U Asipovičach z padazreńniem na hryp A/H1N1 špitalizavanyja jašče piaciora dziaciej, paviedamiła BiełaPAN namieśnik hałoŭnaha ŭrača Asipovickaj centralnaj rajonnaj balnicy Iryna Iŭčyk.
Pry hetym jana padkreśliła, što dyjahnaz «hryp A/H1N1» u ich łabaratorna jašče nie paćvierdžany.
U hetaj balnicy praciahvajuć znachodzicca troje dziaciej, u jakich dyjahnaz «hryp A/H1N1» byŭ paćvierdžany na minułym tydni. Stan ich zdaroŭja namieśnik hałoŭnaha ŭrača acaniła jak «zdavalniajučy». Dvuch dziaciej, pavodle jaje słoŭ, siońnia vypišuć dadomu.
Iŭčyk padkreśliła, što hryp A/H1N1 «lečycca jak zvyčajny, siezonny», i dla hetaha ŭ balnicy jość usie nieabchodnyja miedykamienty.
Chvoryja dzieci na minułym tydni viarnulisia ź Vialikabrytanii, dzie znachodzilisia na azdaraŭleńni ŭ składzie arhanizavanaj hrupy.
U adpaviednaści z zahadam Ministerstva achovy zdaroŭja Biełarusi, dzieci, jakija viartajucca paśla arhanizavanaha azdaraŭleńnia ŭ krainach niespryjalnych pa hrypie A(H1N1), buduć prachodzić tydniovy karancin. Ciapier da takich krain adniesienyja Italija, Vialikabrytanija, Hiermanija, Ispanija, Irłandyja, Bielhija i Aŭstryja. Na karancinie buduć znachodzicca bolš jak 13 tys. dziaciej, jakija ciapier adpačyvajuć za miažoj i viartajucca ŭ Biełaruś u pieryjad z 23 žniŭnia pa 1 vieraśnia.
Pradstaŭniki Ministerstva achovy zdaroŭja zaklikajuć hramadzian źviartacca da ŭračoŭ pry vyjaŭleńni pieršych prykmietaŭ hrypu: hałaŭnyja i myšačnyja boli, vanity, rasstrojstva straŭnikava‑kišečnaha traktu, łamota ŭ sustavach.
Na hety momant u Biełarusi łabaratorna paćvierdžany čatyry vypadki hrypu A(N1N1). Pieršy fakt zaražeńnia virusam hrypu A(N1N1) byŭ zafiksavany ŭ aśpiranta BDU, hramadzianina Kitaja, jaki viarnuŭsia ŭ Biełaruś z KNR 10 žniŭnia paśla vakacyj. 21 žniŭnia jon vypisaŭsia ź Minskaj haradskoj kliničnaj infiekcyjnaj balnicy.
