Pa zapisie možna vykazać zdahadku, što apublikavany frahmient źjaŭlajecca častkaj bolš praciahłaha dyjałohu.
Mužčynam akazaŭsia Raman Bykoŭski, były bajec terminovaj słužby Rashvardyi, a zatym — vajskoviec 108-ha hvardziejskaha desantna-šturmavoha pałka, jaki ŭdzielničaŭ u aneksii Kryma. Mienavita siudy jon nie tak daŭno pieravioz svaju siamju z Rasii.
«Mnie ničoha nie kažy!»
— Tak, ty davaj tam, ukrainskich bab hvałtuj, tak? I mnie ničoha nie kažy. Zrazumieła? (śmiajacca).
— Hvałtavać i tabie ničoha nie kazać?
— Tak, kab ja ničoha nie viedała. A što? (śmiajacca).
— Možna, tak?
— Tak, dazvalaju. Tolki zaścierahajsia!
— Dobra.
Va Ukrainie z pačatku vajny zafiksavana mnostva śviedčańniaŭ seksualnaha hvałtu z boku rasijskich vajskoŭcaŭ u dačynieńni da ŭkrainskich hramadzian.
8 krasavika Ludmiła Dzianisava, upaŭnavažanaja pa pravach čałavieka va Ukrainie, źviarnułasia ŭ AAN z prośbaj rasśledavać takija vypadki — zhvałtavańnia 14-hadovaj dziaŭčynki, 11-hadovaha chłopčyka i 20-hadovaj žančyny ŭ Bučy i Irpieni Kijeŭskaj vobłaści.
12 krasavika žycharka vioski Małaja Rohań u Charkaŭskaj vobłaści raspaviała telekanału «Nastojaŝieje vriemia», jak rasijski sałdat zabraŭ jaje dačku i zhvałciŭ ŭ škole.
Pravaabarončaja arhanizacyja Human Rights Watch jašče 4 sakavika apublikavała dakład, u jakim zhadvajucca vypadki zhvałtavańniaŭ u Maryupali i Čarnihaŭskaj vobłaści.
Žurnalisty ahienctva France Press pahavaryli z žančynaj z akupavanaha Rasijaj Chiersona, jakaja raskazała im, što jaje zhvałtavali rasijskija žaŭniery. «Jany prosta moŭčki pavalili mianie na łožak, moŭčki raspranuli. A čaćviortaj hadzinie ranicy jany prosta syšli. Jany pamiž saboj nie razmaŭlali. Prosta abzyvali chachłuškaj, banderaŭkaj. I potym skazali: «Dobra, usio, nam na post zastupać. My pajšli».
Dyvizija imia Dziaržynskaha
Volha i Raman Bykoŭskija
Mienavita ŭ Chiersonskaj vobłaści ŭ krasaviku 2022 hoda, jak udałosia daviedacca «Schiemam», znachodziŭsia ŭ momant razmovy pa telefonie rasijanin, jakomu jahonaja žonka «dazvoliła» hvałtavać «ukrainskich bab».
Ad krynic u pravaachoŭnych orhanach Ukrainy žurnalistam «Schiemaŭ» stali viadomyja telefonnyja numary abanientaŭ, jakija ŭdzielničali ŭ hetaj hutarcy.
Jak vyśvietliła Radyjo Svaboda, hetyja numary vykarystoŭvalisia pry rehistracyi dvuch akaŭntaŭ u sacyjalnaj sietcy «VKontaktie»: na imia 27-hadovaha Ramana Bykoŭskaha i Volhi Bykoŭskaj, u dziavoctvie — Piniasavaj. Muž i žonka vychoŭvajuć syna, jamu 4 hady.
Raman i Volha rodam z Arła. Akaŭnt Bykoŭskaha začynieny, ale jon jość u siabrach u Alaksieja Zabrusava, i ź ich sumiesnych fatahrafij vidać, što jany razam prachodzili ŭ 2016 hodzie terminovuju słužbu ŭ asobnaj dyvizii apieratyŭnaha pryznačeńnia imia Dziaržynskaha vojskaŭ Nacyjanalnaj hvardyi Rasii.
U Zabrusava taksama jość fatahrafii, jakija možna hieałakavać jak źniatyja ŭ Bałašysie, na terytoryi štaba dyvizii.
Pierajezd u Krym
«Dačakałasia!» — piša Volha Bykoŭskaja pra Ramana, publikujučy ich sumiesnuju fatahrafiju, zroblenuju 26 kastryčnika 2016 hoda paśla jaho demabilizacyi. Abjavy na sajcie «Avita», jakija Raman Bykoŭski raźmiaščaŭ u 2018 hodzie, dazvalajuć zrabić vysnovu, što paśla zakančeńnia terminovaj słužby jany z žonkaj i synam pierabralisia ŭ anieksavany Rasijaj Krym.
