Revalucyjnaja: «Vielmi šmat ludziej nibyta źnikła»
Adnym z samych składanych pieryjadaŭ dla kłuba TNT za apošni čas, jak i dla mnohich, staŭ pačatak epidemii karanavirusa: tady kłub uvohule začyniŭsia.
«Paśla taho, jak vyrašyli adkryvacca nanoŭ, było niaprosta taksama. My mocna ekanomili na ŭsim: pracavali skaročanym štatam i raskładam — supracoŭnikaŭ było na 50% mienš, čym zvyčajna. Pacichu ŭsio vyjšła amal na dakavidny ŭzrovień: za toj čas, što my nie pracavali, ludzi, vidać, mocna zasumavali pa nas», — kaža pradstaŭnik TNT Rock Club.
Fota: vk.com/tntrockclub
Surazmoŭca spadziajecca, što samy składany momant biahučaha hoda dla ich ustanovy ŭžo projdzieny:
«Ja maju na ŭvazie pačatak vajny: ź joj pačaŭsia adtok naviedvalnikaŭ — adrazu na adsotkaŭ 70. Siarod našych niaźmiennych haściej vielmi šmat ludziej nibyta prosta źnikli. Vykažu zdahadku, što heta źviazana z tym, što mnohija prosta ŭklučajuć režym ekanomii. Nu i vielmi šmat ludziej źjechała».
«Ciapło moža być našym vyratavańniem»
Pacichu z publikaj rabiłasia to lepš, to horš, ale ŭsio adno ŭ paraŭnańni sa spakojnym pieryjadam ciapier da TNT dachodzić 70% ad byłoj kolkaści naviedvalnikaŭ.
«Što my robim z hetym? Jak i ŭsie, krychu vymušana padniali ceny, ale mienavita na tyja pazicyi, na jakija pastaŭščyki ich padniali. Ničoha biazdumna nie rabiłasia, bo my i tak majem prablemu z haściami. Taksama zapuskajem u pracu džazavyja viečary — vyrašyli sprabavać pa aŭtorkach. Dadatkova prapanoŭvajem 20% źnižku na ŭsio mieniu ŭ hety dzień. Mahčyma, heta dapamoža pryciahnuć ludziej», — raskazvaje surazmoŭca.
Ën dadaje, što nijakaj stabilnaści, viadoma, ciapier niama: novy tydzień ad papiaredniaha moža adroźnivacca kardynalna. Płanavać, vystrojvać pracu tak, jak rabiłasia dva hady tamu, siońnia niemahčyma.
Kancert Leibonik u TNT. Fota: vk.com/tntrockclub
«Usie pieražyvajuć za zaŭtra, za ščaślivaje zaŭtra. Ustanoŭ zakryvajecca vielmi šmat, pra nas takoj havorki pakul nie idzie. Čakajem viasnu i sonca, tamu što ŭžo apošnija vychadnyja pakazali siabie pazityŭniejšymi za minułyja, bo akurat zdaryłasia paciapleńnie — i ludziej adrazu bolš. Ciapło moža być našym dadatkovym vyratavańniem».
Kastryčnickaja: «Śfiera hramadskaha charčavańnia pieražyvaje padobnyja časy, jak z pačatkam kavidu»
Daša, supracoŭnica adnoj z kaviarań na Kastryčnickaj, zaniataja ŭ śfiery hramadskaha charčavańnia bolš za piać hadoŭ. Jana z žacham zhadvaje čas pačatku kavidu, kali biełarusy pierastali vychodzić z damoŭ, nie kažučy ŭžo pra vizity ŭ kaviarni. Ale 2022 hod prynios novyja składanaści.
«Kali tolki pačałasia vajna va Ukrainie, ludzi spačatku prychodzili da nas, kab znajści padtrymku adno ŭ adnym, kab nie zastavacca ŭ adzinocie. A potym bolšaja častka haściej prosta źjechała, i ŭsia śfiera hramadskaha charčavańnia ŭ pryncypie pieražyvaje padobnyja časy, jak pry pačatku kavidu. Ceny vyraśli, zarobki nie rastuć — u vyniku navat u tych, chto zastaŭsia, paprostu hublajecca mahčymaść kudyści chadzić. Pracentaŭ 35-40 haściej my zhubili tolki ź lutaha, pry tym što heta było nie pastupova, a adnym macham», — kaža dziaŭčyna.
