Naprykancy zimy siaredni zarobak u Biełarusi składaŭ 1563 rubli
Hieapalityčnaja izalacyja Biełarusi, mižnarodnyja ekanamičnyja sankcyi ŭ jaje dačynieńni dy skački kursu dalara viali da niepaźbiežnaha ŭdaru pa rynku pracy krainy.
Kab zrazumieć, jak rynak adreahavaŭ na «šokavuju terapiju», my vyvučyli prapanovy na poŭnuju zaniataść, dastupnyja praz sajty-ahrehatary.
Dla hetaha abrali try kryteryi zarobku: słavutyja «pa 500» (1385 rubloŭ pa kursie na dzień napisańnia artykuła), «1000 i bolš» (2770), a taksama 200 dalaraŭ jak nižniuju miažu (554).
Dla čyścini ekśpierymientu šukali pracu, aktualnuju pa zajavach apošniaha miesiaca, spačatku ŭ Minsku, a paśla pa abłasnych centrach dy pieryfieryi. Vyniki atrymalisia davoli cikavyja.
Krychu statystyki. Dla analizu my abrali dva sajty z vakansijami — rabota.by dy gsz.gov.by (dziaržsłužba zaniataści). Pieršyja prapanavali ahułam 4028 varyjantaŭ uładkavańnia, druhija — 68 057.
Na rabota.by puły zarobkaŭ raźmierkavalisia nastupnym čynam:
- Ad 1000 dalaraŭ i vyšej — 1179 prapanoŭ (albo 29,3%)
- Ad 500 da 1000 dalaraŭ — 883 prapanovy (21,2%)
- Ad 200 da 500 dalaraŭ — 1893 prapanovy (47%)
Dziaržsłužba zaniataści dała taki vynik:
- Ad 1000 dalaraŭ i vyšej — 324 prapanovy (albo 0,5%)
- Ad 500 da 1000 dalaraŭ — 7477 prapanoŭ (11%)
- Ad 200 da 500 dalaraŭ — 49 091 prapanova (72,1%)
Maksimalny zarobak
U stalicy samyja pryvabnyja hrošy, jak i raniej, prapanujucca ŭ IT-cfiery. Z bolš čym 800 vakansij vielizarnaja častka nakiravanaja na rekrucinh Python-raspracoŭščykaŭ, DevOps-inžynieraŭ, sistemnych administrataraŭ i śpiecyjalistaŭ padobnaha kštałtu.
Bazavaja prapanova tut startuje ad 5500 rubloŭ dy siahaje da niabios u zaležnaści ad kvalifikacyi dy vopytu čałavieka.
Taksama istotny popyt fiksujecca ŭ halinie budaŭnictva — pryčym šukajuć profi raznastajnych kirunkaŭ. Plus-minus tysiaču dalaraŭ na starcie prapanujuć ryełtaram, na jakich palujuć ahienctvy pa prodažy nieruchomaści. Na anałahičny hanarar mohuć raźličvać elektramantažniki, inžyniery, praraby, cieślary. Siudy ž adniasiom hałoŭnych buchhałtaraŭ, što pavinny kantralavać usie finansavyja pracesy.
Trojku ž najbolš masavych prapanoŭ «ad 1000 i bolš» zamykaje śfiera prodažu pasłuh. Jakich tolki mieniedžaraŭ pa zbycie ciapier ni šukajuć! Tut vam i internet-markietynh z adpaviednym błokam pasłuh, i pradukcyja viadomych pa krainie brendaŭ kštałtu «Kieramina», i mebla, i žanočaje adzieńnie…
Za miežami stalicy adčajna šukajuć kiroŭcaŭ-mižnarodnikaŭ. Brest, Pinsk, Hrodna, Mahiloŭ — ledźvie nie ŭ luboj abłasnoj kropcy Biełarusi možna ŭładkavacca, kali vy majecie katehoryi S, SE, D. Dy jašče možna za hanarar pahandlavacca: tam, dzie ŭčora prapanavali 2500, siońnia ŭžo možna i 3000 vybić.
