Katar upieršyniu ŭ historyi prymie «mundyjal». Fota: AP
Pieršynstva, jakoje ŭpieršyniu prymaje Bližejšy Uschod, adbudziecca ŭ niazvykły čas: nikoli raniej «mundyjali» nie hulalisia pa-za traŭniem, červieniem albo lipieniem.
Adnak nadzvyčajnaja viasnova-letniaja śpiakota ŭ rehijonie vymusiła arhanizataraŭ pieranieści spabornictvy na pieryjad z 21 listapada pa 18 śniežnia.
Pa rehłamiencie zmahacca za Kubak płaniety dazvolena 32 zbornym. Adnak na momant losavańnia adabralisia ŭ Katar tolki 29.
Adkrytym zastajecca pytańnie z adnym pradstaŭnikom Jeŭropy (pieramožca pary Ukraina — Šatłandyja ŭ finale mini-turnira budzie bicca z Uelsam), a taksama tandemam tryumfataraŭ mižkantynientalnaha adboru. U dadatkovaj kvalifikacyi voźmuć udzieł Pieru dy macniejšy z pary Aŭstralija — AAE, a taksama pieramožca ŭ tandemie Novaja Ziełandyja — Kosta-Ryka.
Pa vynikach losavańnia kamandy raźmiaścilisia ŭ hrupach nastupnym čynam:
Hrupa «A»: Katar, Niderłandy, Sieniehał, Ekvador.
Hrupa «V»: Anhlija, ZŠA, Iran, Ukraina/Šatłandyja — Uels.
Hrupa «S»: Arhiencina, Mieksika, Polšča, Saudaŭskaja Aravija.
Hrupa «D»: Francyja, Danija, Tunis, AAE/Aŭstralija — Pieru.
Hrupa «E»: Ispanija, Hiermanija, Japonija, Kosta-Ryka — Novaja Ziełandyja.
Hrupa «F»: Bielhija, Charvatyja, Maroka, Kanada.
Hrupa «G»: Brazilija, Šviejcaryja, Sierbija, Kamierun.
Hrupa «H»: Partuhalija, Uruhvaj, Paŭdniovaja Kareja, Hana.
U hrupach kožnaja kamanda zhulaje z kožnaj u adzin kruh. Pa vynikach adboračnaj stadyi ŭ płej-of patrapiać pa dźvie najmacniejšyja zbornyja z kožnaha puła.
Nadalej alimpijskaja sistema praduhledžvaje zmahańni ŭ 1/8, čverćfinale, paŭfinale i finale. Da taho ž budzie praviedzieny matč za bronzu.
Dadamo, što paŭnavartasnym čempijonam śvietu źjaŭlajecca kamanda Francyi, jakaja ŭ finale-2018 pierajhrała zbornuju Charvatyi.
«Naša Niva» adnaŭlaje zbor danataŭ — padtrymać prosta
