«Zialenski — nul». Łukašenkaŭskaja prapahanda
Rasijskaja prapahanda pačała pracavać na raskoł Ukrainy jašče ŭ 2004 hodzie. Pucin rabiŭ staŭku na pieramohu Viktara Janukoviča, ale ŭkrainskija vybarcy prakacili prakramloŭskaha kandydata i zrabili prezidentam Viktara Juščanku.
Juščanka nie zdoleŭ by stać prezidentam, kali b nie masavyja pratesty (druhi tur vybaraŭ spačatku byŭ sfalsifikavany na karyść Janukoviča, ale paśla masavych pratestaŭ adbyłosia pierahałasavańnie). Rasijskaja prapahanda tady pačała demanizavać Juščanku i śćviardžać, što Majdan byŭ štučna padstrojeny amierykancami, kab zrabić ukrainskim prezidentam prazachodniaha palityka.
Z novaj siłaj rasijskaja prapahanda nakinułasia na Ukrainu ŭ kancy 2013 hoda, padčas Jeŭramajdanu. Pa vynikach Revalucyi Hodnaści prezident Janukovič źbieh z krainy razam z hrupaj inšych ahientaŭ upłyvu Maskvy, i rasijanie abvinacili novyja ŭkrainskija ŭłady ŭ nielehitymnaści i ŭ dziaržaŭnym pieravarocie.
Prapahandysty całkam ihnaravali toj fakt, što va Ukrainie paśla Jeŭramajdanu pracavała całkam lehitymnaja, abranaja jašče ŭ časy Janukoviča Viarchoŭnaja Rada, a u kancy viasny na svabodnych demakratyčnych vybarach byŭ abrany novy prezident.
Tym nie mienš, prapahandysty to taŭravali novyja ŭkrainskija ŭłady słovam «nacysty», to śćviardžali, što krainaj realna kirujuć nie jany, a nacyjanalisty / amierykancy / hłabalisty / jaŭrei / repciłoidy.
U 2019 hodzie va Ukrainie adbyłasia pierazahruzka ŭłady. Prezidentam abrali Uładzimira Zialenskaha, ruskamoŭnaha jaŭreja biez palityčnaha dośviedu i biez suviazi z radykałami. Zialenski niazručnaja fihura dla kramloŭskaj prapahandy, jaho nu nijak pry ŭsim žadańni nie abvinavaciš u nacyźmie.
Fota: Ofis prezidenta Ukrainy.
I tut rasijskaja prapahanda źmianiła naratyŭ: tak, Zialenski nie nacyst, ale ž jon ničoha nie vyrašaje, jon pieška ŭ rukach amierykancaŭ / radykałaŭ / sijanistaŭ.
Rasijskaja, a śledam za joj i łukašenkaŭskaja prapahanda malavała Zialenskaha słabym, niesamastojnym palitykam, a ŭkrainskuju dziaržavu — failed state z bardakom.
Mahčyma, samo rasijskaje kiraŭnictva i sam Łukašenka pavieryli ŭ svaju prapahandu, bo čakali, što Ukraina padzie ŭ pieršyja ž dni tak zvanaj «śpiecapieracyi». Nahadajem, što asabista Pucin u pieršyja ž dni vajny zaklikaŭ ukrainskich vajskoŭcaŭ «brać uładu ŭ svaje ruki».
Ale akazałasia, što z usimi svaimi prablemami, niedaskanałaściami, chvarobami rostu ŭkrainskaja demakratyja akazałasia našmat bolš žyvučaj, čym «mocnyja» aŭtarytarnyja režymy, za pryhožymi fasadami jakich časta chavajecca truchnia.
Fota: Ofis prezidenta Ukrainy.
