Paśla pieratrusu ŭ navapołackim ofisie Biełaruskaha niezaležnaha prafsajuza

Paśla pieratrusu ŭ navapołackim ofisie Biełaruskaha niezaležnaha prafsajuza

Biełaruski niezaležny prafsajuz harniakoŭ byŭ stvorany ŭ 1991 hodzie. U 1993 hodzie, paśla dałučeńnia da jaho chimikaŭ, budaŭnikoŭ, naftapierapracoŭščykaŭ, transpartnikaŭ jon byŭ pierajmienavany ŭ Biełaruski niezaležny prafsajuz. U siaredzinie 1990-ch ahulnaja kolkaść jaho siabraŭ dasiahała 5 tysiač čałaviek, tolki ŭ piarvičcy «Naftana» i «Palimira» było bolš za 1 tysiaču siabraŭ prafsajuza.

«Idzie ahresiŭnaja rytoryka, słužboŭcy navat nie saromiejucca ŭ vyrazach»

Pastupova, ź ciaham času, ludziej adtul patrochu vyciskali: kaho pahrozami, kaho piernikami, raskazvaje siabra BNP z navapołackaha «Naftana» Dzianis.

«A padčas prezidenckich vybaraŭ 2020 hoda adbyłosia adradžeńnie niezaležnaha prafsajuza: ludzi znoŭ pačali aktyŭna ŭstupać u prafsajuz, i kolkaść siabraŭ jaho dasiahnuła 600 čałaviek.

Jak tolki my dasiahnuli takoj ličby, ułady pačali cisnuć pa staroj schiemie: pahražali nie praciahnuć kantrakt, zapałochvali ludziej, źmianšali roznyja vypłaty — usio dziela taho, kab ludzi sami, dobraachvotna pačali pakidać prafsajuz. Zaraz cisk pavialičyŭsia, idzie ahresiŭnaja rytoryka, słužboŭcy navat nie saromiejucca ŭ vyrazach. Dajšło da taho, što supracoŭnik słužby ekanamičnaj biaśpieki pahražaŭ pracaŭniku, siabru BNP, što jaho znojduć u lesie», — kaža siabra BNP Dzianis.

Padčas pieratrusu zabrali navat klučy ad prybiralni i aficyjnyja ściahi

27 lutaha zatrymali staršyniu BNP Volhu Brycikavu. Heta byŭ asnoŭny dzień referendumu, jana vyjšła ŭ kurtcy z antyvajennym nadpisam. Spačatku joj prysudzili 15 sutak aryštu. Adnak pierad vychadam z domu Brycikava zapisała videa i vykłała jaho ŭ svoj instahram. Za heta jana atrymała dadatkova 15 sutak aryštu. Jašče 15 sutak joj prysudzili za arkušy z antyvajennaj tematykaj na voknach jaje kvatery. Ahułam Volha pavinna adsiedzieć 45 sutak. Aryšt jana adbyvaje ŭ Vušačach.

Paśla aryštu staršyni 21 sakavika ŭ navapołackim ofisie BNP i siabraŭ prafsajuza doma prajšli pieratrusy, praciahvaje siabra prafsajuza Dzianis.

«Spačatku pryjšli da namieśnika BrycikavajHienadzia Varony. Jaho doma nie było, vyłamali dźviery spačatku ŭ kvateru, potym u začynieny na kluč pakoj.

Potym siłaviki ŭvarvalisia ŭ ofis prafsajuza ŭ Navapołacku. Pieratrus, pavodle farmalnaj viersii, tyčyŭsia kryminalnaj spravy nakont razhałošvańnia piersanalnych dadzienych sudździ Navapołackaha suda Zinaidy Bałabołavaj, jakaja vynosiła palityčna matyvavanyja prysudy.

