U Minsku pačała pracu hrupa ekśpiertaŭ Mižnarodnaha valutnaha fondu na čale z kiraŭnikom misii MVF pa Biełarusi Krystafieram Džarvisam.

Jak paviedamili BiełaPAN u pradstaŭnictvie fondu, misija pavinna acanić chod vykanańnia biełaruskim uradam prahramy, jakaja padtrymlivajecca kredytam stand‑by u ahulnym pamiery 3,52 młrd. dalaraŭ ZŠA. Ekśpierty fondu taksama praviaduć kansultacyi pa raźvićci biełaruskaj ekanomiki za minuły hod i pierśpiektyvach na budučyniu. Čakajecca, što dla ŭdziełu ŭ hetych kansultacyjach Biełaruś 24—26 žniŭnia naviedaje dyrektar jeŭrapiejskaha departamienta MVF Marek Belka.

U miežach pracy misii zapłanavanyja sustrečy va ŭradzie Biełarusi, Nacyjanalnym banku, ministerstvach ekanomiki i finansaŭ, Administracyi prezidenta. Praduhledžany taksama sustrečy Belki z vyšejšymi dziaržaŭnymi čynoŭnikami Biełarusi.

Biełaruś źviarnułasia pa atrymańnie kredytu da MVF u kastryčniku 2008 hoda «z metaj pavieličeńnia dziaržaŭnych zołatavalutnych reziervaŭ i stvareńnia «paduški biaśpieki», nieabchodnaj dla stabilnaj pracy ekanomiki va ŭmovach suśvietnaha finansavaha kryzisu».

U studzieni 2009 hoda kiraŭnictva MVF uchvaliła prahramu stand‑by dla Biełarusi ŭ abjomie kala 2,46 młrd. dołaraŭ pad prahramu ekanamičnych reformaŭ, raźličanuju na 15 miesiacaŭ (da krasavika 2010 hoda). Pieršy tranš kredytu ŭ 788 młn. dalaraŭ ZŠA pa staŭcy LIBOR plus 0,75% hadavych pastupiŭ u Biełaruś 14 studzienia, astatnija srodki pieraličvajucca z ulikam štokvartalnych spravazdač biełaruskaha ŭrada.

29 červienia Saviet dyrektaraŭ MVF zaviaršyŭ pieršy ahlad u miežach damoŭlenaści z uładami Biełarusi ab kredycie stand‑by. Pry hetym fond zaćvierdziŭ davańnie čarhovaha tranšu kredytu ŭ pamiery 679,2 młn. dalaraŭ ZŠA i pavialičyŭ u cełym abjom finansavaj padtrymki na 1 młrd. dalaraŭ — da 3,52 młrd.

Druhi tranš kredytu MVF pastupiŭ u Biełaruś 2 lipienia.

Na pres‑kanfierencyi 29 lipienia staršynia praŭleńnia Nacbanka Piotr Prakapovič paviedamiŭ, što da kanca hoda Nacbank raźličvaje atrymać ad Mižnarodnaha valutnaha fondu jašče dva tranšy na sumu 1,35 młrd. dalaraŭ stabilizacyjnaha kredytu.

Alaksiej Areška, BiełaPAN

Клас
0
Панылы сорам
0
Ха-ха
0
Ого
0
Сумна
0
Абуральна
0