A Zialenski nie prosta akazaŭsia samastojnym palitykam unutry krainy, ale dakazaŭ svaju poŭnuju samastojnaść u adnosinach z Zachadam. Kali Vašynhton i Łondan chacieli, kab jon pakinuŭ Kijeŭ, i ličyli ŭkrainskuju spravu bieznadziejnaj, Zialenski zastaŭsia. Kali Varšava ličyła vialikim pośpiecham, što Jeŭropa zahavaryła adnym hołasam, Zialenski admoviŭsia pryniać prezidenta Hiermanii Štajnmajera, i dabiŭsia ad Hiermanii bolšaha. Za niekalki dzion Zialenski pieratvaryŭsia ŭ sučasnaha Čerčyla, adnaho z samych upłyvovych palitykaŭ śvietu z rekordnymi rejtynhami ŭnutry Ukrainy.
Zialenski sam pa sabie pryjšoŭ da ŭłady z rekordnym dla ukrainskaha palityka ŭzroŭniem padtrymki (73% u druhim tury vybaraŭ), jon maje całkam łajalny dla siabie parłamient, što va ŭmovach parłamiencka-prezidenckaj respubliki daje jamu vielizarnyja paŭnamoctvy i niezaležnaść ad roznych palityčna-aliharchičnych hrupovak unutry krainy.
Uładzimir Zialenski i premjer Vialikabrytanii Borys Džonsan. Fota: Ofis prezidenta Ukrainy.
Pavodle sacyjałahičnych apytańniaŭ, Zialenskaha padtrymlivaje 93% ukraincaŭ — niebyvałyja ličby dla demakratyčnaj krainy, jakija Łukašenku ź jahonym stabilna 30-pracentnym rejtynham i nie śnilisia.
Navat kali Zialenski pierad svaim prezidenctvam i byŭ kamuści štości vinny, albo zaležaŭ ad niejkich ukrainskich aliharchičnych hrup, to ciapierašniaja vajna i biesprecedentnaja padtrymka ŭsio abnuliła. U demakratyčnym hramadstvie palityk, jaki maje taki ŭzrovień padtrymki, moža abapiracca ŭ svaich dziejańniach vyklučna na narod.
Ale iniertnaja rasijskaja prapahanda ŭparta praciahvaje malavać Zialenskaha maryjanietkaj, nikčemnym i niesamastojnym palitykam, jaki całkam kirujecca z Vašynhtona.
Prajhravać amierykancam nie tak kryŭdna, jak prajhravać Ukrainie — mała taho što Małarosii, dyk jašče i failed state.
Siaredniestatystyčny rasijanin hadami žyŭ ź mifami pra anarchiju i nieefiektyŭnuju dziaržavu va Ukrainie, u hetyja mify pavieryŭ, a ciapier, kali sutyknuŭsia ź niečakanaj dla siabie realnaściu, šukaje apraŭdańniaŭ tamu, što ŭsio zusim nie tak, uklučajecca miechanizm psichałahičnaj abarony. Ujaŭleńnie pra Zialenskaha jak pra maryjanietku Zachadu — adna z hałoŭnych formaŭ takoj psichałahičnaj abarony.
Ale nie tolki heta pryčynaj. Rasijanie jašče i ekstrapalujuć ułasnuju madel adnosin z satelitami i zaležnymi terytoryjami kštałtu Biełarusi ci Prydniastroŭja na adnosiny Ukrainy i Zachadu.
Fota: Ofis prezidenta Ukrainy.
Jany dumajuć, što kali ŭ Kramli da postaciaŭ kštałtu Łukašenki, Pušylina ci Bžanii staviacca jak da klijentaŭ, to anałahična, u fieadalnym styli, staviacca da svaich mienšych chaŭruśnikaŭ i Amieryka ź Jeŭrasajuzam.
Ale ŭ sučasnym demakratyčnym śviecie ŭsio pracuje nie tak, jak ujaŭlajuć sabie rasijanie: adnosiny mocnych vialikich demakratyi ź mienšymi partniorami-demakratyjami našmat składaniejšyja, čym adnosiny «patron — klijent». Rasijanie prosta nie mohuć vyjści za miežy ŭłasnaj paradyhmy i nie razumiejuć, što moža być pa-inšamu.
