Ihar Stasievič. Fota: FK «Čajka» / Twitter
Zachar Vołkaŭ
Fota: FK «Chimki» / Twitter
Vołkaŭ — jašče małady pa biełaruskich mierkach hulec (jamu 24 hady), ale ž uzrost nie pieraškodziŭ Zacharu trapić u niepryhožuju historyju, źviazanuju z damoŭnymi matčami.
Spačatku ŭsio išło dobra: Vołkaŭ pačynaŭ karjeru ŭ kłubie «Viciebsk», taksama sprabavaŭ siabie ŭ «Oršy» i «Naftanie». U 2018 hodzie pierajšoŭ u lepšy na toj čas kłub krainy — BATE, hulaŭ ź im u hrupie Lihi Jeŭropy. Navat debiutavaŭ u darosłaj nacyjanalnaj zbornaj i adyhraŭ ceły matč (praŭda, tavaryski) suprać kamandy Uelsa.
A potym pačalisia prablemy. U studzieni 2020 hoda Śledčy kamitet pieradaŭ u ajčynnuju Fiederacyju futboła danyja pra tych, kaho abvinavacili ŭ arhanizacyi damoŭnych matčaŭ i ŭdziele ŭ ich u 2017-2018 hadach, i imia Zachara Vołkava akazałasia samym zornym u hetym śpisie. Śćviardžałasia, što ŭ 2017 hodzie Vołkaŭ, na toj čas hulec «Naftana», atrymaŭ 1450 dalaraŭ za toje, kab jaho kamanda prajhrała «Krumkačam» u hulni biełaruskaha Kubka (jana i prajhrała, darečy).
Chutka stała viadoma, što Vołkaŭ vyzvaleny ad kryminalnaj adkaznaści za damoŭny matč — maŭlaŭ, jon pryznaŭ vinu i aktyŭna supracoŭničaŭ sa śledstvam. Ale ž, kali ŭ krasaviku 2020 hoda Zachar raspaviadaŭ jak śviedka pra tuju hulniu na sudzie, pakajańnia ad jaho nie pačuli. Były abaronca «Naftana» raspaviadaŭ, nibyta ŭ hulni z «Krumkačami» jon vioŭ siabie jak zvyčajna, i 1450 dalaraŭ nijak nie paŭpłyvali na jaho dziejańni na poli.
Dziŭnyja pakazańni Vołkava šmat abmiarkoŭvali, u tym liku ŭ miedyja. Z adnaho boku, škada pierśpiektyŭnaha futbalista, a ź inšaha — kali my darujem Vołkavu damoŭny matč, ci budzie heta spraviadliva? Tak ci inakš, u žniŭni 2020-ha Zachar atrymaŭ ad biełaruskaj Fiederacyi futboła štraf u 200 bazavych i dyskvalifikacyju na dva hady, praz dva miesiacy jaho zabanili i na ŭsich hulniach pad ehidaj FIFA — to-bok pakinuli na dva hady biez prafiesijnaha futboła.
Vołkaŭ zastaŭsia pad kryłom BATE i praciahnuŭ treniravacca ŭ kłubie. Vioŭ siabie cicha i nie ŭdzielničaŭ u vakołpratesnych aktyŭnaściach — naadvarot, u krasaviku 2021 hoda pastaviŭ podpis pad praŭładnym adkrytym listom spartoŭcaŭ.
I tut staronka pieraharnułasia: vosieńniu 2021 hoda, kali pieršuju pałovu bana Zachar užo adbyŭ, kantrolna-dyscyplinarny kamitet Fiederacyi futboła dazvoliŭ jamu adkłaści druhi hod bana na dva hady.
Zimoj stała viadoma, što Zacharam cikaviacca «Chimki» z rasijskaj premjer-lihi. Mieć u kamandzie hulca, źviazanaha z damoŭnymi matčami, — heta, viadoma, ryzyka dla reputacyi, ale kiraŭnictva novaha kłuba heta nie nadta chvaluje. Sportdyrektar «Chimak» Dźmitryj Uljanaŭ tłumačyŭ heta tak: «Zrazumieła, pierad pačatkam pieramoŭ my ŭličyli ŭsie reputacyjnyja ryzyki, ale nam našmat važniej jaho futbolnyja jakaści, čym historyja, u jakuju jon byŭ uciahnuty».
A ŭ sakaviku hetaha hoda Vołkaŭ jašče i viarnuŭsia ŭ nacyjanalnuju zbornuju — jaho vyklikali na tavaryskija hulni ź Indyjaj i Bachrejnam (tak, zaraz u biełaruskaj nacyjanałki takija supierniki). Za paru miesiacaŭ da hetaha hałoŭny trenier zbornaj Hieorhij Kandraćjeŭ prakamientavaŭ tuju samuju historyju z damoŭnym matčam, śćviardžajučy, što «ŭsia kamanda pajšła na heta, jon [Vołkaŭ] nie moh admovicca».