Daša adznačaje, što heta ciažka dajecca navat psichałahična:
«Ty pryzvyčaiŭsia bačyć šmat ludziej, dziaciej, poŭnyja pasadki, šum i śmiech. Hladzieć na paŭpustuju zału — vielmi ciažka. I ty razumieješ, što sam robiš usio mahčymaje, kab tak nie było, ale ad ciabie ničoha nie zaležyć u hetym vypadku. I voś ty naziraješ, nibyta Minsk staŭ pustym».
Vulica Kastryčnickaja ŭ Minsku. Fota: 34mag
Dastaŭka, ź jakoj jany taksama supracoŭničajuć, ciapier taksama pieražyvaje nie najlepšyja časy: spačatku ŭdaryli bankaŭskija sankcyi, a potym taksama źmienšyłasia kolkaść zamoŭ praz toje, što ludzi pakinuli krainu.
«My starajemsia mocna nie padymać ceny, kab častka haściej usio ž mahła da nas prychodzić. Vykarystoŭvajem markietynhavyja chady, rekłamu, pluški dla naviedvalnikaŭ — usio, jak i raniej, ale bolš intensiŭna, čym zvyčajna.
Važna, što naša kiraŭnictva robić usio mahčymaje, kab zachavać supracoŭnikaŭ. Ludzi na Kastryčnickaj pracujuć nie adzin i nie try hady — heta stary kaściak, jaki pobač amal z pačatku adkryćcia vulicy.
Usie lubiać hetaje miesca i nikudy nie chočuć sychodzić. Siońnia paŭsiul nie samyja lepšyja časy, tamu my trymajemsia adzin za adnaho i ŭ tym liku ŭ imia zachavańnia našaj lubimaj vulicy nikudy nie źjazdžajem», — adznačaje Darja.
Ahułam supracoŭniki niepakojacca za samu vulicu: mnohija kaviarni ŭžo pieražyli chvalu represij raniej, paśla taho jak zrabili vychadny i vykazali salidarnaść z rabočymi ŭ dzień anansavanaj ahulnanacyjanalnaj zabastoŭki 26 kastryčnika 2020 hoda. Tady sanepidemsłužba i inšyja instancyi zavalili kaviarni pravierkami.
«My čakajem leta ź vialikaj nadziejaj. Budziem hladzieć, jak buduć iści spravy. Ale dla poŭnaha ščaścia taksama treba, kab skončyłasia toje łajno, jakoje raspačała Rasija. I chočacca, kab źmianiłasia kiraŭnictva ŭ našaj krainie: jak tolki heta źmienicca, viernucca ludzi, jakija byli vymušanyja źjechać ź Biełarusi i sumujuć bieź jaje. U toj momant Minsk zakvitnieje novymi farbami i my pačniom dychać svabodna», — reziumuje surazmoŭca.
Zybickaja: «Ludziam chočacca abstrahavacca ad navin, tamu jany pakrysie viartajucca ŭ bary»
Uładzisłaŭ pracuje ŭ śfiery haścinnaści kala šaści hod. Ën taksama adznačaje, što z pačatkam vajny kolkaść klijentaŭ u barach na tusovačnych Zybickaj i Internacyjanalnaj, u adnym ź jakich jon pracuje, adčuvalna źmienšyłasia.
«Z pačatkam, jak heta pravilna kazać… «śpiecyjalnaj apieracyi» z boku Rasii, spravy stali iści našmat horš. U ludziej, vidać, nie było paprostu nastroju i žadańnia. Mnohija mahli pačać ekanomić. Źjaviłasia apatyja i žałobny nastroj paŭsiudna. Ale ŭ apošni tydzień znoŭ nazirajecca rost ruchu ŭ bary, pavieličeńnie prodažaŭ», — kamientuje Uładź.
Ilustracyjnaje fota. Krynica: hata.by
Barmeny ŭ dobraj kamunikacyi sa svaimi klijentami, asabliva — pastajannymi. Ale ciapier mnohich ź ich daŭno ŭžo nie było bačna za stojkaj.
