Na hetym tydni ŭ Italii prachodzić samy papularny jeŭrapiejski muzyčny konkurs. Biełaruś i Rasija ŭ im nie ŭdzielničajuć: Rasiju adchilili z-za ŭvarvańnia va Ukrainu, a biełarusaŭ niama kamu adpraŭlać, bo BT vyklučyli ź jeŭrapiejskaha viaščalnaha sajuza.
Najlepšym vynikam našych kankursantaŭ zastajecca šostaje miesca Dźmitryja Kałduna ŭ 2007 hodzie. U astatnim dasiahnieńni Biełarusi vielmi ścipłyja — 10 razoŭ z 16 navat nie vychodzili ŭ finał.
Upieršyniu biełarusy pajechali na «Jeŭrabačańnie» ŭ 2004 hodzie. Na konkurs u Stambuł adpravili fołk-duet «Alaksandra i Kanstancin» z anhłamoŭnaj pieśniaj «My Galileo» i minimalistyčnym numaram.
Rašeńnie adpravić fołk-pieśniu z narodnymi matyvami ciapier vyhladaje prahresiŭnym. Chacia ŭ vyniku duet nie zajmieŭ mižnarodnaha pośpiechu: jon padzialiŭ 3-4 miescy z kanca ŭ paŭfinale (tady paŭfinał byŭ tolki adzin) i dalej nie prajšoŭ.
Dalej doŭhi čas ad Biełarusi jeździli standartnyja anhłamoŭnyja numary, jakija ŭ teoryi mahli pajechać ad luboj inšaj krainy.
Tak, u 2006 hodzie ŭ Afinach vystupała Palina Smołava. Numar zapomniŭsia chiba što ultrakarotkimi šortami śpiavački, ale lohkaha eratyzmu hledačy nie acanili. Mahčyma, z-za zvyšdynamičnaha numara.
Pieradapošniaje miesca ŭ paŭfinale — antyrekord na siońniašni dzień.
U 2008-m, praz hod paśla pośpiechu Kałduna, jaho, vidać, pažadali palepšyć, skryžavaŭšy imidž minułahodniaha biełaruskaha kankursanta ź imidžam Dzimy Biłana. Z takoj składanaj zadačaj i pieśniaj «Hasta la vista» ŭ Sierbiju adpravili Rusłana Alachno
Śpiavak misiju pravaliŭ — tolki 17-je miesca z 19 paŭfinalistaŭ. Praz 13 hadoŭ Alachno napracavaŭ na zvańnie zasłužanaha artysta Biełarusi ad Łukašenki.
U 2011 hodzie zdaryłasia druhaja sproba skaryć «Jeŭrabačańnie» biełaruskim «falkłoram». Na konkurs pajechała nikomu dahetul nie viadomaja śpiavačka Nastaśsia Vińnikava ź pieśniaj «I love Belarus», jakaja pačynałasia z mahutnaha ŭstupu na cymbałach.
Vińnikava nie vyjšła ŭ finał, što mocna tady aburyła Alaksandra Łukašenku. Na nastupny dzień paśla paŭfinała jon skazaŭ nastupnaje:
«Tak, my im [Zachadu] nie padabajemsia, tamu što jany bačać u nas kankurentaŭ. I buduć dušyć, dušyć pa ŭsich kirunkach. Na «Jeŭrabačańni» buduć dušyć, jak učora hetuju dziaŭčynku. Nu, małajčyna! Supała ŭsio: i pavodziny, i tvar, i pieśnia. Jana praśpiavała himn Biełarusi. Chto ž jaje prapuścić z himnam Biełarusi?»
Tak zvany «himn Biełarusi», napisany ciapierašnim prydvornym kampazitaram Jaŭhienam Alejnikam, abvinavačvali ŭ płahijacie na pieśniu «Hulaj, mužyk» hurta «Siektar haza».
Ale jašče bolš trešova vyhladaje inšaja pieśnia, ź jakoj Vińnikava źbirałasia jechać spačatku. Jaje prypieŭ pačynaŭsia sa słoŭ «Born in Bielorussia [Biełaraša], USSR [SSSR]».
Paśla «Jeŭrabačańnia» pra śpiavačku Vińnikavu bolš ničoha nie čuli.
U 2016 hodzie na konkurs pajechaŭ IVAN, prajekt rasijskaha pradziusara Viktara Drobyša. Choć tady byŭ najlepšy vynik z tych biełaruskich piesień, jakija nie prabilisia ŭ finał, vizuał numara ŭ śpievaka byŭ dziŭnavaty — u pačatku aholeny Ajven dakranaŭsia da vaŭka i pačynaŭ śpiavać.
Pajezdka na «Jeŭrabačańnie» nie dapamahła karjery maładoha biełarusa. U 2022 hodzie jon jeździć za hrošy śpiavać u prapahandysckich kancertach na Danbas.
Paśla sfalsifikavanych prezidenckich vybaraŭ i žudasnych represij, jakija vyklikali ŭviadzieńnie jeŭrapiejskich sankcyj, u 2021 hodzie Biełteleradyjokampanija vyrašyła adpomścić «kalektyŭnamu Zachadu» i adpravić na «Jeŭrabačańnie» pravincyjny kalektyŭ «Hałasy ZMiesta» z ruskamoŭnaj pieśniaj «Ja nauču tiebia».
Pieśnia vyklikała chvalu abureńnia i zvarotaŭ da Jeŭrapiejskaha viaščalnaha sajuza ab dyskvalifikacyi Biełarusi. Paśla arhanizacyja zajaviła, što kali biełarusy nie źmieniać kampazicyju, to nijakaha «Jeŭrabačańnia» nie vidać.
Tady «narodny hurt» z Baranavičaŭ vypuściŭ novuju pieśniu, na hety raz pra zajčykaŭ.
U vyniku Biełaruś zabanili, a prapahanda pravał pačała apraŭdvać tym, što narešcie nie daviadziecca biełarusam udzielničać i hladzieć palityčny konkurs, dzie vystupajuć adny tranśviestyty.
Ciapier ža biełarusam tolki i zastajecca, što zaŭzieć za inšych kankursantaŭ.