Ihar Stasievič
Fota: belnaviny.com
Heta były hulec BATE, čałaviek, jaki byŭ kapitanam kamandy i moh pretendavać na status lehiendy kłuba — takoj ža, jakoj dla BATE źjaŭlajecca Vital Radzivonaŭ. Ale ž Stasievič u studzieni 2021 hoda pierajšoŭ z BATE ŭ salihorski «Šachcior».
Tut patrebna nievialikaje tłumačeńnie. Paśla taho jak u 2018 hodzie pamior zasnavalnik BATE Anatol Kapski, kłub akazaŭsia ŭ hłybokim kryzisie. «Šachcior» ža, naadvarot, na spravy nie skardzicca — u 2020 hodzie kłub vyjhraŭ čempijanat krainy. Čym mienš trafiejaŭ, tym mienš hrošaj u kłubie i, adpaviedna, tym mienš zarobki. Voś čamu, raspaviadajučy pra sychod u «Šachcior» Stasieviča i jašče adnaho važnaha dla kłuba hulca, Jahora Filipienki, ciapierašni kiraŭnik BATE Andrej Kapski adkryta skazaŭ: «Ja ščyra chacieŭ zachavać ich, ale zaraz treba žyć pa srodkach». Vidać, Stasieviču taki varyjant nie padyjšoŭ. U futbolnych kołach nazyvali i dakładnyja ličby: maŭlaŭ, u Salihorsku Stasieviču abiacali pa 18,5 tysiačy dalaraŭ (i heta biez uliku bonusaŭ), u BATE — 15 tysiač dalaraŭ.
U kancy 2021 hoda, kali dziaržava ŭviała limity na zarobki futbalistaŭ, stała viadoma, što pra 18,5 tysiačy dalaraŭ dla Stasieviča razmova bolš nie idzie. Kab nie parušać limity, Ihar pavinien byŭ admovicca ad takoha zarobku — krok, na jaki Stasievič nie pajšoŭ, i vybraŭ zamiest hetaha razryŭ kantrakta.
Tak 36-hadovy hulec (a heta ŭžo pačesny ŭzrost dla bolšaści futbalistaŭ) akazaŭsia ŭ kamandzie «Čajka» 10-tysiačnaha siała Piasčanakopskaje ŭ Rastoŭskaj vobłaści. Razam sa Stasievičam u «Čajcy» hulaje jašče adzin biełarus — Alaksiej Haŭryłovič.
Heta kamanda zusim nie z tymi zadačami, što mielisia ŭ biełaruskim futbole: kali ŭ ajčynnych kłubach jašče možna kazać chacia b pra adboračnyja hulni ŭ jeŭrakubkach, to dla «Čajki» hałoŭnaja meta — padniacca na ŭzrovień vyšej u rasijskim futbole (u Pieršynstva FNŁ). Cikava, što «Čajka» ŭžo tam vystupała, ale ž letam 2021 hoda straciła prava tam hulać praz abvinavačvańnie ŭ arhanizacyi damoŭnych matčaŭ.
Vital Lisakovič
Fota: pressball.by
Adna z hałoŭnych nadziej biełaruskaha futboła — viadoma, kali pra niejkuju nadzieju tut jašče mahčyma havaryć. Vital Lisakovič pačynaŭ karjeru ŭ salihorskim «Šachciory», paźniej hulaŭ u charvackich kłubach. U lipieni 2020 hoda maskoŭki «Łakamatyŭ» nabyŭ biełarusa za miljon jeŭra (ci, pa inšych danych, za paŭtary) — suma, jakuju nie nadta časta pabačyš u ajčynnych futbolnych realijach.
Stabilnaj hulnia Lisakoviča ŭ «Łoka» nie była. Jon nie mieŭ pastajannaha miesca ŭ startavym składzie i čaściej vychodziŭ na zamienu, ale ž pry hetym časam pakazvaŭ vynik. U hrupavym etapie Lihi čempijonaŭ Lisakovič zabiŭ «Zalcburhu», radavaŭ hałami ŭ varoty CSKA i «Ufy». Ale ž heta byli tolki epizody.
