Premjer-ministry Biełarusi i Rasii razmaŭlali pa aktualnych pytańniach dvuchbakovaha supracoŭnictva i «padkreślili važnaść vypracoŭki sumiesnych rašeńniaŭ pa ŭsich kirunkach uzajemadziejańnia na fonie sankcyjnaha cisku», piša Biełta.
Asnoŭnaja ŭvaha była nadadziena realizacyi damoŭlenaściej u halinie paliŭna-enierhietyčnaha kompleksu, impartazamiaščeńnia, pramysłovaści i inšych śfierach.
Raman Hałoŭčanka i Michaił Mišuścin abmianialisia vinšavańniami z nahody nadychodziačaha Dnia Pieramohi i padkreślili nacelenaść na dalejšaje ŭmacavańnie sajuźnickich adnosin va ŭsich śfierach.
5 maja taksama adbyłasia telefonnaja razmova pamiž ministram zamiežnych spraŭ Biełarusi Uładzimiram Makiejem i ministram zamiežnych spraŭ Rasii Siarhiejem Łaŭrovym.
«Ministry razhledzieli aktualnyja aśpiekty ŭzajemadziejańnia dźviuch krain na mižnarodnych placoŭkach, sumiesnaha supraćdziejańnia sankcyjnym abmiežavańniam z boku Zachadu», ‒ paviedamlaje pres-słužba biełaruskaha MZS. Ministry taksama abmianialisia dumkami pa pytańniach dvuchbakovaha paradku dnia, abmierkavali mierapryjemstvy pa linii źniešniepalityčnych viedamstvaŭ dźviuch krain.
Rasijskaje MZS, źviartaje ŭvahu reform.by, paviedamlaje, što Makiej i Łaŭroŭ abmiarkoŭvali pytańni sajuznaha budaŭnictva, u tym liku realizacyju intehracyjnych rašeńniaŭ vyšejšych orhanaŭ Sajuznaj dziaržavy, a taksama hrafik majučych adbycca kantaktaŭ na vyšejšym i vysokim uzroŭni.
Akramia hetaha, ministry abmierkavali chod «śpiecapieracyi» va Ukrainie i damovilisia kaardynavać pracu pa sumiesnym supraćdziejańni «namahańniam krain Zachadu, nakiravanym suprać intaresaŭ Rasijskaj Fiederacyi i Respubliki Biełaruś».