«Nie sakret, što vialikaja kolkaść naviedvalnikaŭ bara — heta ajcišniki, jakija paśla svajoj manatonnaj pracy chočuć adciahnucca. Mnohija, jak ja razumieju, źjechali ŭ Turcyju, Hruziju, Polšču. Razam z kampanijami i siemjami. A mienavita jany ŭ asnoŭnym rabili nam vyručku. U vyniku my zhubili ŭ rajonie 30% pastajannych klijentaŭ. Varta adznačyć, što adtok naviedvalnikaŭ pačaŭsia raniej — z 2020 hoda. Ën byŭ pastupovy, i ź lutaha praces paskoryŭsia», — tłumačyć surazmoŭca.
Takaja situacyja paŭpłyvała i na zarobki supracoŭnikaŭ:
«Nie budu raskryvać kamiercyjnyja tajamnicy, ale pa zarobkach udaryła mocna, stała mienš čajavych. Raduje, što kalektyŭ u nas družny, niama biahučki kadraŭ: ciažkija časy my pieražyvajem razam, padtrymlivajučy adzin adnaho».
Uładź adznačaje, što barmenam stała ciažej pracavać praz panujučy nastroj ludziej i małaludnaść. Da 22-23 hadzin u barach uvohule pusta: klijenty spačatku pryhladajucca, dzie bolš ludziej, i prychodziać tudy, dzie budzie bolš šumna i viesieła.
«Kali my bačym, što haściam sumna, starajemsia heta vypraŭlać, zadajom atmaśfieru, sprabujem niejak pierajści ŭ kamunikacyi na bolš ciesny ŭzrovień. Pracavać stała ciažej u hetym płanie. Varta taksama ŭličvać, što nie va ŭsich moža być adnolkavaja palityčnaja pazicyja, i važna niejak staracca nie vyjści na kanflikt na hetaj hlebie.
Ale, viadoma, ciažka pražyvać niekalki tydniaŭ (i bolš) u traŭrnym stanie. Ludziam chočacca abstrahavacca ad navin, nie dumać pra drennaje, i jany sami sprabujuć niejak raźviesialicca, choć na chvilinu, tamu pastupova pačali viartacca ŭ bary. Bar z 24 lutaha admianiaŭ usiu rekłamu, śpiecprahramy z dydžejami. Ale ciapier my razumiejem, što jakraz i pavinny dapamahčy ludziam abstrahavacca ad usiaho drennaha», — dadaje barmen.
«Situacyju ŭskładniaje arenda, jakuju, jak praviła, pryviazvajuć da jeŭra»
Što tyčycca koštaŭ, surazmoŭca adznačaje, što pastaŭščyki padniali ceny na jahady i ałkahol amal na 30%, i ciažka zachavać kolišniuju maržynalnaść na peŭnyja pazicyi pa starych cenach.
«Pry hetym bar amal utrymaŭ mnohija košty, pavysiŭšy niešta ŭsiaho na 5-10%, kab sumy nie pužali ludziej (ale heta ŭžo idzie havorka pra pazicyi, jakija mocna vyraśli ŭ košcie). Naprykład, dzie jość malina, rom. Raniej malina kaštavała 10 rubloŭ za kiłahram, a ciapier 30. A dla napojaŭ śviežych jahad treba šmat», — tłumačyć Uładź.
Ilustracyjnaje fota. Krynica: tripadvisor.ru
Surazmoŭca nie bačyć ničoha dziŭnaha ŭ tym, što bary zakryvajucca: tak było zaŭsiody, da kryzisu ŭ tym liku.
«Ale siońnia situacyju ŭskładniaje arenda, jakuju, jak praviła, pryviazvajuć da jeŭra. Miescy ź vialikaj terytoryjaj, naprykład, jak Ayahuasca, što nie tak daŭno začynilisia, nie vyvoziać vypłačvać arendu. Mohuć ža być dni, kali ŭvohule nichto nie pryjdzie. Ci voś jość bary z akcentam na turystaŭ, dzie kurać kaljany, hraje arabskaja muzyka, tančać dziaŭčaty — u ich taksama vialikija prablemy, bo ź miežami prablema».