Hetaj zimoj Vital źmianiŭ kłub. Za forvarda vykłaŭ kruhleńkuju sumu (1-1,2 miljona dalaraŭ) kazanski «Rubin», i pakul što ŭ Lisakoviča ŭ novaj kamandzie ŭsio atrymoŭvajecca. Jon vystupaje ŭ asnoŭnym składzie «Rubina», staŭ adkaznym za vykanańnie pienalci i, narešcie, zabivaje. Za try hulni ŭ «Rubinie» Lisakovič zabiŭ stolki ž, jak i ŭ 53 hulniach za «Łoka» — piać hałoŭ.
Alaksandr Martynovič
Fota: fckrasnodar.ru
Lehienda «Krasnadara», futbalist, jaki hulaje za hety kłub z 2010 hoda, Martynovič i zaraz zastajecca ŭ kamandzie. Ale ž inšyja zamiežniki nie nadta chočuć hulać za kłub paśla pačatku vajny.
Kali Rasija napała na Ukrainu, kapitan «Krasnadara» Hžehaž Krychoviak sabraŭ amal usich nierasijan, jakija vystupali tady za kłub, — na impravizavanaj naradzie nie było tolki Martynoviča. Astatnija ž lehijaniery adzinahałosna prahałasavali za toje, kab pakinuć rasijski kłub praź situacyju va Ukrainie, pierastali treniravacca i paprasili ŭ kłuba razarvać ź imi kantrakty.
Tak Martynovič zastaŭsia ŭ «Krasnadary» adzinym futbalistam-nierasijaninam. Ale ž, jak paviedamlajecca, Alaksandr i sam chutka pakinie kłub: letam sychodzić termin jaho kantrakta z «Krasnadaram», i baki nie płanujuć jaho padaŭžać. Kažuć, što Martynovič razdumvaje nad mahčymaściu skončyć karjeru i što, kali heta adbudziecca, «Krasnadar» moža prapanavać jamu pasadu ŭ kłubie.
Dzianis Łapcieŭ
Fota: football.by
Hulec, u jakoha apošni čas duža nasyčanaje žyćcio — ale, na žal, nie zaŭsiody ŭ futbolnym sensie. U listapadzie 2021 hoda na Dzianisa i jaho žonku zaviali kryminałku. Ale nie čakajcie niejkaj suviazi z palitykaj: pad uvahu siłavikoŭ Łapcieŭ trapiŭ praz kanflikt z ramontnikam. Toj zrabiŭ ramont u kvatery futbalista i atrymaŭ za heta 7 tysiač dalaraŭ, a paźniej da jaho pracy ŭźnikli pretenzii, i niezadavolenyja klijenty zapatrabavali viarnuć hrošy, pryčym jany navat nibyta vykarystoŭvali hvałt.
U futbole spravy ŭ Łapcieva pajšli nie lepš. Da pieršych miesiacaŭ 2022 hoda jon naležaŭ kłubu «Ruch», źviazanamu z prałukašenkaŭskim biznesoŭcam Alaksandram Zajcavym. Ale ž praz sankcyi ŭ bok biełaruskaha režymu, jakich u apošnija miesiacy stała značna bolš, haspadar «Ruchu» vymušany ekanomić. Mieć kłub vyšejšaj lihi — davoli darahaja zabava, tamu «Ruch» spačatku pieraviali ŭ treci dyvizijon, a potym kamanda admoviłasia ad udziełu i tam.
Novuju pracu Łapcieŭ znajšoŭ u maskoŭskim «Tarpieda» — u kłubie Pieršaha dyvizijona FNŁ. Razam ź im tam hulaje jašče adzin biełarus z byłoha «Ruchu» — Pavieł Siadźko. Pakul u Łapcieva ŭsio atrymlivajecca: za šeść hulniaŭ za «Tarpieda» jon zabiŭ užo čatyry hały.
Chto jašče
Heta daloka nie poŭny śpis biełarusaŭ, jakija vystupajuć zaraz u rasijskich kłubach. Za maskoŭski «Łakamatyŭ» vystupaje Kirył Zinovič, za «Rastoŭ» — Alaksandr Sielava. Varoty «Ufy» abaraniaje Anton Čyčkan, u «Arenburhu» ažno try biełarusy — Michaił Sivakoŭ, Kirył Piačenin, Juryj Kavaloŭ, i hetak dalej. Jość biełarusy i ŭ rasijskich kamandach inšych vidaŭ sportu — u tym ža chakiei, naprykład.
«Naša Niva» adnaŭlaje zbor danataŭ — padtrymać prosta
Čytajcie jašče:
Najlepšaha treniera Biełarusi pa futbole zvolnili praz 125 dzion paśla pryznačeńnia ŭ «Šachcior». Jon ščyra kazaŭ, što choča zarabić na kvateru i mašynu
Biełarus vyjhraŭ na Kipry turnir pa pokiery i razharnuŭ ściah Ukrainy
