Viktoryja Azaranka. Fota: AR
Da pačatku turniru zastałosia ŭsiaho dva tydni, ale ciapier pierad jaho arhanizatarami staić pierśpiektyva ŭ karotki čas zabaranić udzieł takich znakamitych spartoŭcaŭ, jak Andrej Rubloŭ ci Viktoryja Azaranka. Usiaho, jak pakul što płanujecca, na Italian Open pavinny vystupić 11 tenisistaŭ z Rasii ci Biełarusi, jakija paspaborničajuć u asnoŭnaj sietcy mužčynskaha i žanočaha adzinočnych turniraŭ.
Upieršyniu pra mahčymaść adchileńnia ad turniru napisali italjanskija miedyja, u tym liku znakamitaja Corriere della Sera. Paźniej blizkija da arhkamitetu krynicy paćvierdzili The Times, što premjer-ministr Italii Maryjo Drahi razhladaje mahčymaść pryniać adpaviednyja jurydyčnyja miery, kab tenisisty z Rasii ci Biełarusi nie mahli spaborničać na turniry, pakul praciahvajecca ŭvarvańnie va Ukrainu. Mahčyma, tenisistam zabaroniać pryjazdžać u Italiju abo ŭdzielničać u prafiesijnych spabornictvach na terytoryi hetaj krainy.
Miž tym, nie ŭsie ŭ tenisnym śviecie pahadzilisia z adchileńniem biełarusaŭ i rasijan ad udziełu va Uimbłdonie, tamu niezrazumieła, jakoj budzie reakcyja na zabaronu ŭdzielničać u Italian Open. Pradstaŭniki mižnarodnych tenisnych asacyjacyj ATP i WTA źbirajucca abmierkavać u bližejšyja dni, jak jany mohuć adkazać na rašeńnie arhkamitetu Uimbłdona i brytanskaj Asacyjacyi łaŭn-tenisa nie puskać biełarusaŭ i rasijan na Uimbłdon.
Ale ž Uimbłdon — heta adzin z turniraŭ Vialikaha šlema, tamu, z ulikam jaho važnaha statusu, tenisnyja asacyjacyi majuć nie tak šmat mahčymaściaŭ paŭpłyvać na arhkamitet. Kali ž biełarusy i rasijanie zastanucca jašče i biez Italian Open, heta pavysić šansy arhanizataraŭ Uimbłdona vyjści pieramožcami z hetaj situacyi, bo heta pakaža, što jany nie adzinyja ŭ svajoj pazicyi.
Mierkavana, što ciapier, paśla zakančeńnia vybaraŭ u Francyi, pad palityčny cisk taksama moža trapić i tenisny turnir «Rałan Haros», jaki pravodzicca ŭ Paryžy.
«Našu Nivu» finansujuć jaje čytačy — padtrymać prosta
Čytajcie taksama:
Biełaruś i Rasija mohuć zrabić alternatyŭnuju Alimpijadu. U SSSR užo heta sprabavali — voś što atrymałasia
