Pradstaŭniki pieramoŭnych delehacyj Uładzimir Miadzinski (Rasija, źleva) i David Arachamija (Ukraina). Fota: AR
Sładkov + (260,8 tysiač padpisčykaŭ)
Svoj kanał reparcior VHTRK Alaksandr Sładkoŭ charaktaryzuje duža koratka: «Dumki pra vajnu». Jašče da abviaščeńnia vynikaŭ pieramoŭ u Stambule Sładkoŭ vykazvaŭsia pra ich duža niervova, maŭlaŭ, «usie razmovy nakont mahčymaj damoŭlenaści ab spynieńni ahniu — heta ciažkaja pravakacyja».
Što da siońniašniaha abmierkavańnia niejtralnaha statusa Ukrainy, Sładkoŭ kamientuje jaho tak: «Ja ŭjaŭlaju, kali b my vajavali z tymi nacystami, skažam, u 1942-m, i viali pieramovy. A potym napiaredadni pieramohi pad Stalinhradam pavieryli fašystam pra ich niejtralny status. Dzie b my zaraz padłohi miali, u kaho ŭ słuhach?». Sładkoŭ nie kaža, što ličyć padziei ŭ Stambule krokam nazad z boku Rasii, ale ŭsio adno zadajecca pytańniem, «jak zaŭtra mužykam na pieradavoj ŭ vočy hladzieć».
Kotsnews (247,2 tysiačy padpisčykaŭ)
Piarojdziem da kanała, jaki naležyć vajenkaru «Kamsamolskaj praŭdy» Alaksandru Kocu. Hety aŭtar pakul ustrymlivajecca ad taho, kab farmulavać vysnovy pa vynikach pieramoŭ:
«Zanadta mała zaraz kankretyki, kab udumliva prakamientavać vyniki pieramoŭ. Za 8 hadoŭ možna było ŭpeŭnicca, što ŭsio, što adbyvajecca ŭ vysokich kabinietach, pieramovy, implemientacyi i pročyja ***acyi vielmi dalokija ad taho, što adbyvajecca na ziamli».
Ale, jak piša Koc, «kali my źbirajemsia padpisać čarhovyja Chasaŭjurtaŭskija pahadnieńni, to treba pamiatać, što za imi nadyšła Druhaja čačenskaja vajna. A hałoŭnaje — kryŭdna za palehłych».
Chasaŭjurtaŭskija pahadnieńni, pra jakija kaža Koc — heta mirnaja damova, što pakłała kaniec Pieršaj čačenskaj vajnie, zhodna ź jakoj rasijskija vojski byli vyviedzienyja z Čačni, a sama kraina de-fakta na try hady stała niezaležnaj.
Rieportior Rudienko V (141,4 tysiač padpisčykaŭ)
Heta telehram-kanał rasijskaha vajennaha karespandenta Andreja Rudzienki, jaki z 2014 hoda pracuje na terytoryi Danbasa. Post Rudzienki, pryśviečany pieramovam, pačynajecca z emacyjnaha zakliku «Niaŭžo nas nie vučyć žyćcio!».
Rudzienka apisvaje padziei va Ukrainie jak denacyfikacyju i kaža, što ŭsio heta ŭ Danbasie ŭspryniali jak «vyzvaleńnie ad vaśmihadovaha pałonu». Kab arhumientavać toje, što Ukrainie sapraŭdy patrebnaja «denacyfikacyja», Rudzienka piša pra «ordy nacyjanalistyčnych bataljonaŭ, jakija hatovyja rvać zubami ŭsich i ŭsio, što źviazana z Rasijaj».
Što da rašeńnia skaracić nastupleńnie na poŭnačy Ukrainy, to prapahandyst charaktaryzuje jaho tak: «Spynić nastup zaraz — aznačaje znoŭ dać čas Kijevu padrychtavać jašče bolš bajevikoŭ da novaj vajny. Hetaja kraina pavinna być denacyjanalizavanaja! Zialenski, Parašenka pavinny być addanyja pad sud! U lubym inšym varyjancie vyrašeńnia hetaha kanfliktu hetyja žyvioliny vydaduć parazu za pieramohu i pačnuć rychtavać na hetych kazkach novych zabojcaŭ».