Što datyčyć Zialenskaha, to pry im Ukraina, naadvarot, pačała pravodzić praaktyŭnuju, rezkuju i časam nadryvistuju źniešniuju palityku ŭ adnosinach da svaich sajuźnikaŭ.
Fota: Ofis prezidenta Ukrainy.
Ukrainskaje zamiežnapalityčnaje viedamstva, palityčny kłas, a taksama sam Zialenski dziorzka krytykavali svaich zachodnich chaŭruśnikaŭ za nierašučaść, niedastatkovuju padtrymku, niežadańnie rabić Ukrainu pryjarytetnym kirunkam u źniešniaj palitycy.
Najbolš dastałosia niemcam (darečy, adnym z hałoŭnych donaraŭ dla Ukrainy). Pasoł Ukrainy ŭ Niamieččynie Mielnik rehularna atakuje niamiecki palityčny kłas, enierhična krytykuje źniešniuju palityku Niamieččyny i časam navat vychodzić za miežy funkcyj pasła. Jon razdaje naprava i naleva acenačnyja mierkavańni adnosna Niamieččyny, pavučaje i šantažuje miascovych palitykaŭ.
Ukraina navat admoviłasia prymać u Kijevie prezidenta Niamieččyny Štajnmajera, jakomu ŭkraincy tak i nie mohuć daravać jahonyja sproby damovicca z Pucinym. Ukraincy nie prosta nie puścili Štajnmajera ŭ Kijeŭ, a jašče i patrabavali, kab zamiest jaho va Ukrainu pryjechaŭ kancler Šolc. Admova pryniać Štajnmajera ŭ Kijevie była vielmi mocnaj abrazaj dla niemcaŭ. Jany ŭspryniali heta jak niepavahu da prezidenckaj instytucyi Niamieččyny (biez pryviazki da proźvišča) i krainy, jakaja akazvaje najbolšuju finansavuju padtrymku Ukrainie.
Takaja novaja stratehija ŭkrainskaj źniešniaj palityki sprečnaja. Chtości ličyć jaje aktyŭnaj palitykaj pa adstojvańni nacyjanalnych intaresaŭ Ukrainy, chtości — kryklivym nieefiektyŭnym papulizmam, jaki padmianiaje saboj realnuju prafiesijnuju dypłamatyju i padryvaje adnosiny z partniorami.
Dumki roznyja, ale fakt zastajecca faktam: Ukraina nie tolki što nie hladzić u rot svaim zachodnim partnioram, a nie baicca naviazvać im svaje ŭmovy.
Fota: Ofis prezidenta Ukrainy.
Zialenskamu dapamahaje kałasalnaja asabistaja papularnaść. Pavodle apytańnia ŭ Amierycy, jamu daviarajuć rekordnyja 7 z 10 amierykancaŭ. Takaja papularnaść ukrainskaha prezidenta za miažoj robić składanym luby cisk na jaho z boku zamiežnych palitykaŭ.
Voś užo šmat tydniaŭ Zialenski nie sychodzić ź pieršych pałos suśvietnych haziet i časopisaŭ, jon na siońnia źjaŭlajecca palitykam-simvałam, uvasableńniem kaštoŭnaściaŭ svabodnaha śvietu.
Śviežaja vokładka Time.
Ukraincaŭ pačali słuchać i prysłuchoŭvacca da ich, i, viadoma, hołas Zialenskaha staŭ upłyvovym na mižnarodnaj arenie. I chto viedaje, ci nie za Zialenskim praz paru miesiacaŭ ci hod budzie vyrašalnaje słova pry vyznačeńni losu Alaksandra Łukašenki?
Zialenski na vokładcy časopisa Der Spiegel.
