Alaksandr Łukašenka i hienieralny prakuror Andrej Švied. Skrynšot ź videa
Papraŭki ŭ Kryminalny kodeks ustupajuć u siłu praz 10 dzion paśla aficyjnaha apublikavańnia, heta značyć, z 29 maja, paviedamlaje Zerkalo.io.
U novaj redakcyi Kryminalnaha kodeksa pašyryli prymianieńnie śmiarotnaha pakarańnia (art. 59 «Śmiarotnaje pakarańnie»)
«U jakaści vyklučnaj miery pakarańnia dapuskajecca prymianieńnie śmiarotnaha pakarańnia — rasstrełu (da admieny śmiarotnaha pakarańnia) za złačynstvy, praduhledžanyja:
častka 2 artykuła 124 (Akt teraryzmu ŭ dačynieńni da pradstaŭnika zamiežnaj dziaržavy abo mižnarodnaj arhanizacyi);
Častka 3 artykuła 126 (Akt mižnarodnaha teraryzmu);
častka 3 artykuła 289 (Akt teraryzmu, učynieny arhanizavanaj hrupaj, albo z prymianieńniem abjektaŭ vykarystańnia atamnaj enierhii, albo z vykarystańniem radyjeaktyŭnych rečyvaŭ albo jadziernych materyjałaŭ, mocnadziejnych, taksičnych chimičnych ci bijałahičnych rečyvaŭ abo spałučanyja z zabojstvam čałavieka);
častka 2 artykuła 359 (Zabojstva dziaržaŭnaha abo hramadskaha dziejača, učynienaje ŭ suviazi ź jaho dziaržaŭnaj ci hramadskaj dziejnaściu ŭ metach akazańnia ŭździejańnia na pryniaćcie rašeńniaŭ orhanami ŭłady)».
Akramia taho, u novaj redakcyi Kodeksa pakazana, što śmiarotnaje pakarańnie pryznačajecca «za asabliva ciažkija złačynstvy, spałučanyja z naŭmysnym pazbaŭleńniem žyćcia čałavieka pry abciažarvajučych abstavinach, niekatoryja inšyja asabliva ciažkija złačynstvy».
Źmianiajecca i art. 67 KK Biełarusi («pryznačeńnie pakarańnia za niaskončanaje złačynstva»).
Raniej śmiarotnaje pakarańnie nie mahło być pryznačanaje za padrychtoŭku da złačynstva i zamach na złačynstva. Ciapier u hety punkt uniesienyja vyklučeńni, dadalisia da jaho złačynstvy, sankcyja jakich užo praduhledžvaje śmiarotnaje pakarańnie ŭ adpaviednaści ź dziejnym KK: č. 2 art. 124, č. 3 art. 126, č. 3 art. 289 i č. 2 art. 359.
Zakonaprajekt z «rasstrelnymi» papraŭkami za «zamach na teraryzm» na razhlad u parłamient uniesła člen Pastajannaj kamisii Pałaty pradstaŭnikoŭ pa nacyjanalnaj biaśpiecy Maryna Lančeŭskaja. 27 krasavika deputaty Pałaty pradstaŭnikoŭ pryniali zakonaprajekt ab źmienach u Kryminalny kodeks u dvuch čytańniach. 4 maja jaho adnahałosna ŭchvalili ŭ Saviecie Respubliki.
Interpretacyja taho, što takoje teraryzm, u režymu vielmi šyrokaja. Tak, u śpis terarystaŭ uniesienyja lidary palityčnaj apazicyi Śviatłana Cichanoŭskaja i Pavieł Łatuška, błohier Anton Matolka i aficery siłavych struktur, jakija padtrymali ruch za svabodnyja vybary.