UKRAINA / Open Ukraine novosti vojna 24/7 (101,8 tysiač padpisčykaŭ)
Aŭtary hetaha kanała nazyvajuć siabie ŭkraincami, ale ž jaŭna zajmajuć prarasijskuju pazicyju. U zamacavanym paviedamleńni ad 20 sakavika, dzie jany sami raskazvajuć pra siabie, aŭtary kanała pišuć: «My čakali i vieryli, što adnojčy nastanie dzień Z». To-bok majem jaŭnuju adsyłku da apošniaj litary łacinskaha ałfavita, jakaja stała simvałam rasijskaha ŭvarvańnia.
U kamientary da vyniku pieramoŭ aŭtary kanała pryznajuć, što praź ich «šmat chto razhubleny, šmat chto źbiantežany». Pavodle ich, pa vynikach «mierapryjemstva dypłamatyčnaha charaktaru» byŭ zrobleny «ŭsiaho tolki šerah zajavaŭ» bakoŭ, i «adno ź ich datyčnaje niekatoraha źmianšeńnia vajennaj aktyŭnaści vakoł Kijeva i Čarnihava». Aŭtary kanała padkreślivajuć, što, na ich dumku, heta sapraŭdy «ŭsiaho tolki niekatoraje źmianšeńnie», jakoje maje miesca «jak častka sustrečnych sastupak».
Z usiaho hetaha prapahandysty robiać davoli tajamničuju vysnovu, što «niechta niekaha honić pa ściažkach», i «hety niechta bolš mienavita ZSU». Usio heta, pa mierkavańni aŭtaraŭ kanała, pavinna dać kiraŭnictvu ZSU «vybar być u stanoviščy tych siłaŭ, jakija ŭ zonie, dzie aktyŭnaść siłaŭ śpiecapieracyi Rasii i Narodnaj milicyi Danbasa nie źnižajecca… ci ŭsio-tki mieć niejki vybar i šaniec».
Čytajcie taksama: Jak maskoŭski Centrabank zdoleŭ padniać kurs rasijskaha rubla
Staršie Eddy (168,7 tysiač padpisčykaŭ)
Aŭtar hetaha ananimnaha kanała nazyvaje spynieńnie nastupleńnia pad Kijevam i Čarnihavam całkam łahičnym krokam z vajennaha punktu hledžańnia — ale ž akcentuje, što nastupleńnie tam nie budzie adbyvacca tolki «niejki čas». Zamiest hetaha, jak ličyć aŭtar kanała, «čakajem jašče bolšaha ŭzmacnieńnia bajoŭ na Danbasie i na poŭdni». Tam, pavodle ananima, «asnoŭnyja siły voraha, i ich nieabchodna pachavać».
Aŭtar kanała repościć infarmacyju z bolš drobnaha resursa — kanała pad nazvaj Lobaev Z (24,8 tysiač padpisčykaŭ). I voś publikacyja adtul užo vyhladaje trochi zakłapočanaj. Pavodle jaje, «mir, zaklučany na peŭnych umovach, jakija hłybinny narod paličyć parazaj, patencyjna moža stać hibielnym dla krainy».
Colonelcassad (58,7 tysiač padpisčykaŭ)
Krymski błohier Barys Rožyn, uładalnik kanała Colonelcassad, dahetul padkreślivaje, što pieramovy Maskva viadzie z «nacysckim režymam». Tuju demilitaryzacyju, pra jakuju rasijski bok užo i nie kaža, Rožyn ličyć adnym z važnych patrabavańniaŭ da Ukrainy, jakaja nibyta pavinna zdacca. Poŭny śpis patrabavańniaŭ vyhladaje tak: «Krym, ŁDNR, demilitaryzacyja, denacyfikacyja, niejtralitet, spynieńnie dyskryminacyi ruskich i ruskaj movy».
Kali dla dasiahnieńnia pastaŭlenych Rasijaj metaŭ vajennym šlacham treba vykarystać dadatkovyja namahańni, jany, na dumku Rožyna, pavinny być vykarystanyja — tym bolš što «RF zadziejničała, prama skažam, tolki častku svaich resursaŭ». Kali Rasija admovicca chacia b ad častki svaich metaŭ, heta «ź vialikaj dolaj vierahodnaści budzie aznačać prosta jašče adkładzienuju vajnu ŭ siarednieterminovaj ci doŭhaterminovaj pierśpiektyvie». A vynikam hetaha ŭsiaho, jak ličyć Rožyn, pavinna być «źjaŭleńnie na vyzvalenych terytoryjach novych dziaržaŭnych utvareńniaŭ z uładaj, łajalnaj Maskvie, z opcyjaj dalejšaha pryniaćcia ŭ skład RF ci Sajuznaj dziaržavy».
«Naša Niva» adnaŭlaje zbor danataŭ — padtrymać prosta
