Centr Vałynskaj vobłaści, horad Łuck z vyšyni ptušynaha palotu. Fota: juciub-kanał KUKIN Company
«Histaryčnyja losy Ukrainy i Biełarusi składalisia pa-roznamu, ale ŭ našaj niezaležnaści zaŭsiody byŭ ahulny vorah — impierskaja Maskva.
Nieadnojčy my, ukraincy i biełarusy, nanosili maskoŭskim zachopnikam spustašalnyja parazy, jak u bitvie pad Oršaj u 1514 hodzie. Imknučysia zaniavolić ukrainski i biełaruski narody, Kreml vykarystoŭvaŭ masavyja represii, teror, rusifikacyju, akupacyju… Usio heta my z vami pieražyli», — adznačajecca ŭ zvarocie.
Pradstaŭniki ŭładaŭ pamiežnaj ź Biełaruśsiu vobłaści zaklikali hramadzian Biełarusi i biełaruskich sałdat nie dapuścić, kab ich uciahnuli ŭ vajnu na baku Rasii.
«Rasija zaŭsiody imknułasia źniščyć vašu i našu nacyjanalnuju identyčnaść, pazbavić Biełaruś i Ukrainu suvierenitetu i subjektnaści.
Rasijskija vojski na terytoryi Biełarusi — heta ŭžo pieršaja prykmieta akupacyi krainy. Maskva pieratvaraje Biełaruś u płacdarm dla vajennaj ahresii suprać Ukrainy.
Paśla pravału blickryha i vielizarnych strataŭ Pucin sprabuje prymusić biełarusaŭ vajavać na jahonym baku i hinuć za jahonyja impierskija tryźnieńni».
Deputaty Vałynskaj abłasnoj rady zaklikali biełaruski narod «pamiatać svaju słaŭnuju historyju i nie vieryć maskoŭskaj prapahandzie».
«Vaš vorah — nie ŭkraincy, a pucinski režym, jaki choča pabudavać novuju turmu narodaŭ. Nie dazvalajcie Maskvie ŭciahnuć vas u vajennuju avanturu. Nie vykonvajcie złačynnyja zahady i nie ŭdzielničajcie ŭ ahresii suprać Ukrainy, rabicie ŭsio mahčymaje, kab pakazać, što biełarusy suprać hetaj vajny. Nie achviarujcie žyćciom svaich dziaciej, mužoŭ i baćkoŭ! Pamiatajcie, ukraincy buduć abaraniać svaju ziamlu i źniščać tych, chto pryjšoŭ z vajnoj».
Deputaty abłasnoj rady taksama zaklikali hramadzian Biełarusi dałučacca da tych svaich suajčyńnikaŭ, jakija «stajać popleč z ukraincami ŭ vajnie z maskoŭskim ahresaram».
«Heta naša ahulnaja baraćba ź viečnym voraham, u jakoj my pavinny pieramahčy i nazaŭsiody złamać chrybiet maskoŭskamu impieryjalizmu. Vierym, što vy pačujecie našy zakliki i zrobicie pravilny vybar. Viedajem, što pieramožam ahulnaha voraha i zdabudziem mir, stabilnaść, biaśpieku i niezaležnaść dla našych krain, dla adzinaj i svabodnaj Jeŭropy.
Svabodnaja Biełaruś niemahčymaja biez svabodnaj suvierennaj Ukrainy. Budučynia Biełarusi vyrašajecca na terytoryi Ukrainy! Słava Ukrainie! Žyvie Biełaruś!» — skončyli zvarot deputaty Vałynskaj abłasnoj rady.
Čytajcie taksama:
Kantynient Ukraina. Padarožža ŭ krainu, dzie ludzi zachoŭvajuć aptymizm u luboj situacyi





