Uładzimir Kavałkin
— Zabiaśpiečyć možna — ale pytańnie, jakoj jakaści hetaja technika budzie i ź jakich kamplektujučych sabranaja.
Kali my havorym pra ŭzory techniki, charakternyja dla 70—80-ch hadoŭ minułaha stahodździa, to, napeŭna, takuju techniku ŭłasnymi siłami možna vyrabić. Inšaje pytańnie — ci buduć zadavolenyja klijenty takoj jakaściu. Kali my havorym pra ruchaviki, pra karbiuratary, jakija nie adpaviadajuć nijakim normam «Jeŭra» pa ekałahičnaści, pa ekanamičnaści raschodu paliva i hetak dalej.
Kali ž my havorym pra zamienu, dapuścim, Scania abo Volvo, ci jašče niejkich bujnych mižnarodnych brendaŭ, to navat ź impartnymi kamplektujučymi biełaruski MAZ heta zrabić nie zmoža.
Kali ŭžo my havorym pra toje, što ciapier MAZ, MTZ i inšyja biełaruskija pradpryjemstvy vyrablajuć, to tak, tam žalaziaki sami — toje, što možna vykavać, pafarbavać — buduć vyrablenyja z rasijskaha mietału ŭ nas. A voś što tyčycca roznaj elektroniki, to heta ž usio absalutna impartnaje.
Možna vyrabić samazvał MAZ, ale biez dobraj impartnaj pompy vysokaha cisku ad firmy Bosh jon nie pajedzie. Vy možacie vyrabić vialikuju kolkaść žalaziak, jakija nie jeździać. I całkam mahčyma, što, navat źvioŭšy impart u košcie aŭtamabila da 5—10%, možna atrymać situacyju, kali biez kankretna hetaj šrubki abo pompy technika prosta nie zavodzicca i nie jedzie. Voś uvohule i ŭsio impartazamiaščeńnie na hetym zakančvajecca.
Pytańnie va ŭmovach hetych sankcyj — ci budzie mahčymaść dalej vyrablać usio toje, što vyrablali da hetaha.
— Hubiernatar Varoniežskaj vobłaści zajaviŭ, što možna zakuplać miedycynskaje abstalavańnie, jakoje vyrablajecca ŭ Biełarusi. Adhuknuŭsia pra jaho jak pra jakasnaje, adpaviednaje čakańniam, jakija jość u rasijskaj miedycynskaj supolnaści. Što skažacie z hetaj nahody?
— Zusim niadaŭna Hałoŭčanka zajaŭlaŭ pra prablemy z pastaŭkami ŭ Biełaruś miedycynskaha abstalavańnia i zapasnych častak da vysokatechnałahičnych aparataŭ — zachodnija partniory padviali. Voś u hetych umovach ci možna vieryć u toje, što Biełaruś voźmie i zabiaśpiečyć Rasiju nieabchodnymi pryborami miedycynskaha pryznačeńnia tady, kali jana sama ich impartuje? Na moj pohlad, niama.
— Ci atrymajecca ŭ Biełarusi zarabić na pastaŭkach pasažyrskaj, kamunalnaj, sielskahaspadarčaj techniki ŭ Rasiju?
— Davoli składana skazać. Heta budzie vielmi mocna zaležać ad taho, nakolki sinchranizujucca sankcyi ŭ dačynieńni da Biełarusi i Rasii. Viadomaja reč, što pa miery taho, jak režym Łukašenki budzie sprabavać zarablać tradycyjna, što nazyvajecca, na pierakidańni — niešta kuplać i pradavać, a maržu sabie pakidać, krainy Zachadu buduć za hetym sačyć i pavoli ŭvodzić sankcyi ŭ dačynieńni da Biełarusi, kab heta nie było mahčymym.
Tamu niejkija hrošy z dapamohaj chitrych schiemaŭ jany, viadoma, zarobiać, ale pra toje, što heta stanie biznesam na hady napierad, možna nie maryć. Užo kali niechta na pierakidańni i zarobić, to jakija-niebudź trecija krainy pa-za miežami Eŭrasajuza, Biełarusi, Rasii i Ukrainy. Naprykład, Turcyja. Praź jaje možna budzie sprabavać što-niebudź pastaŭlać na Rasiju. Abo praz krainy byłoha Savieckaha Sajuza — praz Uźbiekistan, skažam.
Da Biełarusi budzie pilnaja ŭvaha, bo kraina ŭsprymajecca jak suahresar, tamu ŭsie dzirki buduć vielmi chutka zakryvacca.
