«My ŭpeŭnienyja, što Kreml užo pryniaŭ rašeńnie atakavać Małdovu. Jaje los vielmi važny. Kali Rasija voźmie respubliku pad kantrol, Ukraina stanie lohkaj mišeńniu, i samo jaje isnavańnie apyniecca pad pahrozaj», — kaža surazmoŭca vydańnia.
Zavajavańnie Małdovy, čyjo vojska naličvaje ŭsiaho 3250 sałdat, dazvolić rasijskim vojskam vyjści da Čornaha mora, Adesy i zachodnich abłaściej Ukrainy. Pavodle acenak zachodnich słužbovych asob, u Prydniastroŭi, samaabvieščanaj aŭtanomii Małdovy, znachodzicca kala 1500 rasijskich vajskoŭcaŭ. Siłam, jakija pierakinuć u Ciraspal ź inšych rehijonaŭ, daviadziecca pierasiekčy pavietranuju prastoru Ukrainy, a heta moža paciahnuć ataki sił ukrainskaj SPA.
Paśla sieryi vybuchaŭ, učynienych nieviadomymi «terarystami», abvastryłasia abstanoŭka i ŭ samim Prydniastroŭi. Niepryznanaja respublika miažuje z paŭdniovym zachadam Ukrainy i kantralujecca prarasijskimi siłami z pačatku 1990-ch, kali Małdova ŭziała prazachodni kurs.
Na dumku zachodnich analitykaŭ, meta Kramla — prabić suchaputny kalidor uzdoŭž ukrainskaha ŭźbiarežža da Prydniastroŭja, adrezaŭšy Ukrainu ad Čornaha mora. Vajennaja krynica miarkuje, što Rasija moža pajści jašče dalej: skarystaŭšysia niezadavolenaściu małdavan vysokim koštam žyćcia ŭ krainie, uzmacnić i ŭznačalić pratest, i ŭ vyniku padparadkavać sabie ŭsiu Małdovu.