Adsiul ža, ź Fieadosii, nieŭzabavie pačynaje publikavać fatahrafii ŭ svaich «Adnakłaśnikach» i maci Bykoŭskaha, Iryna. Tak, niekalki zdymkaŭ zroblenyja la miascovaj słavutaści — «Fantana zakachanych».
Z kamientaroŭ Volhi Bykoŭskaj u «VKontaktie» možna zrabić vysnovu, što siamja žyvie ŭ Fieadosii i ciapier: naprykład, 19 studzienia 2022 hoda Volha skardziłasia, što nie zmahła trapić na pryjom da miascovaha kaśmietołaha, a 13 lutaha adhuknułasia na zaklik dapamahčy hrašyma na apieracyju sabaku, jakoha źbiła mašyna ŭ centry hetaha horada.
Adna z fatahrafij u «Adnakłaśnikach» Iryny Bykoŭskaj apublikavanaja 10 lutaha 2018 hoda i moža tłumačyć, jak jaje syn trapiŭ u 2022 hodzie ŭ Chiersonskuju vobłaść, dzie jahonuju razmovu z žonkaj pra «ŭkrainskich bab» pierachapiła SBU.
Na hetym zdymku Raman Bykoŭski siadzić u vajskovaj formie la šłahbaŭma z aŭtamatam Kałašnikava. Na rukavie dobra bačny šaŭron — z dapamohaj rasśledavalnaj hrupy Conflict Intelligence Team nam udałosia vyznačyć, što Bykoŭski ŭ toj čas słužyŭ u dysłakavanym u Navarasijsku 108-m hvardziejskim desantna-šturmavym pałku, jaki ŭvachodzić u skład 7-j hvardziejskaj desantna-šturmavoj dyvizii. Jon zaklučyŭ kantrakt ź Ministerstvam abarony nie paźniej za luty 2018 hoda.
«Vinšuju svajho lubimaha syna sa śviatam Dniom Abaroncy Ajčyny, žadaju ŭdačy, zdaroŭja, pośpiechaŭ va ŭsim!», — piša Iryna Bykoŭskaja ŭ svaim akaŭncie ŭ «VKontaktie» praz hod, 22 lutaha 2019 hoda, vykładvajučy jahony fotazdymak u vajskovaj formie na bierazie mora.
Pra ŭdzieł desantnikaŭ 108-ha desantna-šturmavoha pałka ŭ vajnie z Ukrainaj raniej nie paviedamlałasia, zatoje dobra viadomaja rola hetaha padraździaleńnia ŭ anieksii Kryma: vajskoŭcy 108-ha DŠP aktyŭna fatahrafavalisia na paŭvostravie viasnoj 2014 hoda i vykładali hetyja zdymki ŭ sacsietki. Udzielničaŭ połk i ŭ siryjskaj kampanii.
Ci słužyć Bykoŭski tam ciapier, nieviadoma.
«Jon u Sievastopali ŭ špitali lažyć»
Radyjo Svaboda patelefanavała Ramanu Bykoŭskamu. Jon paćvierdziŭ, što heta jahonaje imia i proźvišča, a na pytańnie, ci zastajecca jon u Chiersonskaj vobłaści, adkazaŭ admoŭna i skazaŭ, što znachodzicca ŭ Sievastopali. Spytaŭšy, chto jamu telefanuje, i daviedaŭšysia, što heta žurnalist, Bykoŭski skazaŭ, što hołas na apublikavanaj SBU prasłuchoŭcy jamu nie naležyć.
Zapis razmovy, zrobleny Radyjo Svaboda, pakazvaje identyčnaść jaho hołasa tamu, jaki hučyć u hutarcy pra «ŭkrainskich bab».
My datelefanavalisia i da Volhi Bykoŭskaj. Hołas žančyny taksama całkam supadaje z hołasam apublikavanaha ŭkrainskaj śpiecsłužbaj aŭdyjozapisu. Volha Bykoŭskaja paćvierdziła Radyjo Svaboda, što jaje muž znachodzicca ŭ Sievastopali, udakładniŭšy, što jon lečycca ŭ špitali paśla ranieńnia. Pa słovach Volhi, dzie mienavita byŭ paranieny Raman Bykoŭski, jana nie viedaje.
Paśla hetaha adkazu Volha Bykoŭskaja pierapyniła razmovu i stała skidać dalejšyja zvanki. Na našyja paviedamleńni ŭ sacyjalnych sietkach ni Raman Bykoŭski, ni jaho žonka nie adkazali.
