Adziarycha asudžany za pieradaču pradstaŭniku «Narodnaha antykryzisnaha ŭpraŭleńnia» i telehram-kanału «Nik i Majk» słužbovaj infarmacyi, jakaja znachodziłasia ŭ jaho rasparadžeńni. Prysud vynies sudździa Alaksandr Voŭk, Adziarycha jaho ŭžo abskardziŭ jak praźmierna strohi, ale biezvynikova. «Viasna» raspaviadaje, što viadoma pa spravie.
Chto taki Siarhiej Adziarycha?
Siarhiej Adziarycha — niadaŭni namieśnik hiendyrektara «BiełTA» pa ideałahičnaj pracy. U jaho padnačaleńni znachodziŭsia 21 supracoŭnik infarmahienctva. Raniej jon pracavaŭ u administracyi Łukašenki i navat atrymlivaŭ ad jaho ŭznaharody. Naprykład, jašče 10 studzienia 2020 hoda jon byŭ siarod rabotnikaŭ dziaržaŭnych ŚMI, chto byŭ uhanaravany padziakaj Łukašenki za «vysoki prafiesijanalizm, značny asabisty ŭniosak u raźvićcio dziaržaŭnaj infarmacyjnaj palityki».
Dakładnaja data zatrymańnia byłoha čynoŭnika nieviadomaja. Ale viadoma, što 8 vieraśnia 2021 hoda pradstaŭniki siłavych struktur skłali rapart pra toje, što «padčas praviadzieńnia kompleksu apieratyŭna-vyšukovych mierapryjemstvaŭ atrymanaja infarmacyja pra toje, što supracoŭnik «BiełTA» Adziarycha, mahčyma, daje telehram-kanału «Nik i Majk» zakrytuju infarmacyju ab pracoŭnym hrafiku Alaksandra Łukašenki».
Nieŭzabavie čynoŭnik byŭ zatrymany. Spravaj zajmalisia supracoŭniki Kamiteta dziaržaŭnaj biaśpieki. Da suda Adziarycha ŭtrymlivaŭsia pad vartaj.
Telehram-kanał «Nik i Majk»
«Nik i Majk» — apazicyjny telehram-kanał z bolš jak 53 tysiačami padpisčykaŭ (u vieraśni 2021 hoda na kanale było bolš za 68 tysiač padpisčykaŭ), stvorany ŭ kastryčniku 2020 hoda. Viadomy šmatlikimi «źlivami» infarmacyi, jakaja tyčycca čynoŭnikaŭ Biełarusi.
2 śniežnia 2021 hoda infarmacyjnaja pradukcyja telehram-kanała «Nik i Majk» była pryznanaja ekstremisckimi materyjałami. Padstavaj dla hetaha stała zajava prakuratury Minska.
30 sakavika 2022 hoda MUS pryznała telehram-kanał «Nik i Majk», a taksama jaho anałahi ŭ inšych sacsietkach (u tym liku ŭ YouTube, Viber i «Adnakłaśnikach»), «ekstremisckim farmavańniem».
U čym abvinavacili byłoha ideołaha?
Pavodle viersii abvinavačvańnia, Siarhiej Adziarycha «ŭstupiŭ u złačynnuju zmovu ź inšaj asobaj, jakaja znachodzicca za miežami Respubliki Biełaruś, źjaŭlajecca adnym z kiraŭnikom tak zvanaha «Narodnaha antykryzisnaha ŭpraŭleńnia», ździajśniaje niezakonnuju dziejnaść pa źviaržeńni dziaržaŭnaj ułady ŭ Respublicy Biełaruś i zachopie ŭłady niekanstytucyjnym šlacham, stavić svaimi metami «zabiaśpiečyć mirnaje zaviaršeńnie vykanańnia funkcyj nielehitymnymi orhanami ŭłady, stabilizacyju sistemy kiravańnia krainaj paśla pierachodu ŭłady da naroda», a zadačaj — «likvidacyju pryčynaŭ kryzisu i padrychtoŭku da adstaŭki Łukašenki», a taksama źjaŭlajecca adnym sa stvaralnikaŭ i pradstaŭnikom destruktyŭnaha telehram-kanała «Nik i Majk», metaj jakoha za košt apublikavanych materyjałaŭ u pakazanym telehram-kanale ŭ internecie źjaŭlajecca vyśmiejvańnie i dakarańnie dziejnaha dziaržaŭnaha aparatu kiravańnia, farmavańnie ŭ hramadzian niedavieru da instytutaŭ ułady Respubliki Biełaruś, i za košt hetaha destabilizacyja palityčnaha i hramadskaha stanovišča ŭ Respublicy Biełaruś».
