Jaho historyju zapisaŭ prajekt «1906».
Hoha razam z maci Śviatłanaj. Fota tut i dalej: asabisty archiŭ
«Niekalki hadoŭ lažaŭ i ničoha nie rabiŭ»
Hoha Žukaŭ staŭ dyrektaram sałona «Fabryka mrojaŭ» u sakaviku 2021 hoda. Heta siamiejnaja sprava, jakuju raspačała jaho maci 20 hod tamu. Da taho, jak pieradać kiraŭnictva synu, jana zastavałasia niaźmiennaj dyrektarkaj.
«U niejki dzień maci skazała, što joj nadakučyła śfiera pryhažości. Maŭlaŭ, pajedu žyć u rodnuju viosku Jerašova, što ŭ Viciebskaj vobłaści, zajmacca ahraturyzmam, a sałon zakryju. Ale jak zakryć, kali jamu stolki hod i baza klijentaŭ napracavanaja, i majstry pry spravie? Škada ž! Tym bolš, kab adkryć sałon, maci ŭ svoj čas pazyčała hrošy va ŭsich svajakoŭ, a zakuplać abstalavańnie jeździła ŭ Rasiju i Polšču. Tamu ja vyrašyŭ praciahvać jaje spravu: ja ŭ jaje adzin, baćka pamior vosieńniu ad COVID-19».
Hoha skončyŭ ekanamičny fakultet BDU. Paśla niejki čas jany razam z partniorami vyroščvali bulbu i pradavali jaje.
U niuansy kiravańnia sałonam pryjšłosia zanuracca z nula i sa stracham, što moža ničoha nie atrymacca.
«Sprava ŭ tym, što niekalki hod da hetaha ja lažaŭ, amal ničoha nie rabiŭ, ničym nie zajmaŭsia. Ja razumieŭ, što heta niapravilna, i tut taki los — vyratavać sałon maci ad zakryćcia», — tłumačyć naš surazmoŭca.
«U 13 hod niečakana razarvaŭsia sasud u hałavie, adbyłosia krovaźlićcio ŭ mozh»
Samym składanym dla mužčyny, jak jon pryznajecca, stali dakumienty i kamunikacyja z kalektyvam, padbor novaha piersanału. Ale paśla pieražytych prablem sa zdaroŭjem hetyja ciažkaści padavalisia padjomnymi. U bijahrafii Hohi — dva krovaźlićci ŭ mozh, čatyry apieracyi, try trepanacyi čerapa, koma. Ën znoŭ vučyŭsia chadzić i narmalna razmaŭlać.
«Ja žyŭ svabodnym žyćciom, hulaŭ u futboł, valejboł, łaviŭ rybu. A ŭ 13 hod u mianie niečakana razarvaŭsia sasud u hałavie, adbyłosia krovaźlićcio ŭ mozh», — raskazvaje chłopiec, jak pačałasia historyja chvaroby.
«Usio zdaryłasia ŭ vioscy, mianie spačatku pavieźli ŭ miascovuju balnicu, potym u rajonnuju, abłasnuju — nie mahli pastavić dyjahnaz. U Minsku stała zrazumieła, što pryčynaj usiamu — pryrodžanaja AVM (arteryjavienoznaja malfarmacyja — patałahičnaja suviaź pamiž vienami i arteryjami. — Zaŭv. red.). Mnie zrabili apieracyju, paśla jaje ja paŭhoda pralažaŭ u balnicy — staŭ na nohi i pajšoŭ u škołu. Znoŭ pačaŭ žyć, jak zvyčajny čałaviek. Atrymaŭ druhi razrad pa płavańni, pravy kiroŭcy.
Zdavałasia, usio budzie dobra, ale ŭ 2009 hodzie ŭsio paŭtaryłasia, i ŭ horšym vyhladzie. Piać sutak ja prabyŭ u komie, paśla jakoj spačatku ŭspaminaŭ, jak siadzieć, paśla — stajać. Potym pacichu pačaŭ chadzić z chadunkami i mylicami. Da mianie viarnułasia narmalnaje maŭleńnie. I ŭsio heta nasupierak prahnozam niekatorych lekaraŭ, pa jakich ja pavinien byŭ pravieści reštu žyćcia prykutym da łožka».
«Ja na 100% byŭ upeŭnieny ŭ tym, što daktary pamylajucca i ja znoŭ budu chadzić»
Hoha kaža, što jamu dapamahła viera ŭ siabie.
«Ja na 100% byŭ upeŭnieny ŭ tym, što daktary pamylajucca i ja znoŭ budu chadzić. Była tolki dumka, što, moža, z kijočkam zastanusia. Ale na karotkich adlehłaściach i kali nie ślizka, ja siońnia abychodžusia i bieź jaho. U mianie druhaja hrupa invalidnaści, ale heta nijak mianie nie abmiažoŭvaje».
U sałonie prapanujuć usie samyja raspaŭsiudžanyja bjuci-pracedury. Ad stryžak da depilacyi i masažu. Akurat masaž źjaŭlajecca adnoj z samych papularnych pasłuh.
