Bajcy na pazicyi ŭ Irpieni pad Kijevam. Fota: AP / Vadim Ghirda
Łukašenkaŭcy vycisnuli za miažu dziasiatki tysiač svaich palityčnych praciŭnikaŭ, spadziejučysia takim čynam adnavić kantrol nad hramadstvam i spynić pratesty ŭnutry krainy. Takim čynam za miažoju apynułasia masa pakryŭdžanych sistemaj ludziej, hatovych abjadnoŭvacca.
Jak stała viadoma «Našaj Nivie», na siońnia isnujuć jak minimum čatyry bajavyja hrupy biełarusaŭ, jakija ŭžo ŭdzielničajuć u bajavych dziejańniach na baku Ukrainy ci znachodziacca ŭ stadyi farmiravańnia.
Častka ich prachodzić navučańnie ŭ vučebnych centrach, arhanizavanych pa standartach NATA. Vielmi imavierna, što prynamsi adno padraździaleńnie atrymaje ŭzbrajeńnie, niedastupnaje łukašenkaŭskaj armii.
Samaje raśpijaranaje padraździaleńnie — heta bataljon imia Kastusia Kalinoŭskaha. Ale ź im jość niuansy.
Kiraŭnictva bataljona — heta biełarusy, jakija prajšli škołu ŭkrainskaha pałka «Azoŭ», viadomaha svajoj efiektyŭnaściu na poli boju, ale jaki maje i nieadnaznačnuju reputacyju.
Na dniach niekalki ŭzvodaŭ bataljona Kalinoŭskaha zdali zbroju Nacyjanalnaj hvardyi, u jakuju ŭvachodzić «Azoŭ», kab pierajści ŭ padparadkavańnie Uzbrojenych sił Ukrainy (ukrainskaja abrevijatura — ZSU). Imavierna, toje samaje zrobić rešta bataljona.
«Z ZSU ty padpisvaješ kantrakt, atrymlivaješ harantyi na vypadak ranieńnia ci śmierci, vypłaty jak vajskoviec, lepšuju zbroju i hetak dalej», — kaža nam adzin ź biełarusaŭ.
Pytańnie ab pieravodzie kalinoŭcaŭ u ZSU rubam pastavili ŭkrainskija śpiecsłužby. Tryhieram, pa słovach našaha surazmoŭcy, stała zajava kalinoŭcaŭ ab namiery bataljona ŭdzielničać u praryvie błakady Maryupala.
«A chto pasłaŭ ich u Maryupal? Terytaryjalnaja abarona Kijeva — u Maryupal? Chto pryniaŭ hetaje rašeńnie? Heta było ŭspryniata jak prajava atamanščyny, jakuju ŭkrainskaje kamandavańnie imkniecca vykaranić», — tłumačać «Našaj Nivie» abaznanyja krynicy.
Takija patrabavańni vystaŭlajucca i inšym, niebiełaruskim dobraachvotnickim farmiravańniam, jakija ŭźnikli ŭ napružanyja momanty pieršych tydniaŭ vajny i stali adzinkami bieź jasnaj prynaležnaści.
Mienšaje pa kolkaści farmiravańnie biełarusaŭ sabranaje «azoŭcam» Siarhiejem «Malutam» Karatkich, čałaviekam sa składanym minułym i reputacyjaj.
U jaho składzie jość biełaruskija futbolnyja fanaty. Jany bazujucca ŭ Kijevie i ŭdzielničajuć u bajavych dziejańniach.
Jašče adna hrupa biełarusaŭ słužyć u terytaryjalnaj abaronie Adesy — niekalki dziasiatkaŭ.
Samaj ža značnaj hrupoŭkaj biełarusaŭ moža stać bataljon, jaki ciapier farmirujecca i kaściak jakoha składajuć byłyja bajcy siłaŭ śpiecyjalnych apieracyj Biełarusi. Padparadkoŭvacca jon maje internacyjanalnamu lehijonu ŭ składzie Uzbrojenych siłaŭ Ukrainy. Publičnaj infarmacyi pra jaho pakul niama.
Hetyja ludzi prachodziać śpiecyjalnuju padrychtoŭku i majuć dobraje ŭzbrajeńnie — navat strałkovaja zbroja ŭ ich 5,56 mm, a nie 5,45 mm.
Jość padstavy mierkavać, što hetaje padraździaleńnie atrymaje sučasnuju zbroju, jakaja jość va ŭkrainskaj armii i jakaja «nie śniłasia vajskoŭcam u Biełarusi», kaža naš surazmoŭca.
Ukrainskija vajskoŭcy ciapier zarablajuć prykładna 45 — 60 tysiač hryvień (1,5 — 2 tysiačy dalaraŭ) za miesiac. Bajcy-dobraachvotniki majuć taksama padtrymku ad fondaŭ salidarnaści. Padčas słužby ŭ zonie bajavych dziejańniaŭ vajskoŭcy atrymlivajuć jašče dapłatu ŭ pamiery prykładna 100 tysiač hryvień (3100 dalaraŭ) za miesiac.
Adbor bajcoŭ ŭ vialikija farmiravańni adbyvajecca ŭ centrach, jakija bazujucca ŭ krainach NATA. Kolkaść achvotnikaŭ vialikaja.
Bajcy, jakija dałučajucca da biełaruskich hrup, majuć namier dapamahčy ŭkraincam u adbićci impieryjalistyčnaj ahresii Rasii, ale ŭ razmovach z karespandentam «Našaj Nivy» nie chavali svajoj kančatkovaj mety — «vyzvalić Biełaruś ad pramaskoŭskaj dyktatury i viarnuć u rodnuju krainu zakonnaść», tak sfarmulavaŭ adzin ź ich.
Mužčyna pierachodzić miažu z Polščy va Ukrainu, kab vajavać. Fota: AP / Markus Schreiber
Ukraina da 2022 hoda trymałasia taktyki maksimalnaj strymanaści adnosna režymu Alaksandra Łukašenki. Kijeŭ ustrymlivaŭsia ad luboj dapamohi biełaruskaj apazicyi, nie zaprašaŭ Śviatłany Cichanoŭskaj. Adnak paśla taho jak Biełaruś pradastaviła svaju terytoryju i aeradromy dla napadu Rasii na Ukrainu, a biełaruskija siłaviki pačali vykonvać tyłavyja funkcyi dla zabieśpiačeńnia ahresii, Ukrainie bolš niama čaho hublać. Biełarusy zamiežža schapilisia za situacyju jak za šaniec stvaryć ułasnyja ŭzbrojenyja farmiravańni — toje, čaho biełarusam fatalna brakavała ŭ krytyčnyja momanty XX stahodździa.
«Heta budzie armija, jakaja paźniej vyzvalić Biełaruś, — nie chavaje svaich nadziej były amapaviec Pavieł Kułažanka, jaki taksama staŭ dobraachvotnikam, — Dla mianie jak dla biełarusa heta histaryčny šaniec. I kali my jaho prapuścim, to nieviadoma, kali jon nastanie znoŭ. Ukraina — heta adzinaja kraina śvietu, jakaja daje placoŭku dla farmiravańnia ŭ budučyni biełaruskaha vyzvolnaha vojska».
«Naša Niva» adnaŭlaje zbor danataŭ — padtrymać prosta
