Da samaj śmierci «Śvistun» vioŭ badziažnicki ład žyćcia i hraŭ na vulicach Hrodna. Muzyka pamior 13 studzienia 2021 hoda, chavali jaho na haradskich mohiłkach «Auls» za košt dziaržavy.
Paśla śmierci «Śvistuna» hrodziency chacieli sabrać srodki na pomnik muzyku, ale za realizacyju ŭziaŭsia Hrodzienski kamnieapracoŭčy zavod. Pradpryjemstva za svoj košt vyrabiła i ŭstalavała pomnik na mahile muzyki.
Liścik lipy — lubimy «instrumient» Stanisłava.
— My vyrašyli svaimi siłami uviekaviečyć pamiać hodnaha čałavieka. Apieratyŭna raspracavali makiet budučaha pomnika i nieŭzabavie pačali realizacyju ŭ cechach zavoda, u vioscy Puškary. Paśla doŭhaj zimy hlinistaja hleba «Aulsa» narešcie dazvoliła zaviaršyć mantaž pamiatnaha kompleksu. U vyniku atrymaŭsia pryhožy manumient ź niekalkich vidaŭ kamieniu. Asobna chočam adznačyć listok lipy, zrobleny na vysokadakładnym stanku z sucelnaha naturalnaha kamieniu piraksienit. Čamu listok lipy? Heta byŭ lubimy «instrumient» Stanisłava, pa jaho słovach, jon najbolš jarka pieradavaŭ miełodyi. Bruk pad listkom asacyjujecca z brukavańniem niekatorych vulic centra Hrodna.
Nu a sama «lehienda» horada staić na na fonie farnaha kaścioła na Savieckaj płoščy, dzie čaściej za ŭsio bačyli «Śvistuna», havorycca ŭ paviedamleńni pradpryjemstva.
Stanisłaŭ Siaminski pačaŭ hrać na vulicach Hrodna ŭ 1990-ch. Vystupaŭ na niezvyčajnym «instrumiencie» — listkach dreŭ. Jon byŭ adzinym u Hrodnie, chto tak dobra hraŭ na liści. «Hrać moža luby, ale vyvodzić miełodyju moža nie kožny. Ja hraju ramansy i tanha», — kazaŭ u 2017 hodzie muzyka pra svajo chobi.
