Dydžytał-mastak skinuŭ fota rasijskaj vajskovaj techniki «Biełaruskamu Hajunu»
Viktar Kulinka
Śledčy kamitet paviedamlaje ab zatrymańni 31-hadovaha tvorčaha rabotnika, jaki «nakiroŭvaŭ antyvajennym kanałam fatahrafii i videafajły ab ruchu transpartnych srodkaŭ vajskovaha pryznačeńnia».
Pa infarmacyi «Viasny», dydžytał-mastak Viktar Kulinka byŭ zatrymany 30 sakavika. Na praŭładnych tielehram-kanałach źjaviłasia «pakajannaje» videa, dzie jon raspaviadaje, što sfatahrafavaŭ kałonu vajskovaj techniki rasijskich vojskaŭ, jakaja nakiroŭvałasia ŭ bok Homiela. Pavodle jaho słoŭ, fota jon pieradaŭ u tielehram-kanał «Biełaruski Hajun».
Śćviardžajecca, što jon dasłaŭ fota kałony vajskovaj techniki ŭ bot telehram-kanała «Biełaruski Hajun», jaki 16 sakavika byŭ pryznany ekstremisckim farmavańniem. Pavodle papiaredniaj infarmacyi, Viktaru inkryminujecca art. 361-4 i art. 361-1 Kryminalnaha kodeksa (udzieł u ekstremisckim farmavańni) za rehistracyju ŭ płanie «Pieramoha», jakuju siłaviki vyjavili ŭ telefonie.
Mama niepaŭnaletniaha dziciaci adpraviła Nexta videa ź viertalotami
U Śledčym kamitecie paviedamili, što abvinavačańnie ŭ sadziejničańni ekstremisckaj dziejnaści pradjaŭlenaje 28-hadovaj maci niepaŭnaletniaha dziciaci z Mazyra. Pavodle viersii abvinavačvańnia, jana «źniała videa ź pieramiaščeńniem viertalotaŭ dla anhažavanaha destruktyŭnaha resursu».
U dadzieny momant žančyna znachodzicca ŭ śledčym izalatary Homiela. Pavodle infarmacyi pravaabaroncaŭ, pad apisańnie padychodzić Hanna Pyšnik (Čympaješ). Jaje zatrymali za adpraŭku videa ŭ Nexta.
Byłaja nastaŭnica z Chojnikaŭ skinuła videa «Biełaruskamu Hajunu»
Iryna Abdukieryna
49-hadovuju byłuju nastaŭnicu z Chojnikaŭ Irynu Abdukierynu zatrymali ranicaj 5 krasavika na leciščy. Padstavaj dla zatrymańnia stała nibyta toje, što žančyna zapisała na videa pieramiaščeńnie kałony rasijskaj vajskovaj techniki i pierasłała videa ŭ tielehram-kanał «Biełaruski Hajun». Pra heta havorycca ŭ «pakajannym» videa ź joj.
Prytym u hetym samym videa było paznačana, što Irynu zvolnili z navučalnaj ustanovy ŭ 2020 hodzie, choć jana syšła adtul pa svaim žadańni jašče ŭ 2016-m.
10 krasavika žančynie pradjavili abvinavačvańnie adrazu pa dvuch artykułach Kryminalnaha kodeksa: 361-1 (udzieł u ekstremisckim farmavańni) i 361-4 (sadziejničańnie ekstremisckaj dziejnaści).
Ciapier Iryna znachodzicca ŭ Homielskim SIZA. Jak paviedamlajuć mahiloŭskija pravaabaroncy, padčas utrymańnia ŭ Chojnickim IČU paŭstali vialikija prablemy ź pieradačaj dla Iryny. Ni ŭ čaćvier, ni ŭ piatnicu nieabchodnyja pradmiety Irynie nie pieradali. U niadzielu načalnik izalatara časovaha ŭtrymańnia taksama admoviŭsia prymać pieradaču dla zatrymanaj.
Žychar Homiela dasłaŭ u «Biełaruś hałaŭnoha mozhu» videa techniki na vakzale
Supracoŭniki HUBAZiKa zatrymali 43-hadovaha žychara Homiela Aleha Baradzina 1 krasavika. Jak miarkujecca, zaraz pra jaho i paviedamlaje SK. Pryčyna — mužčyna źniaŭ na vakzale abłasnoha centra videa z vajskovaj technikaj i adpraviŭ «ekstremisckamu telehram-kanału».
Aleh Baradzin
«Pakajannaje» videa ź im źjaviłasia na praŭładnych tielehram-kanałach. «Zrabiŭ videa na vakzale Homiela z vajskoŭcami Rasijskaj Fiederacyi i skinuŭ heta videa ŭ čat-bot kanała «Biełaruś hałaŭnoha mozhu», — kaža na videa mužčyna.
Taksama fihurantam kryminalnaj spravy pa art. 361-4 Kryminalnaha kodeksa staŭ niepaŭnaletni navučeniec prafiesijnaha liceju. Paviedamlajecca, što ŭradženiec Mazyra skinuŭ u «ekstremiscki» kanał videa ź pieramiaščeńniem vajskovaj techniki. Jon uziaty pad vartu. Proźvišča i miescaznachodžańnie chłopca pakul nieviadomyja.
U paviedamleńni Śledčaha kamiteta adznačajecca, što ŭ ramkach č. 1 art. 361-4 Kryminalnaha kodeksa zatrymany 37-hadovy homielski taksist i žychar Homiela va ŭzroście 30 hadoŭ. Ich proźviščy i miescaznachodžańnie taksama vyśviatlajucca.
