Jak paviedamiła Śviatłana Cichanoŭskaja ŭ intervju «Svabodzie», kiraŭnik MZS Čechii Jan Lipaŭski zapeŭniŭ jaje, što zakon budzie pierahledžany, i ŭ im nie budzie zhadvacca Biełaruś. Pavodle jaje, taksama ministr skazaŭ, što ambasada ŭ Minsku nieŭzabavie znoŭ budzie vydavać vizy biełarusam. Ministr adukacyi skazaŭ, što dyskryminacyi biełaruskich studentaŭ nie budzie, paviedamiła Cichanoŭskaja.
«Maja zadača była — danieści dumku, što nielha karać biełarusaŭ za dziejańni Łukašenki, što narod i režym heta nie adno i toje ž, što Biełaruś i Rasija — heta nie adno i toje ž. Treba cisnuć na režym i dapamahać biełarusam, bo biełarusy nijakaj pahrozy dla Čechi nie niasuć. Heta vidavočnaja praktyka Čechii ad Masaryka da Vacłava Havieła. Naadvarot, treba davać bolš viz, bolš stypiendyj, adkryvać toje, što ŭzmacniaje češska-biełaruskija suviazi. My byli pačutyja».
Śviatłana Cichanoŭskaja znachodzicca ŭ Čechii z trochdzionnym vizitam, padčas jakoha maje sustrečy z prezidentam, premjeram, kiraŭnikami parłamienta, meram Prahi, klučavymi ministrami.
Niadaŭna stała viadoma, što MUS Čechii razam z MZS krainy raspracoŭvaje zakon, jaki zrobić mihracyju hramadzian Rasii i Biełarusi ŭ Čechiju, pa sutnaści, niemahčymaj. Pra heta paviedamlali biełaruskija aktyvisty ŭ Češskaj respublicy.
Jak pišacca ŭ paviedamleńni biełarusaŭ, hetaja infarmacyja raniej hučała ŭ ŚMI na ŭzroŭni płanaŭ paśla zakančeńnia kryzisnaha stanovišča ŭ suviazi z pandemijaj, ale ab raspracoŭcy kankretnaha zakona stała viadoma tolki ŭ piatnicu 6 traŭnia, apošni dzień, kali hramadskaść mahła dasyłać zaŭvahi.
Paśla pačatku vajny Rasii suprać Ukrainy ŭrad Čechii ŭžo prypyniaŭ vydaču viz biełarusam, ale paśla zachadaŭ ofisa Śviatłany Cichanoŭskaj i pradstaŭnikoŭ biełaruskaj dyjaspary było abvieščana, što rašeńnie pierahledziać.
Biełarusy Čechii taksama nakiravali padziaku ŭ Ministerstva kultury Češskaj respubliki, jakoje adzinaje siarod češskich ministerstvaŭ sfarmulavała pa źmieście zakonu zaŭvahi, jakija adlustroŭvajuć pazicyju biełaruskaj nacyjanalnaj mienšaści i, u adroźnieńnie ad samoha zakona, uličvajuć realnuju situacyju hramadzianskaj supolnaści ŭ Biełarusi.