Pry hetym Adziarycha vykazaŭ hatovaść da apublikavańnia ŭ srodkach masavaj infarmacyi Respubliki Biełaruś sistematyčna i kanfidencyjna pieradavać inšaj asobie słužbovuju infarmacyju, što jon atrymlivaje ŭ «BiełTA», a hetaja asoba zapeŭniła Adziarychu, što paśla zachopu dziaržaŭnaj ułady ŭ Biełarusi i źmieny palityčnaha kiraŭnictva dziaržavy zabiaśpiečyć jahonaje znachodžańnie na kiraŭničaj pasadzie i harantuje niedatykalnaść nabytaj im majomaści.
«Adziarycha ŭśviedamlaŭ, što pakazany telehram-kanał nie źjaŭlajecca srodkam masavaj infarmacyi, i źviestki, jakija jon atrymlivaŭ u «BiełTA», adnosiacca da słužbovaj i kamiercyjnaj tajamnicy i nie mohuć pieradavacca da apublikavańnia ŭ im, adnak, vyjšaŭšy za miežy dadzienych pa słužbie pravoŭ i paŭnamoctvaŭ, dziejničajučy ź inšaj asabistaj zacikaŭlenaści, sistematyčna niezakonna pieradavaŭ inšaj asobie źviestki, atrymanyja «BiełTA», na padstavie jakich u vyšejpakazanym telehram-kanale było raźmieščana nie mienš za 58 publikacyj, što źmiaščajuć źviestki pra płanavanyja mierapryjemstvy z udziełam prezidenta, premjer-ministra, vyšejšych słužbovych asob i inšyja źviestki, jakija tyčacca Respubliki Biełaruś», — havorycca ŭ abvinavačvańni.
Zhodna ź viersijaj abvinavačvańnia, dziejańni Adziarychi vyklikali pryčynieńnie istotnaj škody dziaržaŭnym i hramadskim intaresam, jakaja vyjaviłasia ŭ:
- dyskredytacyi zajmanaj im pasady namieśnika hiendyrektara «BiełTA»;
- padryvie aŭtarytetu i dziełavoj reputacyi «BiełTA»;
- dyskredytacyi dziaržaŭnych orhanaŭ i słužbovych asob, jakija dajuć «BiełTA» infarmacyju;
- stvareńni ŭ hramadstvie mierkavańnia ab pradažnaści, niezadavolenaści dziaržaŭnych słužbovych asob i dziaržaŭnych słužboŭcaŭ palityčnym kursam, jaki pravodzicca ŭ Respublicy Biełaruś;
- vymušanaj źmienie pracoŭnych hrafikaŭ prezidenta;
- parušeńni pryvatnaści infarmacyi, što pastupaje «BiełTA».
Na sudzie Siarhiej Adziarycha vinu pryznaŭ całkam i raskajaŭsia ŭ zroblenym.
Što kazaŭ eks-čynoŭnik na sudzie?
Siarhiej Adziarycha na pracesie paćvierdziŭ, što damoviŭsia z pradstaŭnikom «NAU» ab pieradačy im infarmacyi ŭ abmien na toje, što, kali adbudziecca źmiena ŭłady, jon zmoža paźbiehnuć lustracyi i ŭ jaho zachavajecca majomaść, i, jak minimum, jon zastaniecca na zajmanaj im pasadzie. Jon viedaŭ, što pradstaŭnik «NAU», znachodzicca ŭ Polščy, pakolki «z abaviazku svajoj pracy adsočvaŭ dziejnaść apazicyi». U śniežni 2020 hoda Adziarycha ŭbačyŭ infarmacyju, jakuju raniej davaŭ «NAU», u destruktyŭnym telehram-kanale «Nik i Majk», paśla čaho jon zrazumieŭ, što pradstaŭnik «NAU» źviazany z pakazanym telehram-kanałam i vykarystoŭvaje atrymanuju ŭ jaho infarmacyju tam.
«Niahledziačy na heta, pieradavaŭ roznuju infarmacyju, pačynajučy z hrafikaŭ prezidenta i vyšejšych słužbovych asob dziaržavy, zakančvajučy pres-relizami roznych orhanaŭ dziaržaŭnaha kiravańnia».
Da zatrymańnia Adziarychi ŭ telehram-kanale było apublikavana 58 dopisaŭ na padstavie infarmacyi, jakuju jon padavaŭ.
Što raspaviała na sudzie hiendyrektarka «BiełTA»?
Hienieralnaja dyrektarka Iryna Akułovič raspaviała, što supracoŭniki «BiełTA» sapraŭdy mieli infarmacyju pra hrafiki Łukašenki i vyšejšych słužbovych asob Respubliki Biełaruś. Adziarycha ŭ jaje adsutnaść naviedvaŭ administracyju Łukašenki, dzie prachodzili płaniorki, u tym liku ahučvaŭsia jahony hrafik na najbližejšy tydzień.
