«Vizavy centr Ispanii začynieny, u tym liku dla vydačy hramadzianskich pašpartoŭ, u suviazi z abmiežavańniem dostupu ŭ pamiaškańni z boku arendadaŭcy — «JukiejDeviełopmient», — napisana ŭ paviedamleńni centra.
Budynak, ukazany tam, zakryty ŭ tym liku i dla vydačy pašpartoŭ. Kab viarnuć dakumienty, biełarusam prapanujuć źviartacca da arendadaŭcy abo ŭ dziaržorhany.
Pamiaškańnie ispanskaha vizavaha centra znachodzicca ŭ budynku biznes-centra «Kaskad-Alfa». U administracyi biznes-centra nam rastłumačyli, što dostup tudy pradstaŭnikam vizavaha centra byŭ abmiežavany z-za doŭhu za arendu.
— Pamiž nami i kampanijaj «Biełes Biuaj» — jurydyčnaj asobaj vizavaha centra — jość dahavor arendy pamiaškańniaŭ. 5 krasavika ŭ suviazi ź sistematyčnymi niepłaciažami pa hetaj damovie, jakija praciahvajucca ŭžo nie pieršy hod, my pryniali rašeńnie nakiravać u adras arandatara paviedamleńnie ab spynieńni dahavora ŭ adnabakovym paradku. Siońnia jany pavinny nam hetyja pamiaškańni z arendy viarnuć, — rastłumačyli ŭ administracyi «Kaskad-Alfa».
Jakuju mienavita sumu vinien ispanski vizavy centr za arendu, nie ŭdakładnili, tolki paviedamili: «Jana vialikaja».
U adkaz na pytańnie pra toje, što budzie z dakumientami ludziej, jakija zastalisia ŭ zakrytym pamiaškańni vizavaha centra, u «Kaskad-Alfa» paraili źviartacca da pradstaŭnikoŭ centra.
— Pradstaŭniki zmohuć zajści ŭ budynak, kab, naprykład, zabrać dakumienty, jakija tam zastalisia?
— Nami nakiravanaje na ich adras apaviaščeńnie ab spynieńni z 18 krasavika 2022 hoda dostupu ŭ pamiaškańnie piersanału i naviedvalnikaŭ.
— Dyk, a što budzie z dakumientami ludziej?
— Na hety momant ja nie mahu ničoha kamientavać z hetaj nahody. My pašparty nie prymajem. U nas adnosiny z arandataram. U našaj jurydyčnaj asoby nijakich abaviazkaŭ pierad ludźmi, jakija padali dakumienty na vizy, niama, — adkazvajuć u administracyi biznes-centra. — Siońnia my razmaŭlali z pradstaŭnikom vizavaha centra, ale nijakich prapanoŭ ź ich boku niama. Jany prosta prosiać, kab my prałanhiravali ź imi adnosiny da 30 krasavika. Rašeńnie pa hetaj situacyi my pakul nie pryniali.
Krychu paźniej administracyja «Kaskad-Alfa» paviedamiła, što pad ich budynkam «sabrałasia ŭžo kala 70 čałaviek». Ludzi pryjšli pa dakumienty.
— My dziejničajem zhodna z umovami damovy, ale vychodzić, akazalisia zakładnikami situacyi. Nibyta my nie vydajom ludziam pašparty, choć my da hetaha nie majem nijakaha dačynieńnia, — emacyjna adkazvajuć u administracyi «Kaskad-Alfa».
— Vy zmožacie adkryć dźviery, kab pradstaŭniki vizavaha centra pryjšli i zabrali dakumienty klijentaŭ?
— Tak, my nabrali ciapier ich kantaktnuju asobu, jon pakul nie zdymaje, — adkazali nam. — My hatovyja adčynić dźviery, kab ludziam addali pašparty, i kab pradstaŭniki vizavaha centra zabrali nieabchodnuju majomaść i dakumienty, jakija tam jość, i vydavali ich u inšym miescy. Inakš zaŭtra ŭ nas budzie takaja ž situacyja.
Praź niekatory čas u administracyi «Kaskad-Alfa» paviedami, što ŭ 16.00 płanujecca pryjezd pradstaŭnika vizavaha centra. Buduć vydavać pašparty.