Zabrali ŭsiu ofisnuju dakumientacyju, tečki z dakumientami, zahady, pratakoły cechavych schodaŭ z 1990-ch hadoŭ, aficyjnyja ściahi BNP. Zabrali klučy ad ofisa i navat kluč ad prybiralni».

Usiaho kanfiskavali 13 tečak z dakumientacyjaj (kasavyja knihi, płaciožnyja viedamaści, pratakoły, zajavy siabraŭ prafsajuza; 16 aficyjnych ściahoŭ, 21 kluč, pieraličyŭ Dzianis.

Kanfiskavali noŭtbuk unučki hanarovaj piensijanierki

U ofisie zaŭsiody znachodzicca hanarovaja piensijanierka, siabra BNP Nina Barysava. Spačatku jaje pavieźli dadomu i tam praviali pieratrus. Zabrali mabilnyja telefony ŭsich siamiejnikaŭ i navat tolki što kupleny novy noŭtbuk unučki. Zatym Ninu Barysavu pavieźli ŭ RUUS nibyta dla składańnia pratakoła. Pažyłoj žančynie z pastarunku vyklikali taksoŭku dadomu, jakuju jana sama i apłaciła, — kaža surazmoŭca Svabody.

«Praz paru dzion adbyŭsia pieratrus u jurysta prafsajuza Maryny Sacukievič, u jaje zabrali arhtechniku. Paśla ŭsich pieratrusaŭ, kali ŭ siłavikoŭ źjavilisia dakumienty, u Navapołacku i ŭ Mazyry pačałasia novaja chvala represij na siabraŭ prafsajuzaŭ.

Supracoŭnik słužby ekanamičnaj biaśpieki sam biehaje pa ŭstanoŭkach sa śpisami i patrabuje ad piersanału, kab napisali zajavy ab vychadzie i zaśviedčyli ŭ prafsajuzie — što jany vyjšli. I patrabujuć ustupać u praŭładny aficyjny Biełchimprafsajuz. Ludziej prosta zabirajuć z pracy i viazuć na dopyty ŭ milicyju, jak było niadaŭna z Hienadziem Varonam.

Usio heta nacelena na toje, kab terminova zakryć piarvičku, pakul Volha Brycikava za kratami, pakul prafsajuz «abiezhałoŭleny», — miarkuje Dzianis.

Navapołacki harvykankam pahražaje «vyklučeńniem z žurnała dziaržrehistracyi»

15 sakavika na adras BNP pryjšoŭ list, padpisany staršynioj Navapołackaha harvykankama Dźmitryjem Dziamidavym «Ab pryniaćci mieraŭ pa ŭchileńni parušeńniaŭ». Usiaho navapołackaj piarvičcy BNP vystaŭlena 5 punktaŭ, jakija prapanujecca vypravić.

Jość i punkt numar 4, jaki tyčycca zajavy Volhi Brycikavaj ab niedaviery Usiebiełaruskamu schodu, što adbyŭsia hod tamu:

«U lutym 2021 hoda staršyni piarvičnaj arhanizacyi Volzie Brycikavaj prakuraturaj vyniesiena aficyjnaje papiaredžańnie ab niedapuščalnaści niestatutnaj dziejnaści pa publičnaj dyskredytacyi ŭdzielnikaŭ VI Usiebiełaruskaha narodnaha schodu, jakija zdolnyja byli nanieści škodu nacyjanalnaj biaśpiecy Respublicy Biełaruś».

«Voś jak takija pretenzii možna vykanać — rytaryčnaje pytańnie. Zaŭvahi harvykankama my pavinny vypravić ciaham miesiaca. Inakš pahražajuć «vyklučeńniem z žurnała dziaržaŭnaj rehistracyi arhanizacyjnych struktur prafsajuzaŭ», što aznačaje likvidacyju prafsajuzaŭ», — kaža prafsajuzny aktyvist z Navapołacka Dzianis.

Клас
0
Панылы сорам
4
Ха-ха
0
Ого
0
Сумна
0
Абуральна
11