«Usia pastupajučaja infarmacyja źjaŭlałasia słužbovaj i kamiercyjnaj i nie padlahała raspaŭsiudžvańniu asobam, jakija nie majuć dačynieńnia da arhanizacyi vytvorčaha pracesu «BIEŁTA».
Taksama Akułovič raskazała, što ŭ publikacyjach telehram-kanała «Nik i Majk» była raźmieščanaja infarmacyja, jakaja abmiarkoŭvałasia, u tym liku, na płaniorkach «BiełTA».
«Infarmacyja datyčna pryznačeńnia namieśnika ministra infarmacyi, adnosna kursu biełaruskaha rubla, sankcyj ŭ dačynieńni da «MakDonalds» na płaniorkach nie abmiarkoŭvałasia».
Na pracesie byli dapytanyja jašče čatyry supracoŭniki «BiełTA». Adzin ź ich adznačyŭ, što«dakładna pamiataje, što Adziarycha ŭ jaho prasiŭ infarmacyju pra toje, kali Łukašenka źbiraŭsia na pradpryjemstva «Motavieła»».
3 sakavika 2021 hoda ŭ telehram-kanale «Nik i Majk» źjaviłasia infarmacyja, što «Łukašenka ŭ čaćvier jedzie na «Motavieła». Na nastupny dzień źjaviłasia ŭdakładnieńnie: «Łukašenka pieranios svoj vizit na zavod na 5 sakavika».
Čystasardečnyja pryznańni
Što cikava, u materyjałach spravy jość pratakoł apieratyŭna-vyšukovych mierapryjemstvaŭ «apieratyŭny ekśpierymient», dzie Adziarycha ŭ WhatsApp pierapisvajecca z pradstaŭnikom «NAU» pry apieratyŭnikach.
Taksama ŭ kryminalnaj spravie ŭtrymlivajucca dźvie jaŭki z pakajańniem byłoha namieśnika hiendyrektara «BiełTA», dzie toj pryznajecca ŭ ździajśnieńni złačynstva i pakazvaje akaličnaści jaho ździajśnieńnia, u pieradačy infarmacyi telehram-kanału «Nik i Majk», a taksama raspaviadaje pra datyčnaść da supraćpraŭnaj dziejnaści pradstaŭnika «NAU», ale heta nie było pryznana źmiakčalnaj akaličnaściu.
«Sud nie ŭhledžvaje padstavy dla pryznańnia vykryvańnia inšych udzielnikaŭ złačynstva akaličnaściu, jakaja źmiakčaje adkaznaść Adziarychi, pakolki vykładzienyja im akaličnaści ździajśnieńnia złačynstva, jaho dobraachvotny ŭdzieł u apieratyŭna-vyšukovym mierapryjemstvie «apieratyŭny ekśpierymient» rasceńvajucca sudom jak pryznańnie im viny ŭ ździajśnieńni złačynstva», — pryjšoŭ da vysnovy sudździa Alaksandr Voŭk.
Čym skončyłasia sprava?
Sud prachodziŭ u adkrytym režymie. Sudździa Alaksandr Voŭk 10 studzienia pryznaŭ Siarhieja Adziarychu vinavatym pavodle č. 2 art. 426 Kryminalnaha kodeksa i pryznačyŭ jamu pakarańnie ŭ vyhladzie pazbaŭleńnia voli terminam na piać hadoŭ u kałonii va ŭmovach ahulnaha režymu sa štrafam u pamiery 500 bazavych vieličyń (16 000 rubloŭ). Akramia hetaha, jaho pazbavili prava zajmać pasady, źviazanyja z vykanańniem arhanizacyjna-rasparadčych abaviazkaŭ, na piać hadoŭ.
Sud źniaŭ aryšt ź jahonych dźviuch kvater, a voś aŭtamabil Renault Megane Scenic pakinuty pad aryštam u košt zabieśpiačeńnia vykanańnia prysudu ŭ častcy vypłaty štrafu.
Prysud Adziarycha ŭžo abskardziŭ 15 sakavika ŭ apielacyjnym paradku ŭ Minskim haradskim sudzie. Jon mierkavaŭ, što prysud «niezakonny i nieabhruntavany», a pryznačanaje pakarańnie «vidavočna niespraviadlivaje z pryčyny strohaści». Ale skarhu byłoha čynoŭnika sudovaja kalehija pakinuła biez zadavalnieńnia, a prysud — bieź źmieny. Zhodna z terminami, Adziarychu musili etapavać u kałoniju, adnak pravaabaroncam pakul nieviadoma, u jakuju.
