Rezkich skačkoŭ chutčej za ŭsio nie budzie
Na svaim piku, jaki byŭ zafiksavany 16 sakavika, aficyjny kurs rubla składaŭ 3,319 za dalar. Napiaredadni vajny — 2,655. Pa vynikach tarhoŭ za 6 maja kurs źniziŭsia da 2,547 za dalar.
Ekśpiert BEROC Anastasija Łuzhina adznačaje, što sakavicki skačok byŭ spravakavany nie stanam ekanomiki, a reakcyjaj rynkaŭ na situacyju, jakaja skłałasia. Biełaruski rubiel u svaju čarhu pakul šmat u čym paŭtaraje trajektoryju rasijskaha.
Ekśpiert BEROC Anastasija Łuzhina
«Kali kazać pra kurs rasijskaha rubla, to my pavinny razumieć, što jon nie zusim rynkavy. Jaho stabilizacyja adbyvajecca ŭ pieršuju čarhu za košt strohich abmiežavańniaŭ, uviedzienych Centrabankam.
Tam prysutničajuć abmiežavańni pa kupli valuty i abaviazacielstvy eksparcioraŭ pradavać 80% valutnaj vyručki».
Ekanamist ličyć, što kali hetyja miery prybrać, to rasijski rubiel patańnieje.
«Rezkich skačkoŭ chutčej za ŭsio nie budzie, ale i ciapierašni kurs nie zmoža ŭtrymacca na raniejšym uzroŭni. Tym bolš, što navat ciapier najaŭny kurs, pa jakim u Rasii možna kupić dalary, adroźnivajecca ad aficyjnaha».
Pra adroźnieńnie kursu aficyjnaha ad realnaha kažuć i biełarusy, jakija žyvuć u Maskvie. Nie tak daŭno pry kursie Centrabanka 73 rasijskija rubli za dalar najaŭnuju valutu ŭ Źbierbanku ludzi brali pa 88.
Pry hetym kurs biełaruskaha rubla źjaŭlajecca rynkavym, adznačaje ekśpiert.
«Biezumoŭna, u samyja ciažkija momanty padklučaŭsia Nacyjanalny bank, ale ŭlivańni ź jaho boku rabilisia dla taho, kab paźbiehnuć rezkich skačkoŭ, a nie štučna strymlivać kurs. Ad takoj praktyki ŭ Biełarusi admovilisia jašče ŭ 2015 hodzie, tamu kurs našaj valuty ŭ adroźnieńni ad rasijskaj sapraŭdy možna nazvać rynkavym. Paćviardžeńniem tamu, što Nacyjanalny bank nie strymlivaje źnižeńnie kursu biełaruskaha rubla da dalara ci jeŭra, źjaŭlajecca rost zołatavalutnych reziervaŭ krainy ŭ krasaviku», — tłumačyć Anastasija Łuzhina.
Niejki čas ekanomika moža pracavać na peŭnym zapasie
Siarod ekanamičnych faktaraŭ, jakija najbolš paŭpłyvali na kurs biełaruskaha rubla, vyłučajuć spryjalnyja ŭmovy źniešniaha handlu ŭ pačatku hoda.
Źniešniehandlovaje salda tavarami i pasłuhami ŭ studzieni-lutym było stanoŭčym i skłała 726,5 młn dalaraŭ. Dobryja vyniki pa rostu ekspartu pakazaŭ IT-siektar.
Nie varta taksama zabyvać, što Ukraina źjaŭlałasia adnym z najvažniejšych ekanamičnych partnioraŭ Biełarusi. U studzieni-lutym na jaje pryjšłosia 9,7% usiaho tavaraabarotu respubliki. Abjomy handlu z hetaj krainaj taksama demanstravali rost.
Niejki čas ekanomika moža pracavać na peŭnym zapasie, ale navat z ulikam stanoŭčaj dynamiki za pieršyja dva miesiacy 2022 hoda, VUP Biełarusi za pieršy kvartał źniziŭsia na 0,4% (u paraŭnańni z anałahičnym pieryjadam letaś).
«U najbližejšaj pierśpiektyvie asnoŭnym handlovym partnioram budzie zastavacca Rasija, jakaja sama pakutuje ad sankcyj. Ukrainski rynak i łahistyčnyja łancužki, jakija prachodzili praz hetuju krainu, u mnohich vypadkach zhublenyja. Čakajecca skaračeńnie handlu pa jeŭrapiejskim kirunku. IT-śfiera chutčej za ŭsio budzie zapavolvać svoj rost, pakolki kampanii častkova rełakavali biznes i svaich supracoŭnikaŭ», — adznačaje ekśpiert.
Nastupstvy ad sankcyj adčujem paźniej
Važnym momantam, jaki nie varta zabyvać, źjaŭlajucca novyja sankcyi, dziejańnie jakich ekanomika pačynaje adčuvać sa spaźnieńniem.
«Bolšaść abmiežavańniaŭ nie dziejničaje adrazu, tamu ich niehatyŭnyja nastupstvy my budziem adčuvać pa vynikach nastupnych 1-2 kvartałaŭ», — ličyć Łuzhina.
Siarod nasielnictva zastajecca papularnym mierkavańnie, što kurs rubla da dalara źjaŭlajecca ledź nie asnoŭnym pakazčykam stanu ekanomiki. Ale heta daloka nie tak.
«Bo na kurs mohuć uździejničać nie tolki ŭnutranyja faktary, ale i karotkaterminovaja dynamika źniešnich rynkaŭ. Tamu kazać, što kali my viarnulisia na davajenny kurs, to ŭ ekanomicy ŭsio budzie dobra — nielha.
Rost cen vyšejšy, čym zapłanavany, realnaja zarabotnaja płata ŭ sakaviku 2022 hoda skaraciłasia da ŭzroŭniu minułaha hoda», — źviartaje ŭvahu na inšyja istotnyja momanty Łuzhina.
«Našu Nivu» finansujuć jaje čytačy — padtrymać prosta
Čytajcie taksama:
Zołatavalutnyja reziervy Biełarusi ŭ krasaviku istotna vyraśli