Kažučy pra budučyniu, Uładź robić staŭku na ŭłasnyja napoi ad kožnaha bara:
«Nas moža čakać bum butlehierstva — bary buduć hatavać ułasnyja napoi — viermuty, džyn i inšaje. Pałova zakryjecca. Uvohule, Zybickaja ŭžo daŭno padzialiłasia na dva łahiery — treba padzialać Zybickuju i Internacyjalnuju. U pieršym łahiery moža adbyvacca brud z bolš pjanaj kolkaściu ludziej, jakija čaściakom vypivajuć naŭprost na vulicy, ładziać deboš. U druhim — starajucca prytrymlivacca kultury».
Uładź maryć, što adnojčy kryzis va ŭsich śfierach skončycca:
«Spadziajusia, my pryjdziem da tych časoŭ, kali ludzi zmohuć nie kłapacicca pra svajo zaŭtra. Adzinym pytańniem budzie: u jaki bar schadzić ź siabrami na šot, dzie patancavać».
Minski dydžej: «U kožnaha treciaha — čamadanny nastroj»
Alaksiej (imia źmienienaje pa prośbie surazmoŭcy) amal kožnyja vychadnyja vystupaje ŭ barach i kłubach u jakaści dydžeja. U dalaravym ekvivalencie paśla pačatku vajny va Ukrainie jaho zarobak źniziŭsia.
«I kali ŭ mianie jašče jon nie zusim značna źniziŭsia, to ad niekatorych kaleh z dj-śfiery ja čuŭ, što ich padkasiła vielmi surjozna».
Apošnija hady pracy Alaksiej apisvaje nastupnym čynam:
«Da sakavika 2020-ha ŭsie było dosyć viesieła i ludna. Viasnoj svaje papraŭki ŭnios kavid, značna skaraciŭšy kolkaść i jakaść publiki va ŭstanovach. Usio praciahvałasia da siaredziny leta. Ź siaredziny červienia i da pačatku pieradvybarčych padziej u žniŭni, zdavałasia, što ŭsie znoŭ nabiraje abaroty.
Ale paśla ŭsie mierapryjemstvy prachodzili ŭ chvaravitaj atmaśfiery pryhniečanaści. Ja dumaju, što niama patreby tłumačyć pryčyny, čamu tak. Pad kaniec minułaha hoda na navahodnija śviaty ludzi znoŭ pačali źbiracca. Ahułam da siaredziny lutaha 2022-ha taksama ŭsie było dobra, na moj pahlad. A voś paśla 24-ha kolkaść naviedvalnikaŭ značna źmienšyłasia. Atmaśfiera nabyła adcieńnie razhublenaści».
Ilustracyjnaje fota
Alaksiej adznačaje, što tendencyja da zakryćcia ŭ barach i kłubach uvieś hety čas zachoŭvałasia. Ale hałoŭny čynam zakryvalisia miescy biez vyraznaj kancepcyi i enierhietyki:
«Tam, dzio jość dobryja arhanizatary, tam usio bolš-mienš. Dla mianie heta, naprykład, imprezy Sašy Nerv Kuźniacova, Arcioma Beverly Pills i toje, što adbyvajecca ŭ Dogma Club».
Pry hetym dydžej akcentuje ŭvahu na tym, što amal u kožnaha treciaha znajomaha — čamadanny nastroj.
«Amal usie maje blizkija siabry źjechali ź Biełarusi. Niechta mianiaje śfieru dziejnaści, vyvučaje niešta novaje — zamiežnyja movy ci dyscyplinu ŭ IT».
Alaksiej spadziajecca, što ŭ jaho lubimych miescaŭ atrymajecca siabie zachavać, kali tolki im jašče nie pavysiać arendu. Ale raźvićcia śfiery ŭ lepšy bok małady čałaviek nie naziraje: ciapier va ŭsich staić zadača — vyžyvańnie.
«Naša Niva» adnaŭlaje zbor danataŭ — padtrymać prosta
Čytajcie jašče:
Kolki vakansij prapanujuć z zarobkam $500 i bolš? Cikavyja ličby