Siaredni zarobak
Samy lohki sposab pracaŭładkavacca ŭ Minsku, kali vam patrebny zarobak «pa 500» — pajści pracavać pradaŭcom-kansultantam.
Biez vopytu takoj prafiesijnaj dziejnaści, kaniečnie, treba budzie krychu pabiehać dy pašukać. Dy i sa startu vam prapanujuć mienš za siaredni akład pa horadzie. Tym nie mienš, heta šyrokaje pole dla vybaru pracadaŭcy.
Mieniedžaraŭ pa prodažach dy śpiecyjalistaŭ pa pracy z klijentami taksama sustrenuć z abdymkami. Jak, darečy, i buchhałtaraŭ. Plus jość popyt na zahadčykaŭ adździełaŭ u handli, jakija b mahli kiravać rucinnymi pracesami (vykładkaj tavaraŭ dy kantrolem ich najaŭnaści), a taksama ažyćciaŭlać ahulnaje kiraŭnictva.
Nikudy nie źnik popyt i na budaŭnikoŭ. Taksama stalicy patrebnyja śpiecyjalisty pa łahistycy: bolš za 200 vakansij tak ci inakš adnosiacca da hetaj haliny.
Za miežami Minska roskid vakansij značna bolšy — i tut užo sistemna zhrupavać samyja maštabnyja płyni prapanoŭ składana.
Ale vidavočna, što ustanovam i pradpryjemstvam brakuje kvalifikavanych kiraŭnikoŭ.
Bo sieciavomu handlu charčovymi praduktami patrabujucca dyrektary adździełaŭ, paliklinikam (u tym liku vieterynarnym) — hałoŭnyja ŭračy, da mieniedžaraŭ pa prodažach dałučajucca kvalifikavanyja mieniedžary pa zakupkach. Plus kropačna, ale hieahrafična bahata dzie, uźnikajuć vakansii dla inžynieraŭ, enierhietykaŭ, technołahaŭ.
Minimalny zarobak
Kaho šukajuć na zarobak ad 200 dalaraŭ?
Jość popyt na pradaŭcoŭ dy kansultantaŭ samaj nizkaj stupieni, achoŭnikaŭ, hruzčykaŭ, prybiralščyc dy raznarabočych. Stalary dy apieratary stankoŭ mohuć patrabavać zarpłatu ad 800-900 rubloŭ, kładaŭščyki dy šarahovyja buchhałtary — ad 900.
Kali vyšukajecie pracu miedsiastroj ci vychavalnicaj, to tut stol u 600-700 rubloŭ prabić amal nierealna. Chacia śpiecyjalisty patrebnyja ŭ roznych rajonach Minska.
Pry pahłybleńni ŭ śpis vakansij usio čaściej i čaściej znachodziacca zapyty ad ustanoŭ kultury. Tut šukajuć i artysta simfaničnaha arkiestra, i artysta dramy, i redaktara teleprahram.
Tvorčyja prafiesii ciapier nie lidujuć u rejtynhu akładaŭ. Jak i praca ŭ śfiery adukacyi — zarpłaty jak niepasredna nastaŭnikaŭ, tak i psichołahaŭ albo mietadystaŭ-arhanizataraŭ ledź-ledź pierabirajucca za aznačanuju nami rysu.
Za miežami stalicy trendy anałahičnyja. Roźnica tolki ŭ drobiaziach — naprykład, zaležnaść ad kolkaści pracoŭnych hadzin. Tak, administratar u fitnes-kłubie Mahilova moža atrymać na ruki da 600 rubloŭ, kali voźmiecca pracavać stachanaŭskimi tempami dy jašče paćvierdzić vyšejšuju adukacyju dakumientami.
Dadamo pra važny momant: najaŭnaść vakansij sama pa sabie nie harantuje pracaŭładkavańnia — prynamsi ŭ biudžetnych ustanovach. Bo akramia sumoŭja, kandydatam važna budzie mieć palityčnuju «čyściniu».
«Naša Niva» adnaŭlaje zbor danataŭ — padtrymać prosta
«Kali ŭ vas zastaniecca pałova ciapierašniaha zarobku ‒ heta budzie dobra». Rynak pracy ŭ Biełarusi čakaje šok
