šturm Adesy
Jak vyhladaje razbomblenaja kvatera zabitaha ŭ Charkavie 95-hadovaha viaźnia Buchienvalda FOTA
Što spynić Pucina, čamu rasijskija vojski nie šturmujuć Kijeŭ i navošta rujnujuć Maryupal — raspaviadaje ŭkrainski vajenny ekśpiert
