Ursuła fon der Lajen z mužam i dziećmi. Fota: JOCHEN LUEBKE
Baćkam Ursuły byŭ supracoŭnik Jeŭrakamisii, jaki pracavaŭ u Brusieli — tam Ursuła naradziłasia i žyła da 13 hadoŭ. Doma ŭ siamji fon der Lajen havaryli pa-francuzsku, a vučyłasia budučaja palityk, zhodna z Sadoŭskim, u anhłamoŭnaj škole. Dadajcie da anhlijskaj i francuzskaj moŭ i rodnuju dla fon der Lajien niamieckuju — mienavita joj pieravažna karystajucca ŭ ciapierašniaj siamji Ursuły.
Darečy, pra siamju: muž fon der Lajen — prafiesar miedycyny i biznesmien. U siamji siamiora dziaciej, i heta davoli redkaja źjava dla Hiermanii, dzie siaredni ŭzrovień naradžalnaści — 1,59 dzicia na žančynu. Sama Ursuła — viernica, luteranka.
Pryhoža pra fon der Lajen napisaŭ były dypłamat i palityk Piotra Sadoŭski. Jon źviartaje ŭvahu, što niemka «abviarhaje ŭsie prydumki pra dehradavanuju Jeŭropu hiejaŭ i fieministak». Hladzicie sami: jana, jak piša Sadoŭski, «vyrasła ščaślivaj u siamji, majučy piać bratoŭ, maryła jašče pra siastryčku Rozu, za što braty dali joj mianušku «Rozačka», jakuju nasiła ŭžo budučy aktyŭnym maładym palitykam».
U dadatak da šmatdzietnaści i paśpiachovaj karjery fon der Lajen paśpieła atrymać vielmi dobruju adukacyju. Spačatku jana vyvučała ekanomiku ŭ Łondanskaj škole ekanomiki, a paźniej u Hanoviery pahłyblała viedy ŭ miedycynie i, u pryvatnaści, u hiniekałohii. Maje stupień doktara miedycyny, z čym źviazana nie samaja pryjemnaja dla jaje historyja, jakaja, adnak, nie pakinuła anijakaj plamy na bijahrafii Ursuły. U 2015 hodzie palityka abvinavacili ŭ vykarystańni płahijatu ŭ jaje doktarskaj dysiertacyi, ale paźniej apraŭdali.
Što tyčycca palityčnaj karjery, dla Ursuły ŭsio pačałosia, kali va ŭzroście 43 hadoŭ jana dałučyłasia da kansiervatyŭnaj partyi CHDS/CHSS — toj samaj, jakoj da niadaŭniaha času kiravała Anhieła Mierkiel. Z 2001 pa 2004 hady fon der Lajen zajmała roznyja palityčnyja pasady na rehijanalnym uzroŭni, u tym liku pracavała ŭ parłamiencie ziamli Nižniaja Saksonija. U 2005 hodzie Ursuła padniałasia na fiederalny ŭzrovień — Mierkiel pryznačyła jaje fiederalnym ministram pa spravach siamji, piensijanieraŭ, žančyn i moładzi.
U 2009 hodzie fon der Lajen abrali ŭ Bundestah — centralny niamiecki parłamient. U niamieckim uradzie fon der Lajen paśpieła papracavać spačatku na pasadzie ministra pracy i sacyjalnych adnosin, a potym na pasadzie ministra abarony. Narešcie, u 2018 hodzie Ursuła fon der Lajen uznačaliła Jeŭrakamisiju.
U čas z pačatku vajny va Ukrainie niemka ŭsialak padtrymlivaje hetuju krainu. Jašče ŭ noč na 28 lutaha jana ŭpieršyniu sazvaniłasia ź Zialenskim i pahutaryła ź im pra abaronu Ukrainy i makrafinansavuju dapamohu joj. Fon der Lajen padtrymlivaje ideju ŭstupleńnia Ukrainy ŭ ES: «Hetaja kraina — adna z nas, i my žadajem bačyć jaje ŭ jeŭrapiejskaj siamji». Praces dałučeńnia Ukrainy da ES, jak kaža palityk, moža pajści pa niestandartnym płanie: «Jany (Ukraina — «NN») u ekstraardynarnaj situacyi, dzie my pavinny prymać niezvyčajnyja miery».
Fon der Lajen taksama vykazvałasia i pra sankcyi ŭ rasijski bok, a taksama pra toje, jak Maskva sprabuje hetyja sankcyi abyści. Naprykład, pra žadańnie Kramla atrymlivać ad Jeŭropy hrošy za enierhanośbity ŭ rublach: «My nie dla taho ŭvodzili sankcyi, kab ich abychodzić. Prajšoŭ čas, kali enierhiju možna było vykarystoŭvać dla šantažu».
U pačatku krasavika kiraŭnica Jeŭrakamii naviedała Kijeŭ, dzie sustrełasia z ukrainskim kiraŭnictvam, i navat była ŭ Bučy — ad hetaha trahičnaha miesca ŭražańni ŭ fon der Lajen adnaznačnyja: «Praktyčna nie isnuje słovaŭ, jakija mahli b pieradać toj žach, jaki ja bačyła. Ale heta nadaje mnie rašučaści i sił zmahacca sa strašnaj vajnoj Pucina i padtrymlivać Ukrainu».
Piotra Sadoŭski pryhadvaje cikavy fakt pra fon der Lajen: «Jak napisaŭ adzin zachodni žurnalist, paśla naviedvańnia Ukrainy jana nibyta skazała ŭ vuzkim kole: ja razumieju histaryčny kompleks kryŭdy niemcaŭ i źjaŭleńnie Hitlera paśla parazy ŭ Pieršaj suśvietnaj vajnie, jaki naradziŭ toje, za što nam niemcam soramna da siońnia. A čaho nie chapaje Pucinu? Usiaho chapaje: terytoryi, ułady, pryrodnych resursaŭ… Hetyja nibyta 80% padtrymki — zahadka ruskaj dušy».
«Naša Niva» adnaŭlaje zbor danataŭ — padtrymać prosta
Čytajcie jašče:
Pucin i Łukašenka zapłaciać za adbudovu Ukrainy? Voś jak heta moža być
Ministr zamiežnych spraŭ Hiermanii: Ukrainie treba pastaŭlać ciažkuju zbroju, heta bolš čym vidavočna
