Uładzimir Zialenski. Fota: Ron Haviv, ronhaviv_vii / Twitter
Paśla pieramovaŭ u Stambule miž rasijskaj i ŭkrainskaj delehacyjami namieśnik ministra abarony Rasii padčas padychodu da presy abvieściŭ pra rašeńnie Maskvy «kardynalna skaracić bajavyja dziejańni na Kijeŭskim i Čarnihaŭskim napramkach».
Raniej ukrainskija vojski pierajšli ŭ kontrnastup pad Kijevam i Sumami. Nad rasijskimi hrupoŭkami na pravym bierazie Dniapra ŭ Bučy i Hastomieli i nad rasijskaj hrupoŭkaj na levym bierazie Dniapra ŭ rajonie Pryłuk navisła pahroza atačeńnia, jany zastajucca klinami ŭnutry ŭkrainskich vojskaŭ.
Ad Maskvy ŭžo niekalki dzion išli nastojlivyja sihnały, što jana hatovaja abmiežavacca prasoŭvańniem na terytoryi Danieckaj i Łuhanskaj abłaściej, admovicca ad pretenzij na kantrol za ŭsioj Ukrainaj. Vyhladaje, što Rasija śpiašajecca dasiahnuć takoha vychadu ź situacyi.
Uładzimir Miadzinski siońnia ahučyŭ prapanovy ŭkrainskaha boku, jakija, zajaviŭ jon, «my ličym kanstruktyŭnym krokam da pošuku kampramisu, jakija Rasijaj buduć razhledžanyja i na jakija budzie dadzieny adpaviedny adkaz». Siarod ich punkty ad tym, što Ukraina pahadžajecca na niejtralny status pad harantyi biaśpieki ad vialikich dziaržaŭ dy inšy punkt — što Rasija nie budzie suprać ustupleńnia Ukrainy ŭ Jeŭrasajuz. Tut zajava całkam.
U lutym Alaksandr Łukašenka zajaŭlaŭ, što «vajna praciahniecca try-čatyry dni» i pradrakaŭ chutki razhrom Ukrainy. Ën taksama kazaŭ, što «Zialenski truchnuŭ». U sakaviku Łukašenka znoŭ zaklikaŭ Ukrainu pahadzicca na patrabavańni Rasii i pahražaŭ, što ŭ advarotnym vypadku vajna zakončycca kapitulacyjaj pa ŭzory Japonii ŭ 1945 hodzie.
Pa stanie na 33-ci dzień vajny prasoŭvańnie rasijskich vojskaŭ spyniłasia na ŭsich kirunkach, i Maskva ŭsio bolš vyrazna demanstruje hatoŭnaść da kampramisaŭ. Kali napačatku rasijski bok nastojvaŭ, kab pieramovy prachodzili na terytoryi Biełarusi, ź jakoj adbyłosia ŭvarvańnie va Ukrainu, to siońnia jany adnavilisia ŭ Stambule.
Paśla siońniašniaha raŭndu pieramovaŭ daradca Ofisa prezidenta Ukrainy Michaił Padalak raskazaŭ, jak Kijeŭ bačyć damovu ab harantyjach biaśpieki.
— Spačatku budzie praviedzieny refierendum, na jakim ukraincy vykažuć svaju pazicyju pa hetaj damovie. Ale refierendum mahčymy tolki va ŭmovach miru.
— Paśla damova budzie ratyfikavanaja ŭ parłamientach Ukrainy i krain-harantak.
— Pytańnie Kryma i Sievastopala budzie asobnym punktam damovy, pa jakoj adbuducca dvuchbakovyja pieramovy Rasii i Ukrainy na praciahu 15 hadoŭ. U hety čas dla vyrašeńnia pytańnia budzie zabaroniena vykarystoŭvać Uzbrojenyja siły.
— Taksama asobnym punktam budzie pytańnie «ŁDNR», jakoje budzie abhavorvacca prezidentami Ukrainy i Rasii.
Čytajcie taksama: Maskva pačynaje rychtavać rasijan da taho, što «my pieramahli, možna spyniacca». Što heta aznačaje dla Ukrainy i rehijona
Rasija napała na Ukrainu ŭnačy z 23 na 24 lutaha, u tym liku z terytoryi Biełarusi. Biełaruskija vojski ŭ vajennych dziejańniach na terytoryi Ukrainy nie ŭdzielničajuć, ale zajmajucca tyłavym zabieśpiačeńniem, pradastavili rasijanam aeradromy, lečać paranienych. Z terytoryi Biełarusi nanosiacca rakietnyja ŭdary.
Upartaje supraciŭleńnie ŭkraincaŭ sarvała płany blickryha, rasijanie za bolš jak miesiac bajoŭ nie zdoleli zaniać Kijeŭ, Charkaŭ, Mikałajeŭ, Sumy i Čarnihaŭ. Praź niekalki tydniaŭ rasijskija vojski pierajšli da taktyki mietadyčnych abstrełaŭ ukrainskich haradoŭ. Asabliva mocna razburanyja Maryupal, Charkaŭ, Čarnihaŭ, Izium, Vałnavacha, Traścianiec, Rubiežnaje. Usiaho abstrełam i bambiožkaj padvierhlisia sotni nasielenych punktach. Kolkaść zabitych mirnych žycharoŭ vymiarajecca tysiačami, dakładnuju kolkaść achviar pakul vyznačyć niemahčyma. Kala 10 miljonaŭ ukraincaŭ pakinuli rodnyja damy, kala 3,8 miljona ź ich pieramiaścilisia ŭ Jeŭropu.
Pavodle acenak analitykaŭ, rasijanie za pieršy miesiac vajny stracili zabitymi, paranienymi i pałonnymi kala 40 tysiač čałaviek.
Dziejańni Rasii i łukašenkaŭskaha režymu sutyknulisia z asudžeńniem mižnarodnaj supolnaści. U AAN 140 krain asudziła rasijskuju ahresiju, a padtrymku ž prahałasavali tolki 5: sami Rasija i Biełaruś, a taksama Siryja, Paŭnočnaja Kareja i Erytreja.
«Naša Niva» adnaŭlaje zbor danataŭ — padtrymać prosta