«Masaž tvaru pa sistemie Saviełava-Dziarabina, pry dapamozie jakoha prapracoŭvajucca hłybokija myšcy tvaru, palapšajecca kryvaciok, — naša vizitoŭka. Nie ŭ kryŭdu inšym majstram, ale paśla masažu tvaru ja baču maksimalna ščaślivych i zadavolenych klijentaŭ, z samaj vialikaj uśmieškaj. A jašče adna z našych fišak — ekałahičnaja kaśmietyka, jakaja nie testujecca na žyviołach. Za hetym pilna sočyć administratarka».
Pazityŭnaja rysa času, jakuju adznačaje Hoha: usio bolš biełaruskich mužčyn pačynaje sačyć za saboj i zapisvacca nie tolki na masaž, ale i na piedykiur, manikiur i depilacyju.
Niekatoryja klijenty śpiecyjalna prychodziać u sałon, kab papraktykavacca ŭ biełaruskaj
Z prychodam da spraŭ Hohi ŭ sałonie pačało pašyracca vykarystańnie biełaruskaj movy — jon vyrašyŭ, što ŭ klijentaŭ pavinien być vybar. Siońnia ŭ sałonie pałova majstroŭ — biełaruskamoŭnyja, pałova — ruskamoŭnyja, ale kožny, uklučajučy administrataraŭ, hatovy pierajści na zručnuju klijentam movu kamunikacyi.
«U maim žyćci biełaruskaja źjaviłasia niekalki hod tamu: ja vyrašyŭ, što rodnaja mova jadnaje ludziej. I voś prosta pajšoŭ u kramu i pačaŭ z pradaŭcom razmovu, jak moh. Atrymlivałasia spačatku vielmi drenna, ale ja łupiŭ na trasiancy, nie saromiejučysia. Pastupova było lepš i lepš», — zhadvaje Hoha.
Znajści biełaruskamoŭnaha majstra składaniej, čym ruskamoŭnaha, ale, jak pakazvaje praktyka, usio mahčyma. U vyniku niekatoryja klijenty śpiecyjalna prychodziać u sałon, kab papraktykavacca ŭ biełaruskaj.
«Ludzi papiaredžvajuć, što pakul mohuć tolki na trasiancy, ale vielmi chočuć vyvučyć rodnuju movu i prosiać razmaŭlać ź imi pa-biełarusku», — raskazvaje Hoha.
Svoj novy, jašče adzin sałon na Łahojskim trakcie ŭ Minsku, Hoha chacieŭ zrabić całkam biełaruskamoŭnym. U pamiaškańni ŭžo zrobleny ramont, ale pakul jaho adkryćcio zapavoliłasia: mužčyna vyrašyŭ usio ž skancentravacca na adnoj spravie i viarnucca da novaha prajekta, kali asnoŭny budzie daviedzieny da ideału i źjavicca bolš volnaha času.
Klijentami «Fabryki mrojaŭ» vielmi chutka stali zaŭvažnyja biełaruskamoŭnyja piersony: Hleb Łabadzienka, Andruś Horvat, Siaržuk Doŭhušaŭ, Hanna Sieviaryniec i inšyja. Kahości dyrektar zaprasiŭ sam, niechta pryjšoŭ užo dziakujučy rekłamie.
Muzyka Siarhiej Doŭhušaŭ u sałonie na stryžcy
«Biełaruskaja mova dapamahaje ŭ rekłamie sałona»
Sa stryžkaj Niny Bahinskaj atrymałasia cikavaja pieradhistoryja: Nina nastojliva prasiła pastryhčy jaje pad «nasadku numar dva», amal nałysa, ale majstram było škada jaje vałasoŭ.
«Cyrulnica Darja spačatku pasprabavała jaje nažnicami karotka pastryhčy, ale spadarynia Nina nastojvała da kanca: «Nie! Treba być rašučaj! Tolki pad nasadku numar dva». Žadańnie klijenta — zakon».
Toj samy novy imidž Niny Bahinskaj
Biełaruskaja mova vielmi dapamahaje ŭ rekłamie sałona, kaža Hoha:
«Biełaruskamoŭnyja ludzi adrazu pojduć da nas, a dla ruskamoŭnych takaja rekłama bolš niezvyčajnaja i čaplalnaja. Uvohule, jak pakazvaje praktyka, pasty i pijar-kampanii na biełaruskaj movie u sacsietkach majuć bolšy achop, čym ruskamoŭny kantent».
U budučyni sałon płanuje dadać jašče paru novych pracedur i pašyrycca.
Hoha ź Ninaj Bahinskaj i administratarkaj sałona
«Jak pakazvaje moj prykład, čałaviek moža zrabić što zaŭhodna, jak by składana ni było, niahledziačy na abstaviny vakoł. Prosta treba brać i rabić», — upeŭnieny minčuk.
Čytajcie taksama:
«Nitrataŭ u kałodziežnaj vadzie było amal u 4 razy bolš za normu». Aktyvisty vypuścili knižku ź instrukcyjami, jak listavacca z čynoŭnikami tak, kab jany vyrašali prablemy ŭ vioskach
Top-15 biełaruskich akauntaŭ u Tvitary — kaho varta pačytać
